ပ္ဍဲဂိတုဖေဖဝ်ဝါရဳ ၂၈ မလောန်ကၠုၚ်တေံ ပ္ဍဲကဵုပေါဲဗတိုက် အဳရာန် ကိုပ်ကၠာအိုတ် နကဵုအမေရိကာန် ကေုာံ အေဿရေတံဗတိုက်မံၚ်ဂှ် ညံၚ်ဟွံဂွံပါလုပ်ဂးတုဲ အတိုၚ်ဖျေံလဝ်သ္ဂုတ်သွာတ်ဂှ် ဆက်ဒတူလိုင်အာတုဲ ပွမသဳကၠဳဟီုဂးကေတ်ဂှ် ဒှ်နဲကဲခိုဟ်အိုတ် သွက်ဂွံဆက်အာဂတတေံရောၚ် သ္ဂးရ။
နူကဵုအဂႅလိက် ညံၚ်ဂွံကၠောန်အာမွဲမွဲ ကဵုမံၚ်ဇြဟတ်ဟရိုဟ် ဗီုလဵုနွံနွံ အတိုၚ်ၚုဟ်မးဇကုတံစွံလဝ်၊ သ္ဇိုၚ်မူဇကုတံ သွက်ဂွံတန်တဴအာ ဇြဟတ်နွံမံၚ်ရောၚ် ပ္ဍဲပေါဲသောၚ်ကလးပရိုၚ် မကၠောန်ဗဒှ်လဝ် ပ္ဍဲဂၠံၚ်ဒံၚ်နေၚ်ဂှ် သ္ကိုပ်ဝန်ဇၞော် ဟီုဂးလဝ်ရ။
နဲကဲပ္ညဳပ္ညပ်သဳကၠဳအာကဵု အဳရာန်တံဂှ် ဒှ်နဲကဲခိုဟ်အိုတ် သွက်ဂွံဆက်အာဂတရောၚ်ဒှ်တုဲ ရန်တၟံနျူကလဳယျာ ညးတံဂှ် ဒးထောံကၠေံအာရောၚ် သ္ကိုပ်ဝန်ဇၞော် သတာမာ ဟီုလဝ်ရ။
ဣဏံဂှ် ဒှ်ပရေၚ်ဒတူလိုၚ်အဂႅလိက် လအ်လကၠုၚ်ရတုဲ ညံၚ်ယှအ်ဖျေံဏာအသိၚ်ပေါဲပၞာန်ဂှ် ထေက်ကဵုဒးဂစာန်အာရောၚ် ညးဗပေၚ်ဟီုလဝ်ကီုရ။
ပေါဲပၞာန်အဳရာန်ဂှ် ဒဵုကဵုကာလမွဲတေံ အခိၚ်လအ်လအာမာန်တုဲ ထပ်ဗလးဏာလဝ် ၜၚ်ကျာဗတိုက်ဇဵု Typhoon ၄ မ ဇရေၚ်ဍုၚ်ကာတာပၠန် သတာမာ သ္ဂးရ။
ပ္ဍဲပေါဲဗတိုက်အဳရာန် ကိုပ်ကၠာအိုတ်တေံ ဟိုတ်နူအဂႅလိက် ဟွံကဵုအခေါၚ်သုၚ်စောဲ ဗ္ဒိုပ်ပၞာန်ညးတံဂှ် သမ္မတအမေရိကာန် ဒဝ်နေဝ်ထရ ပါ်ပါဲလဝ် သ္ကိုပ်ဝန်ဇၞော်သတာမာတုဲ ညးတေံဂှ် ဝေန်သတန်ချာချဳ (Winston Churchill) ဟွံသေၚ်ပုဟ် ကလေၚ်ပ္လန်လဝ်ရ။
အတိုၚ်အမေရိကာန် အာတ်မိက်လဝ် သွက်ဂွံကဵုအခေါၚ်သုၚ်စောဲစကာအာ ဗ္ဒိုပ်ပၞာန်အဂႅလိက်တံဂှ် အဂႅလိက် ကဵုလဝ်အခေါၚ်တုဲတုဲကီုလေဝ် သွက်ပရေၚ်စဵုဒၞာရဟေၚ် ဒးသုၚ်စောဲအာရောၚ် သ္ဂးလဝ်ရ။
တၚ်သ္ဂုတ်သွာတ် ကိုပ်ကၠာအိုတ်ဂှ် ဒးဖေက်လကိုတ်ကွေံကွေံ ထရ ဟီုတုဲ ပရေၚ်ဆက်စၠောံ အမေရိကာန်-အဂႅလိက်ဂှ် ညံၚ်ကဵုဗီုကၠာကၠာတေံ ဟွံသေၚ်ရပုဟ် ဟီုရ။
ပရိုၚ်ထံၚ်ပရိုၚ် နူအဂႅလိက်တံဂှ် ပွိုၚ် ၂၄ နာဍဳ ဇၟာပ်တ္ၚဲ တြးကဵုမံၚ် အမေရိကာန်တုဲ ပရေၚ်ဆက်စၠောံ ကဵုအမေရိကာန် တၟေၚ်ခိုဟ်မံၚ်ရောၚ် ဂိတုမာတ် ၅ ဂှ် သတာမာ ဟီုလဴလဝ်ရ။
အဂႅလိက်ဂှ် ၜိုန်ရဂစာန်ကော်ဖျဴမံၚ် ကောန်ဍုၚ်ညးတံ နူကဵုဒေသအဒေါဝ်လပါ်ဗၟံက်တေံကီုလေဝ် ဟိုတ်နူပေါဲပၞာန်အဳရာန် အသိၚ်ထတ်မံၚ်တုဲ လၟေၚ်တရဴကွဳစက်ကျာ အလန်ပထမကၠာအိုတ် ဒးဆုတ်လဝ်ဏီရောၚ်။
သွက်ပေါဲပၞာန်အဳရာန် ဒှ်ကၠုၚ်မာန်ဂှ် အဂႅလိက်တံ ဒစးဒုၚ်ပလေဝ်စလဝ်ဟၟဲပုဟ် ဂလာန်ပွမဟီုဂးမံၚ်တံဂှ် သတာမာ တးပါဲထောံလဝ်ရ။
ကြဴနူ အဳရာန် ဗတိုက်လဝ် ဗ္ဒိုပ်ပၞာန်အဂႅလိက် မၞုံပ္ဍဲပါရုၚ် ကေုာံ သိုက်ဖရာတ် (Cyprus) တံတုဲ သ္ကိုပ်ဝန်ဇၞော် ဒးဒုၚ်ပါ်ပါဲမံၚ်ရောၚ်။
Ref:BBC