မတ်မလီု၊ ဂိတုမာတ် ၇
အတိုၚ်အစဳဇန် ပ္ဍဲတွဵုရးမန် ညံၚ်ဂွံစကာအာကၠေၚ်စက်အောန်န်ဂးတုဲ ဗက်ကဵုဂကူကွဳစက်ယာန်ဂှ် ခုတ်စၟတ်လဝ် ၚုဟ်မးသွံရာန် ကၠေၚ်စက်ရောၚ် နူဌာနပရေၚ်ရပ်စပ်ထိၚ်ကြာပ် ကပေါတ်ကၠေၚ်စက်တွဵုရး လလောၚ်တြးလဝ် ပ္ဍဲဂိတုမာတ် ၄ ဂှ်ရ။
ဆေၚ်သွံကၠေၚ်စက်တံဂှ် ပ္ဍဲမွဲတ္ၚဲမ္ဂး သွက်ကွဳလိုန်မွဲမဂှ် ၅,၀၀၀ ဒကေဝ်၊ သွက်ကွဳသၠာပိဂှ် ၁၀,၀၀၀ ဒကေဝ်၊ သွက်ကွဳစက်သ္ၚိဂှ် ၃၀,၀၀၀ ဒကေဝ်၊ ကွဳစက်ပလံၚ်မၞိဟ်ကဵု ကွဳဖ္ဍိုက်ကပေါတ်တံဂှ် သွက်မွဲကိုတ်ဒကေဝ်၊ သွက်ကွဳစက် ပရဳမီယာမ်ဒဳဇြေလ် ၄၀,၀၀၀ ဒကေဝ် ခုတ်စၟတ်ကဵုလဝ်ၚုဟ်မးရောၚ် လလောၚ်တြးလဝ်ရ။
ပ္ဍဲကဵုသွံကၠေၚ်စက်ပၠန် စနူဂယး ၆ နာဍဳ စဵုကဵုသဝ်တ္ၚဲ ၆ နာဍဳရ ဆေၚ်ကၠေၚ်တံ ဒးသွံကဵုအာတုဲ သွံကဵုစေဝ်စုတ်ကၠေၚ်တံ နကဵုတိုၚ်ကဳတံဂှ် ညိမှညံၚ်ဟွံဂွံကၠောန်လးလးဂှ် ကဵုလဝ်သတိရ။
တုဲပၠန် စနူဂိတုမာတ် ၇ ဂှ်တုဲ ပ္ဍဲတ္ၚဲစောံမ္ဂး သွက်ဂွံသွံကဵုကွဳစက် မဂၞန်စောံ၊ ပ္ဍဲတ္ၚဲမမ္ဂး ကွဳစက်မဂၞန်မတံရ ဆေင်ကၠေၚ်တံ ညံၚ်ဂွံသွံအာဂှ် ကဵုလဝ်စၞောန်ပ္ညုၚ်ရောၚ်။
ယဝ်ရဒးသွံကဵု သွက်ဂွံစကာသုၚ်စောဲ တိုၚ်တာဝါဖုၚ် ကေုာံ ကမၠောန်နာနာတံမ္ဂး နကဵုလိက်ထံက်ဂလာန် သ္ကိုပ်အုပ်ဓုပ် ပွိုၚ်ဍုၚ်တံဟေၚ် ဒးသွံကဵုရောၚ်တုဲ ညံၚ်ဟွံဂွံပတိုန်ၚုဟ်မးဂှ်လေဝ် ကဵုလဝ်သမ္တီရ။
ဆဂး ကွဳစက်ဖ္ဍိုက်ပလံၚ်မၞိဟ်တံ၊ ကွဳစက်လိၚ်စ၊ ကွဳဖ္ဍိုက်ကၠေၚ်စက်၊ ကွဳစကာပ္ဍဲကမၠောန်သိုၚ်ခၞံ၊ ကွဳပလံၚ်ကပေါတ်၊ ကွဳဖ္ဍိုက်မၞိဟ်ယဲ၊ ကွဳနိဗ္ဗာန် ကေုာံ ကွဳသီဟမိက်ဍုၚ်ကွာန်ဂှ် သွက်ဇၟာပ်ပ်တ္ၚဲ ဒးသွံကဵုရောၚ် ကဵုလဝ်စၞောန်ရ။
ဟိုတ်နူပေါဲပၞာန် ပ္ဍဲဒေသအဒေါဝ်လပါ်ဗၟံက်တေံတုဲ ပရေၚ်ပလံၚ်ဗစိုပ်ကၠေၚ်စက်တံ ဒးကၟာတ်ဆိုအ်မံၚ်တုဲ ညံၚ်ကၠေၚ်စက် ဟွံဂွံပိုတ်အာ အပ္ဍဲဍုၚ်ဂှ်ဟေၚ် ဒးဖန်ဖက် ကၠောန်အာရောၚ် လပါ်ကဝ်မယှေန်ပၞာန် တွဵုရး သ္ဂးလဝ်ရ။
ဟိုတ်နူ ခုတ်ပိုင်ခြာသွံမံၚ်ကၠေၚ်စက်ကဵု ကွဳစက်တံတုဲ ညးဍုၚ်ကွာန်တံ ဒှ်ဂဝိၚ် ဂွိၚ်ဖေက်ကၠေၚ်အိုတ်အာဂှ် ဒးမၚ်ပြေၚ်ရေၚ်မၞိဟ်လအ်လအ်တုဲ ဇၟာပ်ဇၟာပ်တ္ၚဲ ဒးပၠံၚ်ရာန်မံၚ်အိုတ်ရောၚ်။
ပရိုၚ် – သြၚ်လောန်တိုၚ်မ်
Photo – Social Media