ဝါယှေန်တာန်၊ ဂိတုမာတ် ၈
ပ္ဍဲဒေသအဒေါဝ်ဗၟံက် အခိၚ်ပေါဲပၞာန် ဗတိုက်မံၚ်ကဵု အဳရာန် အသိၚ်ထတ်တိုန်မံၚ်ဏံဂှ် သွက်ဂွံသွံကဵု ခၞော်ဗုမ် ၁၂,၀၀၀ ကုအေဿရေ နကဵုအစဳဇန်ကာမံက်တိုန်ဂှ် နူကဵုဌာနဝန်ဇၞော်ပရေၚ်ဍုၚ်သ္အာၚ် အမေရိကာန် ကဵုလဝ်အခေါၚ် ပ္ဍဲဂိတုမာတ် ၇ ဂှ်ရ။
သွက်ဂွံသွံအာခၞော်ဗုမ် လျိုၚ် ၄၅၀ ကဳလိုဂရာမ် ၚုဟ်မးဒဝ်ဠာ ၁၅၁ ဒသမ ၈ ပြကောတိကိုတ်ဂှ် အတိုၚ်မအာတ်မိက်လဝ်တုဲ နူကဵုဗျူရိုပရေၚ်ဍုၚ်ကွာန်ကဵုပရေၚ်ပၞာန် ဌာနဝန်ဇၞော်ပရေၚ်ဍုၚ်သ္အာၚ် ကဵုလဝ်အခေါၚ်ရောၚ် ပ္ဍဲလိက်လလောၚ်တြးမွဲ ချူထမံက်ထ္ၜးလဝ်ရ။
ဟိုတ်နူပရေၚ်သွံကဵုဏာသာ်ဏံဂှ် သွက်အေဿရေမ္ဂး ဇြဟတ်သွက်ဆေဝ်ဒဝ်ဘဲအန္တရာယ် ပြဟ်ဟ်ဏံကီု အနာဂတ်တေံကီု သၠုၚ်တိုန်အာတုဲ သွက်ဂွံစဵုဒၞာဍုၚ်မိတိမဇကု ဇြဟတ်ခိုၚ်ဗိုန်ကၠုၚ်၊ ပရေၚ်ဘပဠ ပ္ဍဲဒေသတံဂှ်လေဝ် ဆေဝ်ဒဝ်အာမာန်ဂၠိုၚ်တိုန်ရောၚ် ပ္ဍဲလိက်လလောၚ်တြး ဌာနဝန်ဇၞော်ပရေၚ်ဍုၚ်သ္အာၚ် အမေရိကာန် ချူလဝ်ရ။
ပ္ဍဲပရေၚ်သွံဏံဂှ် ပါဲနူကဵုခၞော်ဗုမ်တံတုဲ ပရေၚ်ပလံၚ်ဗစိုပ်၊ ပညာအေန်ဂျေန်နဳယာ ကေုာံ နဲကဲပညာအထံက်အပၚ် နူအလဵုအသဳအမေရိကာန်တံလေဝ် ပါလုပ်မံၚ်ရောၚ် ဂွံတီရ။
ပြဟ်ဟ်ဏံမ္ဂး သမ္မတအမေရိကာန် ဒဝ်နေဝ်ထရ ဂှ် သွက်အဳရာန် ညံၚ်ဂွံဖျေံလွဟ်ဟေၚ် ဟၟဲကဵုတၚ်တၞဟ်ခြာ ကဵုလဝ်ရာဇသံ၊ တုဲပၠန် သွက်ဂွံပတိုန်အသိၚ်ဇြဟတ်ပန်ဗွဲမဇၞော်တုဲ ဗတိုက်အာရောၚ် ဟီုလဴလဝ်ရ။
လပါ်အေဿရေလေဝ် ပေါဲပၞာန်အဳရာန်ဂှ် သွက်ဂွံသၠုၚ်ပတိုန်အာကဆံၚ်မွဲပၠန် ဟီုဂးတုဲ ဆက်ဗတိုက်အာမံၚ် သ္ကာတ်တ်မြဟ်ဟ်ရောၚ်။
ကာန်ပဏဳပရေၚ်စဵုဒၞာပၞာန်ဇၞော်ဇၞော် အမေရိကာန်တံဂှ် သွက်ဂွံကၠောန်ပ္တိတ်အာ လွဟ်အဆံၚ်သၠုၚ် ၄ ဆဂှ် တုပ်လဝ်စိုတ်ရောၚ် ဒဝ်နေဝ်ထရ ထမံက်ထ္ၜးလဝ် ပ္ဍဲဇာဖိုၚ်မှာဇန် ပ္ဍဲဂိတုမာတ် ၆ ဂှ်ရ။
အမေရိကာန် ယဝ်ရသွံလွဟ် ကုဍုၚ်မ္ၚးမွဲမွဲမ္ဂး ဒးကေတ်အခေါၚ်နူစၠတ်ဓဝ်ကီုလေဝ် ဝန်ဇၞော်ပရေၚ်ဍုၚ်သ္အာၚ် မာကိုရူဗဳယိုဂှ် ညံၚ်ဟွံဒးကေတ်အခေါၚ်စၠတ်ဓဝ်တုဲ သွံအာဂွံဂှ် ဖန်ဇန်လဝ်ရောၚ်။
ပွမသွံလွဟ်ကာမံက်တိုန်ဗီုတံဏံဂှ် ဒှ်ပွအလဵုအသဳထရ ညးတံ ဖန်ဖက်ကေတ်တ်ရောၚ် အမာတ်စၠတ်ဓဝ်ဒဳမဝ်ကရက် နူကဝ်မယှေန်စၠတ်ဓဝ်ပရေၚ်ဍုၚ်သ္အာၚ် ဂရဳဂဝ်ရဳ မိခ် ဟီုလဴရ။
သွက်ပေါဲပၞာန်ဏံဂှ် ဒစးဒုၚ်ပြေၚ်ဇန်ပလေဝ်လဝ်ပေၚ်ၚ်ရောၚ် အလဵုအသဳထရ ဟီုကၠုၚ်လဝ် ဂၠိုၚ်ကဵုဝါကီုလေဝ် ပွမကၠောန်အာ အကာဲအရာကာမံက်တိုန်ဗီုဏံဂှ် လဟီုကဵုကမၠောန် ဒှ်မံၚ်တၞဟ်ခြာရောၚ် ညးဗပေၚ်ဟီုလဝ်ရ။
Ref:AFP