တနၚ်္သာရဳ၊ ဂိတုမာတ် ၇
ပ္ဍဲရးတနၚ်္သာရဳ ပွိုၚ်ဍုၚ်တနၚ်္သာရဳ ဒပ်ကဝ်မယှေန်ပၞာန် ဖျေံလဝ်ဒပ် ဒၞာဲဘာလကျာ် ကွာန်တြဴတိုၚ် (ခြောက်မိုင်) ဂှ် ဒးဒုၚ်ပန်ဗတိုက် လဝ်တုဲ ညးတာလျိုၚ်မွဲတၠ သီုကောန်ပၞာန်ကဝ်မယှေန်ပၞာန် ပန်တၠ ချိုတ်အာလဝ်ရောၚ် ဂွံတီကေတ် နူတမ်ဒပ် ၂ ခရိုင်ဗိက်ရ။
ပ္ဍဲဂိတုမာတ် ၄ လောန်ကၠုၚ်တေံ အခိၚ်သဝ်တ္ၚဲ ၜိုတ် ၃ နာဍဳဂှ် ဒပ်ပံၚ်ကောံစဵုဒၞာညးဍုၚ်ကွာန်တံ ပန်ဗတိုက်လဝ် ဒပ်ကဝ်မယှေန်ပၞာန် ဇြဟတ် ၆၀ ၜိုတ် ကၠုၚ်ဖျေံလဝ်ဒပ် ပ္ဍဲဘာလကျာ် ကွာန်တြဴတိုၚ်ဂှ်ရောၚ်။
ပေါဲဗတိုက်အကြာၜါလပါ် ဒှ်အာၜိုတ်မွဲနာဍဳတုဲ လပါ်ကဝ်မယှေန်ပၞာန် ညးတာလျိုၚ်မွဲတၠ သီုကောန်ဒပ် ပန်တၠ ချိုတ်အာလဝ် သီဂွံသီုသေဏာတ် ၂ ဇကိုအ်ဂှ် ညးတာလျိုၚ် လလောၚ်ပရိုၚ် တမ်ဒပ် ၂ ခရိုင်ဗိက် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
တုဲပၠန် ပ္ဍဲအကြာပေါဲဗတိုက်ၜါလပါ်ဏံ လပါ်ဒပ်ပံၚ်ကောံ ဒပ်စဵုဒၞာညးဍုၚ်ကွာန်တံ ကောန်ပၞာန် ၃ တၠ ဒးအာဝပ် ဟွံဒးဂွိၚ် သ္ဂးရ။။
ကြဴနူဒှ်ပေါဲဗတိုက်တုဲ ဒပ်ကဝ်မယှေန်ပၞာန် ကလေၚ်ဆုတ်တိတ်အာ နူကွာန်တြဴတိုၚ်ကီုလေဝ် ပ္ဍဲဂိတုမာတ် ၅ ဂှ် အခိၚ်ဒပ်စဵုဒၞာညးဍုၚ်ကွာန်တံ ပသောင်မံၚ်တိဍာ်ဂှ် ကၠုၚ်ဗတိုက်လဝ် နကဵုဒရုၚ်တံပၠန် ဂွံတီရ။
အတိုၚ်ဂကောံဇြဟတ်ပၠန်ဂတးတံ ဟီုလဴမ္ဂး ကွာန်တြဴတိုၚ်ဂှ် ဒှ်ဒၞာဲတိဍာ်ဒပ်ပၠန်ဂတးတံ ပကၚ်ရၚ်လဝ်တုဲ ပြဟ်ဟ်ဏံ ပ္ဍဲကွာန်တြဴတိုၚ်ဂှ် ကောန်ပၞာန်ကဝ်မယှေန်တံ ဟၟဲမံၚ်ရပုဟ် သ္ဂးရ။
ပ္ဍဲဂိတုဖေဖဝ်ဝါရဳ သတ္တဟကၞောတ်အိုတ်တေံလေဝ် ပ္ဍဲပွိုၚ်ဍုၚ်တနၚ်္သာရဳ ကွာန်တမုက်ချုၚ် ဒပ်ကဝ်မယှေန်ပၞာန် ဖျေံလဝ်ဒပ် ကေုာံ ဒပ်ပံၚ်ကောံစဵုဒၞာညးဍုၚ်ကွာန်တံ ဒှ်ပေါဲဗတိုက်ၜိုတ်မွဲသတ္တဟပြၚ်တုဲ သီုၜါလပါ် ဒးဝပ်ချိုတ်အာလဝ် နွံမံၚ်ရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – PDF