ဘာအၚ်၊ ဂိတုမာတ် ၈
ပ္ဍဲတွဵုရးကရေၚ် လ္တူဍုၚ်ဘာအၚ် စနူဂိတုမာတ် ၇ တုဲ ပ္ဍဲဆေၚ်ကၠေၚ်စက်ဇၞော်ဇၞော်တံဂှ် ကွဳစက်ကဵု ကွဳလိုန်ဓါတ် လာၚ်ဇြေန် ဟၟဲလ္ၚဵု ကၠုၚ်စုတ်ကၠေၚ်စက်တံဂှ် ဒပ်ဗၠာဲသၟိၚ်ကေုာံ ဒပ်ဗၠာဲသၟိၚ် ထိၚ်ကွဳစက်ယာန်(မော်တော်ပီကယ်) သၟဝ်ကဝ်မယှေန်ပၞာန်တံ ရပ်သီကေတ်ထောံလဝ်ရောၚ် ဂွံတီနူညးဒေသတံရ။
ဟိုတ်နူပရေၚ်ပဋိပက္ခ ဒေသအဒေါဝ်လပါ်ဗၟံက်တုဲ အခိၚ် ဒးဇီုကပိုက်မံၚ်ကဵု တၚ်ဝါတ်ဂါတ်ကၠေၚ်စက်ဏံဂှ် သွက်ဂွံစကာအာ ကၠေၚ်စက်အောန်န် ကေုာံ ညံၚ်ဂွံရုမ်ဂပ်ဂးတုဲ စနူဂိတုမာတ် ၇ ဂှ် အလုံမွဲဍုၚ် နကဵုသၞောတ်တ္ၚဲ “စောံ” ကဵု တ္ၚဲ “မ” ဟေၚ် ညံၚ်ဂွံဒဳ ကွဳစက်ကာတံဂှ် နူကဝ်မယှေန်ပၞာန် လလောၚ်တြးလဝ်ရောၚ်။
ဟိုတ်ဂှ်ရ ပ္ဍဲဍုၚ်ဘာအၚ် တွဵုရးကရေၚ်လေဝ် ကွဳစက်ကၠုၚ်ရာန်မံၚ် ပ္ဍဲဆေၚ်ကၠေၚ်စက် အတိုၚ်သၞောတ် စောံမတံဂှ် ဂကောံသၟဝ်တဲ ကဝ်မယှေန်ပၞာန်တံ မၚ်မွဲစၟဳစၟတ်မံၚ်တုဲ ကွဳစက်လ္ၚဵု ဟၟဲကဵုလာၚ်ဇြေန် ကၠုၚ်စုတ်ကၠေၚ်တံဂှ် နူကဵုဒပ်ဗၠာဲသၟိၚ်ထိၚ်ကွဳစက်ယာန်တံ ရပ်သီကေတ်မံၚ်ရောၚ် ညးဒေသတံ သ္ဂးရ။
တုဲပၠန် ပ္ဍဲဆေၚ်ကၠေၚ်စက်တံမ္ဂး သွက်ကွဳစက်လာၚ်ဇြေန်ဟၟဲတံဂှ် ဆက်သွံကဵုကၠေၚ်စက်ဟွံသေၚ်၊ ယဝ်ရ စၟဳစၟတ်ဆဵုညာတ်အာ ကွဳစက် လာၚ်ဇြေန်ဟၟဲမ္ဂး အတိုၚ်သၞောဝ်ဥပဒေ ရပ်စပ်အာတုဲ သွက်ကွဳစက် မၞုံကဵုလာၚ်ဇြေန်တံမ္ဂး ဒးထ္ၜးဝှဳတက်တုဲမှ ရာန်ကေတ်ကၠေၚ်စက်ဂွံ ရောၚ် ပ္ဍဲဂတမုက်ဆေၚ်ကၠေၚ်တံဂှ် ဗာန်စွံလဝ် လိက်ဂတဵုမုက် ကဵုသတိတံရ။
ပ္ဍဲဍုၚ်ဘာအၚ်ဝွံ ညးဒေသတံကြပ်ဖအိုတ် သီုကဵုသၞာဲဒါဌာန ဗွဲမဂၠိုၚ် တံဂှ် သုၚ်စောဲစကာမံၚ် ကွဳစက်လာၚ်ဇြေန်ဟၟဲတုဲ ဟိုတ်နူ ဆေၚ်ကၠေၚ်တံ ဟွံသွံကဵုကၠေၚ်စက်ကု ကွဳစက်လာၚ်ဇြေန်ဟၟဲ တံဂှ်ကီု၊ ဟိုတ်နူသၞောတ်စောံမ ကဝ်မယှေန်ပၞာန် ခုတ်စၟတ်လဝ် ကီုတုဲ ညးဒေသတံကီု သီုကဵုသၞာဲဒါဌာနတံလေဝ် ဒးဇီုကပိုက်မံၚ်ကဵု တၚ်ဝါတ်ဂါတ်တုဲ သၞာဲဒါဌာနလ္ၚဵုလ္ၚဵုတံဂှ် ဒးဍိုက်ကွဳလိုန်တုဲ တိုန်မံၚ်ရုၚ်အိုတ်ရောၚ် ဂွံတီရ။
စပ်ကဵုပရေၚ်ပလံၚ်ဒုၚ်ကောန်ၚာ်အာဘာ၊ ပရေၚ်ထတ်ယုက် အာထ္ၜးဂဥုဲ၊ ပရေၚ်မၞိဟ်ချိုတ်ဂျိုၚ် ပရေၚ်ပိုန်ဒြပ် ကိစ္စနာနာ သွက်ဂွံအာကၠုၚ် ချဳဒရာၚ်ဂှ် ညးဒေသတံ ဒးဇီုကပိုက်မံၚ်ကဵု အခက်အခုဲ ဗွဲမဂၠိုၚ်ရောၚ် ဂွံတီနူညးဒေသတံရ။
ဟိုတ်နူကဝ်မယှေန်ပၞာန် ခုတ်စၟတ်လဝ်ဗီုဏံတုဲ ပ္ဍဲဍုၚ်ဘာအၚ် သွက်ဂွံရာန်ကၠေၚ်စက် ဂွံမာန်ဂှ်မ္ဂး ဒးဗ္ဒဗ္ဒါဲရာန်မံၚ် ပ္ဍဲဆေၚ်ကၠေၚ် ဖျာဒမၠု ဟွံလုပ်သၞောဝ်တံဂၠိုၚ်တုဲ ကၠေၚ်မွဲလေတ်မ္ဂး ဒးကဵုမံၚ် လ္တူ ၁၀,၀၀၀ ဒကေဝ်ပြၚ် ပဵုနူၚုဟ်ခုတ်စၟတ်လဝ်ရောၚ် ညးဒေသတံ သ္ဂးရ။
ပါဲနူၚုဟ်ကၠေၚ်စက်ဖျာဒမၠုတုဲ ၚုဟ်လိၚ်ကွဳစက်၊ ၚုဟ်လိၚ် ကွဳလိုန်ဓါတ်ကဵု ၚုဟ်ကပေါတ်နာနာ လ္ၚဵုတံလေဝ် ၚုဟ်သၠုၚ်တိုန် မံၚ်ရောၚ် ဂွံတီနူညးဒေသတံရ။
ပရိုၚ် – သြၚ်လောန်တိုၚ်မ်
Photo – CJ