မတ်မလီု၊ ဂိတုမာတ် ၇
နူကဵုပေါဲရုဲမာဲ ဒပ်ပၞာန်ဗမာဂှ် သွက်ဂွံဒက်ပ္တန် အလဵုအသဳတၟိ တွဵုရးမန်ဂှ် ဒးမၚ်မံၚ်အမိၚ် ဂဥုပ်သ္ကိုပ်ပၞာန်ဇၞော်ရောၚ် ဂွံတီနူဂကောံ ကြပ်ကဵုကဝ်မယှေန်ပၞာန် ကေုာံ ဗော်ပျဳခိုၚ်ဖျိုဝ်တံရ။
ပ္ဍဲဂိတုမာတ် ၂၀ တေံမ္ဂး ကဝ်မယှေန်ပၞာန် သွက်ဂွံကၠောန်ဗဒှ်အာ ကောံဓရီုလၟေၚ်ဍာံ အလန်ပထမ စၠတ်ဓဝ်တွဵုရးမန် အလန်တတိယဂှ် စဳဇန်မံၚ်ရောၚ်။
သွက်ဂွံကော်အာ ကောံဓရီုစၠတ်ဓဝ်မာန်ဂှ် ပ္ဍဲဂိတုမာတ် ၄ တေံလေဝ် ပ္ဍဲဒၞာဲစၠတ်ဓဝ်တွဵုရးမန် ဍုၚ်မတ်မလီုဂှ် ကၠောန်ဗဒှ်လဝ် အခန်ကၞာဆက်မိတ် ညးစၞး (အမာတ်) ဇၞးလဝ်မာဲတံရ။ ဆဂး သွက်ဂွံဒက်ပ္တန် အလဵုအသဳတၟိ တွဵုရးမန်ဂှ် အပ္ဍဲဗော်ပျဳခိုၚ်ဖျိုဝ် တွဵုရးမန်ဂှ်လေဝ် ပရေၚ်သဳကၠဳဟီုဂးညးသ္ကံဟၟဲဏီတုဲ ဒးမၚ်မံၚ်အမိၚ် ဂဥုပ်သ္ကိုပ်ပၞာန်ဇၞော်ဂှ်ဟေၚ် သ္ဂးရ။
ပြဟ်ဟ်ဏံ ဟိုတ်နူအဝဵုနွံမံၚ် ပ္ဍဲသ္ကေံတဲဂဥုပ်သ္ကိုပ်ပၞာန်ဇၞော်တုဲ အတိုၚ်ပၟိက်ညးတေံဟေၚ် ဆက်ဗဂေတ်ဖန်ဖန်အာမံၚ်ဏီရောၚ် အမာတ်တြေံ ပွိုၚ်ဍုၚ်သဓီု ဥူအံၚ်ကျဝ်တူ ပါ်ပါဲဟီုလဝ်ရ။ “မေန်အံၚ်လှိုၚ်ဂှ် ပြဟ်ဟ်ဏံ ကောန်ဗော်ဇၞးလဝ်မာဲလေဝ် ဟွံသေၚ်ပုဟ်၊ ပ္ဍဲအပ္ဍဲဗော်လေဝ် ဟွံသေၚ်။ တုဲပၠန် ဗော်ဏံဂှ်လေဝ် ညးတေံလုပ်ပယှုက်မံၚ်။ ညးတံစကာမံၚ် ဥပဒေဟီုဂှ် ဒှ်မံၚ်ဥပဒေဂြိုပ်အရိုၚ်။ ညးဇြဟတ်ဇၞော်ဂှ် ဂွံစဟေၚ်ရ။ အဝဵုဂှ် နွံမံၚ် ပ္ဍဲညးတေံတုဲ ညးတေံဆက်ဖန်ဖက်အာ အတိုၚ်ကရိုက်စိုတ်ညးတေံဟေၚ်ရ” သ္ဂးရ။
တုဲပၠန် ညးမလုပ်ဒုၚ်ရုဲမာဲ နူကဵုကဝ်မယှေန်ပၞာန်တံကၠောန်ဗဒှ်လဝ်ဂှ် ဒှ်မၞိဟ်ဒုၚ်တဲ ကဝ်မယှေန်ပၞာန်တုဲ မုလေဝ်ကၠောန်ဟွံဂွံ၊ အတိုၚ်ဂဥုပ်သ္ကိုပ်ပၞာန်ဇၞော်ဗဂေတ်ဖန်ဏာဂှ် ဒးဆက်ဒုၚ်အာမံၚ်လၟိုန်ရောၚ် ညး ဆက်ဟီုရ။
ပ္ဍဲဂိတုမာတ် ၄ လောန်ကၠုၚ်ဏံလေဝ် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ကလေၚ်ပြုပြေၚ်ပလေဝ်လဝ် ဥပဒေ ဂကောံအလဵုအသဳရးဒေသကေုာံ တွဵုရးတံရ။
အတိုၚ်ဥပဒေဂှ်မ္ဂး ပ္ဍဲအလဵုအသဳရးဒေသကေုာံ တွဵုရးတံဂှ် ခါန်ကၞက်ပတိုန် ဝန်ဇၞော် နူ ၅ တၠ စဵုကဵု ၁၀ တၠ မာန်တုဲ ဝန်ဇၞော်ဌာနဗဂဵုလဟဵု တွဵုရးဂှ် ဒးခါန်ကၞက်ကဵုတာလျိုၚ်ကု သ္ကိုပ်ဝန်ဍုၚ်ရောၚ် ချူခၞံလဝ်ရောၚ်။
အတိုၚ်လၟေၚ်သွဟ်ပေါဲရုဲမာဲ ဒပ်ပၞာန်ဂှ်မ္ဂး ပ္ဍဲစၠတ်ဓဝ်တွဵုရးမန်ဂှ် ဗော်ပျဳခိုၚ်ဖျိုဝ် ဂွံလဝ်အမာတ် ၁၁ ဒၞာဲတုဲ ဒှ်ညးစၞးဂၠိုၚ်အိုတ်၊ ဗော်ညဳသၟဟ်မန်ဂှ် ဂွံလဝ်အမာတ် ၇ ဒၞာဲတုဲ ဒုတိယညးစၞးဂၠိုၚ်အိုတ် မဒှ်ရ။
တုဲပၠန် ဗော်တစည၊ ဗော်ဖောအ်ဗြဳတဴတက် ကောန်ဂကူပအိုဝ်း၊ ဗော်ညးဍုၚ်ကွာန်၊ ဗော်ပၠတရဴညးဍုၚ်ကွာန် ကေုာံ ဗော်ဇၞော်မောဝ်ဖဵုပိုန်ဒြပ်ကောန်ဂကူတံလေဝ် ဂွံလဝ်အမာတ် ညးမွဲမွဲဒၞာဲကီုရ။
ပ္ဍဲစၠတ်ဓဝ်တွဵုရးမန်ဂတးဏံမ္ဂး နကဵုသၞောတ် FPTP အမာတ်ညးစၞး ၁၀ ဒၞာဲ၊ နကဵုသၞောတ်သ္ပစၞး PR ၁၀ ဒၞာဲ၊ အမာတ်ညးစၞး ကောန်ဂကူနာနာ ၃ ဒၞာဲ ကေုာံ အမာတ်ညးစၞး နူဒပ်ပၞာန် ၈ ဒၞာဲ၊ သီုဖအိုတ် အမာတ်ညးစၞး ၃၁ ဒၞာဲ မၞုံအာရောၚ်။
ပရိုၚ် – သြၚ်လောန်တိုၚ်မ်
Photo – MOI