မတ်မလီု၊ ဂိတုမာတ် ၈
ဟိုတ်နူပေါဲဗတိုက်ကဵု အကာဲအရာပရေၚ်ဂီုကၠီုတံတုဲ ပ္ဍဲပွိုၚ်ဍုၚ် ၜဳကလေၚ်ကေုာံ ပွိုၚ်ဍုၚ်ကျာ်ထဝ် တွဵုရးမန်ဂှ် လၟိဟ်ညးဂြိပ် ပါဲဘဲပၞာန် ကြပ် ၁၃,၀၀၀ နွံမံၚ်ရောၚ် ဂကောံသုတေသန RICE ပတိတ်လဝ်လိက်ဒုၚ်စဳရေၚ် ပ္ဍဲဂိတုမာတ် ၅ ချူထမံက်လဝ်ရ။
ပရေၚ်ပဋိပက္ခပၞာန်၊ ပေါဲဗတိုက်ကဵု အကာဲအရာညးဍုၚ်ကွာန် ဒးဒုၚ်ဘဲဝပ်ချိုတ်လဝ် ဒၞာဲဒေသလပါ်သၠုၚ်ကျာ ဍုၚ်ဗၟာ ပ္ဍဲဂိတုဖေဖဝ်ဝါရဳ လောန်ကၠုၚ်တေံဂှ် နူဂကောံ RICE ပ္တိတ်ကၠုၚ် လိက်ဒုၚ်စဳရေၚ် တၚ်နၚ်ပရေၚ်ပဋိပက္ခပၞာန် ဇၟာပ်ဂိတုရောၚ်။
ပ္ဍဲလိက်ဒုၚ်စဳရေၚ်ဂှ်မ္ဂး ပရောဒဒှ် ပရေၚ်တွဵုရးမန်ကီု ပ္ဍဲတွဵုရးကရေၚ် ပွိုၚ်ဍုၚ်ဘာအၚ်၊ ကအ်ကြိက်ကေုာံ လှာဒကှ်တံကီု သီုကဵုပရူဒဒှ် ပွိုၚ်ဍုၚ်ဍာ်ဗု ရးတနၚ်သဳလေဝ် ထမံက်စုတ်လဝ်ကီုရ။
အတိုၚ်လိက်ဒုၚ်စဳရေၚ်ဂှ်မ္ဂး ပ္ဍဲဒေသတံဏံ လၟိဟ်ညးဂြိပ်ပါဲဘဲပၞာန် သီုဖအိုတ် ၁၄,၀၀၀ ပြၚ်နွံမံၚ်တုဲ ပ္ဍဲပွိုၚ်ဍုၚ်ၜဳကလေၚ်ဂှ် ၆,၈၉၀ ပြၚ် ဂၠိုၚ်အိုတ်ဒှ်တုဲ၊ ပ္ဍဲပွိုၚ်ဍုၚ်ကျာ်ထဝ် ၆,၀၃၀ ပြၚ်ကေုာံ ပ္ဍဲပွိုၚ်ဍုၚ်ဍာ်ဗုဂှ် ၜိုတ် ၁,၅၀၀ နွံမံၚ်ရောၚ် ထမံက်ထ္ၜးလဝ်ရ။
မွဲလပါ်ဂှ်လေဝ် သီုကဵုပန်လွဟ်ဇၞော်၊ ဗတိုက်လဝ်ပၞာန်ကျာကေုာံ ဒရုၚ် ၁၄ ဝါ၊ ဒှ်လဝ်ပေါဲဗတိုက် ၁၅ ဝါတုဲ ပ္ဍဲပွိုၚ်ဍုၚ်ကျာ်ထဝ်၊ ရေဝ် ဍာ်ဗုတံဂှ် ညးဍုၚ်ကွာန် ၇ တၠ ချိုတ်အာတုဲ ညးဒးဘဲဝပ် ၆ တၠ နွံရောၚ်။
တုဲပၠန် ဟိုတ်နူအကာဲအရာပရေၚ်ပဋိပက္ခပၞာန် မက္တဵုဒှ်လဝ် ပ္ဍဲတွဵုရးမန် ဒေသလပါ်သၠုၚ်ကျာတံဂှ်တုဲ သ္ၚိဌာန် ကေုာံ ကပေါတ်ပိုန်ဒြပ် ညးဍုၚ်ကွာန်တံ ဗွဲမဂၠိုၚ် ဒးဆောံလေၚ်အာလဝ် နွံရောၚ် ပ္ဍဲတၚ်နၚ်လိက်ဒုၚ်စဳရေၚ် RICE ထမံက်ထ္ၜးလဝ်ရောၚ်။
ဟိုတ်နူ ပၞာန်ကျာဗတိုက်လဝ်ကီု ဒပ်ပၞာန်ဗမာတံ စံၚ်လဝ်သ္ၚိကီု ဖံက်သ္ၚိလုပ်ကၠတ်ဂၠံက်ကေတ်လဝ်ကပေါတ်ဂှ်တုဲ သ္ၚိ ၆၀ မ ဒးဒုၚ်စံၚ်ပလီု ပၟတ်တူအာတုဲ ဟိုတ်နူ ဗတိုက်ကဵုပၞာန်ကျာဗတိုက်ဂှ်ရ သ္ၚိ ၄ မ ဒးဆောံလေၚ်အာလဝ် နွံရ။
ဗွဲတၟေၚ် ပ္ဍဲပွိုၚ်ဍုၚ်ဍာ်ဗုသ္ၚိ ၅၈ မ ဒးဒုၚ်စံၚ်ပလီုထောံလဝ် ဂၠိုၚ်အိုတ်တုဲ ပ္ဍဲပွိုၚ်ဍုၚ်ၜဳကလေၚ်ကဵု ဘာအၚ်ဂှ်လေဝ် ပါဲနူသ္ၚိဌာန်တုဲ ကွဳလိုန်ဓါတ်၊ ဖုၚ်၊ သြန် ကေုာံကွဳစက်ယာန်တံလေဝ် ဒးဒုၚ်ရပ်သီကေတ် ပလီုလဝ် နကဵုအတေၚ်အဓ္ဓမရောၚ် RICE သ္ဂးလဝ်ရ။
ပ္ဍဲကဵုရပ်လဝ်ညးဍုၚ်ကွာန်ဂှ်မ္ဂး ပ္ဍဲပွိုၚ်ဍုၚ်ဍာ်ဗု၊ သဓီု၊ ကျာ်ထဝ်ကေုာံ ၜဳကလေၚ် သီုဖအိုတ် ၇၆ တၠနွံတုဲ ကၟာတ်ဆိုအ်မံၚ် ပ္ဍဲအကြာ ပေါဲဗတိုက်ဂှ် နဒဒှ်ဂဒံၚ်မၞိဟ် ဒးဒုၚ်ရပ်ဏာကီု သီုကဵုဒးဒုၚ်ရပ် အတေၚ်အဓ္ဓမ သွက်ဂွံယိုက်ဝန်ပၞာန် နကဵုနဲကဲ ၂ သာ်ဏံ ဒပ်ပၞာန်ဗမာ ရပ်မံၚ်ညးဍုၚ်ကွာန်တံ အဓိကရောၚ်။
အတိုၚ်တၚ်နၚ် RICE ဂှ်မ္ဂး ညးဒးဒုၚ်ရပ်အတေၚ်အဓ္ဓမ သွက်ဂွံယိုက်ဝန်ပၞာန် သၟတ်ဗၠာဲ ၄၃ တၠကေုာံ ညးဒးဒုၚ်ရပ် နဒဒှ်ဂဒံၚ်မၞိဟ် ပ္ဍဲအကြာပေါဲဗတိုက် မၞိဟ်တြုံ၊ မၞိဟ်ဗြဴ ၃၀ တၠ သီုကဵု ညးဒးဒုၚ်ရပ်လဝ် နကဵုဟိုတ်နာနာ ၃ တၠလေဝ် နွံမံၚ်ကီုရောၚ် ပ္ဍဲဒုၚ်စဳရေၚ် ချူထမံက်ထ္ၜးလဝ်ရ။
ပရိုၚ် – သြၚ်လောန်တိုၚ်မ်
Photo – Social Media