ကျာ်ထဝ်၊ မာတ် ၅။
ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ် ဒၞာဲတိဍာ်ဂကောံဇြဟတ်ပၠန်ဂတး ချဳဒရာၚ်ဇြဟတ်ခိုဟ်မံၚ်ဂှ် နူကဵုကဝ်မယှေန်ပၞာန် ပလေဝ်စမံၚ် သွက်ဂွံထပက်ပၞာန်ဇၞော်ဇၞော်ရောၚ် ရိုဟ်ကၞက်ပရိုၚ်နူဗလးတိတံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
သွက်ဂွံထပက်ပၞာန်ဇၞော်ဇၞော်မာန် ပ္ဍဲဂိတုမာတ် ၄ ဂှ် နူကဵုကဝ်မယှေန်ပၞာန် ပွဳပွူဇြဟတ်ၜိုတ် ၄၀၀ ထပ်ထပက်ကရောၚ်ပၞာန်လုပ်ကၠုၚ်လဝ် ပွိုၚ်ဍုၚ်ကျာ်ထဝ်ရ။
ဟိုတ်နူဒပ်ပၞာန်ဗမာ ထပ်ထပက်ကရောၚ်ပၞာန် လုပ်ကၠုၚ်လဝ်တုဲ ပ္ဍဲကွာန်ဂအုံတၟအ်ကေုာံ ကွာန်ပလိုင်တၟအ် ပွိုၚ်ဍုၚ်ကျာ်ထဝ်တံဂှ် ပေါဲဗတိုက်ၜါလပါ် ကတဵုဒှ်လဝ်ရောၚ်။
အပ္ဍဲဂိတုဖေဖဝ်ဝါရဳတုဲကၠုၚ်ဏအ် နကဵုကဝ်မယှေန်ပၞာန် ၜိုတ်ဇြဟတ်ပွဳပွူ ၆၀၀ တံ ထပက်လဝ်ကရောၚ်ပၞာန် ပ္ဍဲပွိုၚ်ဍုၚ် ကျာ်ထဝ်တုဲ ကရောၚ်ပၞာန်တံ စဵုကဵုတ္ၚဲဏအ် ဟွံကလေၚ်တိတ်အာဏီပုဟ်ဂှ် ဂွံတီ နူဂကောံဇြဟတ်ပၠန်ဂတးတံရ။
ဒပ်ပၞာန်ဗမာတံ ထပက်မံၚ်ကရောၚ်ပၞာန်ဂှ် ဒှ်သွက်ဂွံပလေဝ်စလဝ် သွက်ဂွံထပက်ပၞာန်ဇၞော်ဇၞော် ပ္ဍဲပွိုၚ်ဍုၚ်ကျာ်ထဝ်ရောၚ် ညးတာလျိုၚ် ဂကောံပၠန်ဂတးတံ ဟီုရ။
ကရောၚ်ပၞာန်ဗမာတံ ပြဟ်ဟ်ဏံ ဖျေံလဝ်ဒပ် ပ္ဍဲဗဒါဲကွာန် ပလိုင်တၟအ်၊ ကွာန်ခရုဲ၊ ကွာန်ကုန်ပၞဟ်၊ ကွာန်ဝေန်ကာန်တုဲ ပရေၚ်ပၞာန်ၜါလပါ် ဆက်ကြံၚ်မ္ၚိုဟ်မံၚ်ရောၚ် သ္ဂးရ။
ဟိုတ်နူဒပ်ပၞာန်ဗမာ ထပက်ကရောၚ်ပၞာန် ပ္ဍဲပွိုၚ်ဍုၚ်ကျာ်ထဝ်ဂှ်ရ အပ္ဍဲဂအုံကွာန်ဂြိုဟ်ဗြာတ်၊ ဂအုံကွာန်ခရုဲ ကေုာံ ဂအုံကွာန်ဝေန်ကာန် နူ ၁၉ ကွာန် ညးဒေသ ၁၂၀၀၀ ပြၚ် ဒးဂြိပ်ပါဲမံၚ်ဘဲပၞာန်တုဲ စဵုကဵုလၟုဟ် ကလေၚ်စဴဌာန်ဒၞာဲဇကု ဟွံမာန်ဏီပုဟ်။
ပရိုၚ် – သြၚ်လောန်တိုၚ်မ်
Photo – Social Media