မတ်မလီု၊ မာတ် ၃။
ဟိုတ်နူပေါဲဗတိုက် အဳရာန်-အမေရိကာန်-အေဿရေတံတုဲ ၚုဟ်ထဝ်ဂၠးကဝ်သၠုၚ်တိုန်ကၠုၚ်ဂှ်ရ အနှေန်ၚုဟ်ထဝ်အပ္ဍဲဍုၚ်လေဝ် ဆက်သၠုၚ်တိုန်အာမာန်ရောၚ် တၠကမၠောန်ထဝ်တံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
စနူဂိတုဖေဖဝ်ဝါရဳ ၂၈ တေံ ကြဴနူ အေဿရေကေုာံ အမေရိကာန်တံ ပံၚ်ကောံဗတိုက်ဏာဍုၚ်အဳရာန်ဂှ်တုဲ ၚုဟ်ထဝ်ဂၠးကဝ် ကလေၚ်သၠုၚ်တိုန်ကၠုၚ်ရ။
ကၠာပေါဲဗတိုက်ဟွံဂွံစဏီ ၚုဟ်ထဝ်ဂၠးကဝ် ထဝ်မွဲအံၚ်သ မၞုံဒၟံၚ် ဒဝ်လာအမေရိကာန် ပွဳပွူ ၅၁၀၀ ဓဝ်တုဲ ပ္ဍဲဂိတုမာတ် ၂ ဂှ် သၠုၚ်တိုန်အာ စဵုကဵု ၅၃၅၀ ဒဝ်လာရ။
ဟိုတ်နူ ၚုဟ်ထဝ်ဂၠးကဝ်ဂှ်တုဲ ထဝ်ဒကောၚ်မဳလေန် ပ္ဍဲဍုၚ်လေဝ် လျိုၚ်မွဲဒကေဝ်မ္ဂး နူကဵု ၁၀၇ ကိုတ်ဂှ် သၠုၚ်တိုန်အာစဵုကဵု ၁၁၀ ကိုတ် ပြၚ် မဒှ်ရ။
ဟိုတ်နူအကာဲအရာပၞာန် ပ္ဍဲဂၠးကဝ်တံတုဲ သီုဍုၚ်ဗမာအလုံမွဲဂၠးကဝ် မွဲဂှ် အနှေန်ၚုဟ်ထဝ်သၠုၚ်တိုန်အာမာန်ရောၚ် တၠကမၠောန်ထဝ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
“အကာဲအရာဂၠးကဝ်ဂှ် အေဿရေ ကဵု အဳရာန်တံ ဗတိုက်ဒၟံၚ်ညးသကအ်ရ။ ပရေၚ်ပၞာန်ဂှ် ဆက်တုဲ သကာတ်မြဟ်အာမာန်မံၚ်။ အခိၚ်ဂှ်မ္ဂး ၚုဟ်ထဝ်ဂၠးကဝ် တိုန်ဏောၚ်။ ထဝ်တိုန်ဏအ်ဂှ် ဍုၚ်ဗမာမွဲဓဝ်ဟွံသေၚ်၊ အလုံမွဲဂၠးကဝ် တိုန်အာမွဲစွံရ” သာ်ဝွံ သ္ဂးရ။
ဟိုတ်နူၚုဟ်ထဝ်ဂၠးကဝ် သၠုၚ်တိုန်အာဂှ်ရ အနှေန်ထဝ်အပ္ဍဲဍုၚ်ဂှ်လေဝ် ဆက်တိုန်အာမာန်တုဲ နကဵု ကဝ်မယှေန်ပၞာန် ၜိုန်ရထိၚ်ၚုဟ်ထဝ်ဂၠးကဝ်ဟွံမာန်ကီုလေဝ် ယဝ်ရဖျေံၚုဟ်ဒဝ်လာအပ္ဍဲဍုၚ်မာန်မ္ဂး ၚုဟ်ထဝ်ဟွံတိုန်ဂၠိုၚ်တုဲ ထိၚ်လဝ်မာန်ကီုရောၚ် ညးဆက်ဟီုရ။
ဗွဝ်ဖျာထဝ်ပ္ဍဲဍုၚ်ဂှ် ဟိုတ်နူၚုဟ်ထဝ်ဟွံညိၚ်ဝတ်တုဲ ဆေၚ်ထဝ်ဗွဲမဂၠိုၚ်ကၟာတ်လဝ်ပရေၚ်သွံရာန် ထဝ်ဒကောၚ်မဳလေန်ကီုလေဝ် ညးကၠုၚ်သွံထဝ်နွံမ္ဂး အောန်အိုတ်ခြာလဝ် နူအကြာ ၃ ကိုတ်ကဵု ၅ ကိုတ်တုဲ ရာန်ကေတ်မံၚ်နွံရ။
ဟိုတ်နူၚုဟ်ထဝ်ဆက်တိုန်မံၚ်တုဲ ရဲကဝ်မယှေန်ပၞာန်မၚ်ရံၚ်မံၚ်သၟးဟွံက သီုကော်စၟဳစၟတ်သၟာန်မံၚ် ညးမဆေၚ်စပ်တံကဵု တၠကမၠောန်ထဝ်တံနွံရောၚ် တၠကမၠောန်ဆေၚ်ထဝ်တံ ဟီုရ။
ၚုဟ်ထဝ်ဂၠးကဝ် ဆက်တိုန်မံၚ်ကီုလေဝ် လပါ်ကဝ်မယှေန်ပၞာန်ခုတ်စၟတ်စွံလဝ် လျိုၚ်ထဝ်မွဲဒကေဝ် ၆၉ ကိုတ်ဓဝ်တုဲ ခြာမံၚ်ကဵု ၚုဟ်ဗွဝ်ဖျာမ္ၚး ၄၀ ကိုတ်ပြၚ်ရောၚ်။
ပရိုၚ် – သြၚ်လောန်တိုၚ်မ်
Photo – Social Media