ၜၚ်ကံက်၊ မာတ် ၃။
ပ္ဍဲဍုၚ်သေံ ကၠေၚ်ဍေၚ်အရန် သွက်ဂွံစကာၜါဂိတု နွံမံၚ်တုဲ ယဝ်ရပေါဲပၞာန်အဳရာန် ဆက်သၠုၚ်သကာတ်မြဟ်တိုန်အာမ္ဂး သွက်ဓါတ်ဂွံရုမ်ဂပ်မာန် ဂၠာဲရာန်ကၠေၚ်ဍေၚ်နူရိုဟ်ကၞက်တၟိတံရောၚ် ဌာနဝန်ဇၞော်သၟုဟ်ဇြဟတ်ဓါတ် ဟီုလဝ် ပ္ဍဲမာတ် ၁ ရ။
ပ္ဍဲဍုၚ်သေံ စဵုကဵုဖေဖဝ်ဝါရဳ ၂၃ ဂှ် ကၠေၚ်ဍေၚ်အရိုၚ် ကေုာံ ကၠေၚ်ဍေၚ်တောမ်သ္အးတုဲ မၞုံဒၟံၚ် ၃ ဒသမ ၉၂ ဗဳလဳယာန် လေတ် ရောၚ် ဒုကေၚ်ကာအပ္ဍဲလၟိုန် ဌာနဝန်ဇၞော်သၟုဟ်ဇြဟတ်ဓါတ် ဗဳရာပက်ဟီုလဝ်တုဲ လၟိဟ်ဏအ်ဂှ် သွက်အရၚ်စကာ ၃၈ တ္ၚဲ ရုမ်ဂပ်မံၚ်ရောၚ် သ္ဂးရ။
တုဲပၠန် ကၠေၚ်ဍေၚ်အရိုၚ် ၁ ဒသမ ၇၅ ဗဳလဳယာန်လေတ် သွက်ဂွံပလံၚ်နၚ်ဍုၚ်သေံဂှ် ပ္ဍဲအခိၚ်ဂတဏအ် အာနကဵုဂၠံၚ်မ္ၚး ပ္ၚံက်ၜဳဟဝ်မုတ်တုဲ စိုပ်ကၠုၚ်ဏောၚ် ညးဟီုရ။
နူဍုၚ်သအာၚ်တံလေဝ် ကၠေၚ်ဍေၚ်အရိုၚ် ၁ ဒသမ ၁၂ ဗဳလဳယာန် လေတ်ဂှ် သွက်ဂွံပလံၚ်ဗစိုပ်ကဵု ဍုၚ်သေံမၞုံမံၚ်ရောၚ် ဒုဝန်ဇၞော်သၟုဟ်ဇြဟတ်ဓါတ် သ္ဂးရ။
ဟိုတ်နူအဳရာန် ဗတိုက်မံၚ်က္ၜၚ် ပ္ဍဲဗဒါဲပ္ၚံက်ၜဳဟဝ်မုတ်ဂှ် ၚုဟ်ကၠေၚ်ဍေၚ်ဂၠးကဝ် သၠုၚ်တိုန်မံၚ်ရ။
ကၠေၚ်ဍေၚ်မၞုံဒၟံၚ် ပ္ဍဲဍုၚ်သေံ ကေုာံ ကၠေၚ်ဍေၚ်ဂွံစိုပ်ကၠုၚ်တံ သီုဖအိုတ်ပံၚ်ထောံမ္ဂး သွက်ဂွံစကာ ၆၁ တ္ၚဲဂှ် ရုမ်ဂပ်အာဏောၚ်ရောၚ် ဥူဗဳရာပက် ဟီုရ။
ပါဲနူကၠေၚ်ဍေၚ်အရိုၚ်တုဲ က္ၜၚ် ၄ မ ဖ္ဍိုက်နၚ်ဍာ်သၟုဟ်ဓါတ် သွက်ဂွံပလံၚ်ကဵုဍုၚ်သေံဂှ် တတ်ၜက်အာ ပ္ၚံက်ၜဳဟဝ်မုတ် ၂ မ တုဲယျရောၚ် ညးဟီုရ။
ယဝ်ရပေါဲပၞာန်အဳရာန် ဆက်လံအာ သာ်ဂှ်ဟွံသေၚ် သကာတ်မြဟ်တိုန်အာမ္ဂး သွက်ကၠေၚ်ဍေၚ် ညံၚ်ဟွံဂွံပိုတ်အာဂှ် နူကဵုဌာနဝန်ဇၞော်သၟုဟ်ဇြဟတ်ဓါတ် ကၠောန်အာအစဳအဇန်တံဏောၚ်၊ ယဝ်ရပ္ၚံက်ၜဳဟဝ်မုတ် ကၟာတ်အာမ္ဂး သွက်ဓါတ်ဂၠးကဝ် ၂၀ က္ဍိုပ်ကၠံ ဇီုကပိုက်ယုတ်ဒေက်အာမာန်ရောၚ် ဗဳရာပက် သ္ဂးရ။
သွက်ဂွံစကာအပ္ဍဲဍုၚ် သွက်ဂွံတောမ်သွဂှ် သၟုတ်ဓါတ်သဘာဝ ကေုာံ ဍာ်သၟုဟ်ဓါတ်တံဂှ် ရုမ်ဂပ်မံၚ်တုဲ သွက်ညးဍုၚ်ကွာန်တံ ဟွံဒးဒှ်ဒွိၚ်ပုဟ် ညးဟီုရ။
အပ္ဍဲအခိၚ်ဏအ် ဌာနဝန်ဇၞော်ကောန်ကမၠောန်သေံ ကေုာံ ဌာနဝန်ဇၞော်ပရေၚ်ဍုၚ်သအာၚ်တံဂှ် သွက်ဂွံပလံၚ်ကောန်ကမၠောန်သေံ ဇရေၚ်ဒေသဗၟံက်လဒေါဝ် (Middle East) မၞုံကဵုဘဲအန္တရာယ်တံဂှ် ဒေါအ်လဝ်ကၠာရောၚ် တုပ်လဝ်စိုတ်အိုတ်ရ။
Ref:Bangkokpost