ပလဝ်၊ မာတ် ၃။
ပ္ဍဲကဵုရးတၞၚ်သဳ ပွိုၚ်ဍုၚ်ပလဝ် တုဲကၠုၚ်မွဲဂိတုပြၚ်ၚ်တေံ ပေါဲဗတိုက်ကတဵုဒှ်လဝ်ဂှ် သီဂွံလဝ် ဗ္ဒိုပ်ဒပ်ပၞာန်ကဝ်မယှေန်ပၞာန် ၜါဒၞာဲရောၚ်ဂှ် ဂွံတီကေတ် နူကဵုဒပ်ပၞာန်စဵုဒၞာညးဍုၚ် PDF ခရိုင်ဗိက် တမ်ဒပ် ၁ ရ။
နကဵုဇြဟတ်ပၞာန် ၜိုတ်ပွဳပွူ ၂၀၀ တံ ထပက်ကရောၚ်ပၞာန်လုပ်ကၠုၚ် ပ္ဍဲပွိုၚ်ဍုၚ်ပလဝ်ဂှ် ဒပ်ပံၚ်ကောံစဵုဒၞာညးဍုၚ်ကွာန်တံ ဒုင်တဝ်စၞေဟ် ဗတိုက်ကၠုၚ် စနူကဵုဂိတုဂျာန်နဝါရဳ ၁၆ တေံ မဒှ်ရ။
ကၠာပေါဲရုဲမာဲဟွံစကၠောန်ဏီ ဒပ်ပၞာန်ကဝ်မယှေန်ပၞာန် သွက်ဂွံပသောင်တိဍာ်တုဲဂး ထပက်လုပ်ကၠုၚ်ကရောၚ်ပၞာန် ပ္ဍဲကွာန်ဂမၠိုၚ် ပွိုၚ်ဍုၚ်ပလဝ်ဂှ်တှေ် စနူအခိၚ်တေံတုဲဂှ်ရ ပေါဲဗတိုက်ၜါလပါ် ကတဵုဒှ်ကၠုၚ်ကဵု ဂကောံဇြဟတ်ပၠန်ဂတးတံ ဟီုရ။
ပ္ဍဲဂိတုဖေဖဝ်ဝါရဳ ၂၈ ဂှ် ဒၞာဲဒပ်ပၞာန်ဗမာ ဖျေံစွံလဝ်ဒြဟတ်ပၞာန် ပ္ဍဲဘာလကျာ်တာန်ယှေန်ကေုာံ ဒၞာဲကုန်စေတဳ၊ ဘာလကျာ် ကွာန်တေန်ဂါန်တဝ်ဂှ် သီကေတ်မာန်လဝ် ဗွဲမအံၚ်ဇၞးရောၚ် ညးတာလျိုၚ် နူတမ်ဒပ် ၁ ခရိုင်ဗိက် ဟီုကဵု ဌာန်ပရိုၚ်သြၚ်လောန်တိုၚ်မ် ရ။
အပ္ဍဲပေါဲဗတိုက် မကတဵုဒှ်ဒၟံၚ် ပွိုၚ်မွဲဂိတုပြၚ်ၚ်ဏအ် လပါ်ကဝ်မယှေန်ပၞာန် ၁၀ တၠ ချိုတ်အာ၊ ၅ တၠ ဒးဝပ်ဘဲဒဏ်တုဲ သီုရပ်ဂွံလဝ်ဂျိုၚ်ၚ် ကောန်ပၞာန် ၁ တၠကေုာံ ကောန်ပၞာန်မွဲတၠပၠန်ဂှ် ယိုက်ကေတ်ဏာ လွဟ်မကမ်တံတုဲ လုပ်ဖျေံလွဟ် လပါ်ပၠန်ဂတးရောၚ် သ္ဂးရ။
တုဲပၠန် ကောန်ဒပ်နူ PDF တမ်ဒပ် ၁ ခရိုင်ဗိက် ၇ တၠ ကေုာံ ကောန်ဒပ် နူဒပ်စဵုဒၞာကောန်ဂကူကရေၚ် ၂ တၠ ဒးလဝ်ဘဲဝပ်ကီုရ။
အပ္ဍဲပေါဲဗတိုက် ဟိုတ်နူဒပ်ပၞာန်ကဝ်မယှေန်ပၞာန်တံ ပန်ခြော်လဝ်ကြာန်န် နကဵုလွဟ်ဇၞော်သီုဟၟဲကဵုပွန်ဒၞာဲတုဲ ညးဍုၚ်ကွာန်ဟၟဲကဵုဒုဟ် ၂ တၠ ဒးချိုတ်အာတုဲ ဟိုတ်နူစကာဒရုၚ်ကြဳဖျေံဗုမ်ဂှ်ရ သ္ၚိတူအာ ၆၀ မပြၚ်ရောၚ် သ္ဂးလဝ်ရ။
ဒပ်ပၞာန်ကဝ်မယှေန်ပၞာန် ကျမံၚ်ပ္ဍဲမုက်ပၞာန်ဗလးတိတံ ပြဟ်ဟ်ဏအ်ဂှ်တှ်ေ ပ္ဍဲကွာန်ဂမၠိုၚ်ကြဳဖျေံဗုမ် နကဵုၜင်ကျာ ပ္ဍဲပွိုၚ်ဍုၚ်ပလဝ် ဇၟာပ်တ္ၚဲဒှ်မံၚ်တုဲ ညးဍုၚ်ကွာန်တံဒၞာဲဂီုကၠီုနွံ ညံၚ်ဂွံမံၚ်စံၚ်အာကီု သတိပၞာန်ညံၚ်ဂွံနွံဂှ် နူကဵု PDF တမ်ဒပ် ၁ ခရိုင်ဗိက် ဆဝ်ဗ္ၚုဟ်ကဵုလဝ်သမ္တီရ။
ပရိုၚ်- သြၚ်လောန်တိုၚ်မ်
Photo – PDF