မၞိဟ်မၚ်ရာန်မံၚ်
ဘာအၚ်၊ မာတ် ၆။
ပ္ဍဲဍုၚ်ဘာအၚ် တွဵုရးဍုၚ်ကရေၚ်လေဝ် သွက်ဂွံရာန်ကၠေၚ်စက်ဂှ် ဒးဇီုကပိုက်မံၚ်ကဵု တၚ်ခက်ခုဲတုဲ ဟိုတ်နူဆေၚ်တံ စၟတ်ပိုင်ခြာ သွံကဵုတုဲ ကွဳစက်၊ ကွဳလိုန်ဓာတ်ဗွဲမဂၠိုၚ် ဒးပြေၚ်ရေၚ် မၞိဟ် မၚ်ရာန်မံၚ် အခိၚ်အိုတ်ဗွဲမလံလကွေံရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ဟိုတ်နူပဋိပက္ခပၞာန် ဒေသဗၟံက်လဒေါဝ်တုဲ ပ္ဍဲဍုၚ်ဗၟာ သွက်ဂွံရာန် ကၠေၚ်စက်ဂှ် ဒးဇီုကပိုက်မံၚ်ကဵုတၚ်ခက်ခုဲတုဲ ၜိုန်ရကဝ်မယှေန်ပၞာန် ဟီုလဝ် ကၠေၚ်စက်အရန် သွက် ၄၀ တ္ၚဲ သှ်ေမံၚ်ဏီကီုလေဝ် အလုံမွဲကၟိန်ဍုၚ် စဵုကဵုစိုပ်ဂိတုမာတ် ၄ ဂှ် တၚ်ခက်ခုဲ သွက်ဂွံရာန် ကၠေၚ်စက်တံ ဆက်ကတဵုဒှ်မံၚ်ဖိုအ်ရောၚ်။
ဍုၚ်ဇၞော်တွဵုရးကရေၚ် ပ္ဍဲဍုၚ်ဘာအၚ် စနူဂိတုမာတ် ၃ တေံဂှ် ဆေၚ်သွံကၠေၚ်စက်တံ သွံကဵုမံၚ် နကဵုစၟတ်ပိုင်ခြာတုဲ ညးဍုၚ်ကွာန်တံ သွက်ဂွံဂွံကၠေၚ်ဂှ် စနူဂယးပြဟ်မ္ဂး ဒးပြေၚ်ရေၚ်မၞိဟ် မၚ်ရာန်မံၚ် ပ္ဍဲဂတဆေၚ်တံရောၚ် ညးဒေသတံ ဟီုမံၚ်ရ။
ပ္ဍဲဆေၚ်သွံကၠေၚ်စက်ဇၞော်ဇၞော် သွံမံၚ်ဗွဲလုပ်သၞောဝ်တံဂှ် ၜိုန်ရ သွံကဵုမံၚ် အတိုၚ်ၚုဟ်မးခုတ်စၟတ်လဝ်ကီုလေဝ် ဟိုတ်နူကွဳစက်၊ ကွဳလိုန်ဓာတ် ကၠုၚ်ပြေၚ်ရေၚ် မၞိဟ်မၚ်ရာန်မံၚ်တံ ဂၠိုၚ်လောန်အာတုဲ သွက်ကွဳလိုန်ဓာတ်မွဲမမ္ဂး ၅၀၀၀ ဒကေဝ်၊ ကွဳသၠာပိမွဲမ မ္ဂး ၁၀၀၀၀ ဒကေဝ်၊ ကွဳစက် (ကာ) မွဲမမ္ဂး ၃၀၀၀၀ ဒကေဝ်ဟေၚ် သွံကဵုမံၚ်ရောၚ် ညးဒေသမွဲတၠ သ္ဂးရ။
ဆဂး ၚုဟ်ကၠေၚ်စက်သွံမံၚ် ပ္ဍဲဆေၚ်မ္ၚးကဵု ဆေၚ်ဒကဲဂၠံၚ်တံဂှ် ကၠေၚ်စက် ၁ လေတ်မ္ဂး စိုပ်မံၚ် ၇၀၀၀ ဒကေဝ်တုဲ အတိုၚ်ပၟိက်နွံ ရာန်ဂွံမံၚ် ဂၠိုၚ်နူကဵုဆေၚ်ဇၞော်ဇၞော်တံဏီရောၚ် ညးဒေသတံ ဟီုရ။
ပ္ဍဲဍုၚ်ဘာအၚ် ဆေၚ်ကၠေၚ် Denko၊ ချဝ်သု၊ ပါမေဝ်တံၚ်၊ ယတနာမျေ တံနွံတုဲ ဆေၚ်လ္ၚဵုတံဂှ် ဟိုတ်နူကၠေၚ်ဟၟဲဂးတုဲ ကၟာတ်လဝ်ဆေၚ်ရောၚ် ညးဒေသတံ သ္ဂးရ။
တုဲပၠန် အပ္ဍဲကဵု ညးကၠုၚ်ပြေၚ်ရေၚ် မၞိဟ်မၚ်ရာန်ကၠေၚ် ပ္ဍဲဆေၚ်ဇၞော် တံဂှ်တှ်ေ ညးကလေၚ်သွံမ္ၚး ဆေၚ်ဒမၠုတံလေဝ် ပါမံၚ်ဗွဲမဂၠိုၚ်ကီု၊ ညးတံကလေၚ်ဖံက်ပတိတ်ကၠေၚ် နူကွဳစက်၊ ကွဳလိုန်ဓာတ်တံတုဲ ထပ်ပတိုန်ၚုဟ် ကလေၚ်သွံမံၚ်ဆေင်မ္ၚးမ္ၚးတံလေဝ် နွံမံၚ်ရောၚ် ဂွံတီရ။
နကဵုဌာနဝန်ဇၞော် သၟုဟ်ဇြဟတ်ဓါတ် ကဝ်မယှေန်ပၞာန်ဂှ်မ္ဂး ကၠေၚ်စက်တံဂှ် သွံကဵုမံၚ်အတိုၚ်လၟေၚ်ဓမ္မတာရတုဲ ယဝ်ရ ပၟိက်ကိစ္စဟၟဲမ္ဂး ပွမရာန်ပကောံလဝ်တံဂှ် ညံၚ်ဟွံဂွံကၠောန်ဒးအာ ကဵုလဝ်သမ္တီ လလောၚ်တြးလဝ်ရောၚ်။
ပရိုၚ် – သြၚ်လောန်တိုၚ်မ်
Photo – CJ