မတ်မလီု၊ ဂိတုမာတ် ၈
ပ္ဍဲတွဵုရးမန် ကဝ်မယှေန်ပၞာန်သီအဝဵု ထ္ၜးဟိုတ် ညံၚ်ဂွံစကာအာ ကၠေၚ်စက်အောန်န်ဂးတုဲ လ္တူကွဳစက်အာကၠုၚ်မံၚ်တံ ပၠုပ်လမျီုမဂၞန် စောံ၊ မ လုပ်ကၠုၚ်ဂှ် ပရေၚ်စၟဳစၟတ်ဂၠိုၚ်တိုန်မံၚ်ရောၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဟိုတ်နူပေါဲပၞာန်အဳရာန်တုဲ တရဴဂၠံၚ် ၜၚ်ဖ္ဍိုက်ကၠေၚ်တံ ဒးဒုၚ် ကၟာတ်ဆိုအ်မံၚ်ဂှ် ကၠေၚ်စက်သွက်ဂွံရုမ်ဂပ် ညံၚ်ဂွံစကာအာ အောန်န်ဂးတုဲ စနူဂိတုမာတ် ၇ ဂှ် ကဝ်မယှေန်ပၞာန် ဖန်ဇန် ကၠောန်ကၠုၚ် သၞောတ်မဂၞန် စောံ၊ မ ဏံရောၚ်။
အတိုၚ်သၞောတ်စောံ၊ မ ကဝ်မယှေန်ပၞာန်ဂှ်မ္ဂး သွက်ကွဳစက်ပူဂဵုတံ ပ္ဍဲတ္ၚဲစောံမ္ဂး ကွဳစက်မဂၞန်စောံဟေၚ် ဒဳလ္တူဂၠံၚ်ဂွံတုဲ ပ္ဍဲတ္ၚဲမ မ္ဂး ကွဳစက်ဂၞန်မ တံဟေၚ် ဒဳတိတ်ဂၠံၚ်ဂွံ မဒှ်ရ။
ပ္ဍဲအကြာဒေသတံဏံ ကိုပ်ကၠာတေံမ္ဂး ဆၜိုတ်စၟဳစၟတ်မံၚ် လာၚ်ဇြေန်ကွဳ၊ လာၚ်ဇြေန်မၞိဟ်ဒဳ၊ မဂၞန်၊ ဒ္ၚောဝ် ကေုာံ ကထုပ်တံသၟး ရတုဲ ပြဟ်ဟ်ဏံ ကြဴနူကဵု သၞောတ်စောံ၊ မ လမျီုလုပ်ကၠုၚ်တုဲ ပရေၚ် မဂၞန်စောံ၊ မ တံဂှ်လေဝ် စၟဳစၟတ်ဂၠိုၚ်တိုန်ပၠန် ဂွံတီရ။
ဟိုတ်နူသၞောတ်စောံ၊ မ ဏံဂှ် လ္တူဂၠံၚ် ပရေၚ်အာကၠုၚ်အောန်စှ်ေ အာတုဲ အစဳဇန်ဏံဂှ် ဖန်လဝ်ကဵုပၞော် သွက်ကောန်ရဲသၟဝ်တဲညးတံ သွက်ဂွံဂၠာဲဂွံစရောၚ် ညးဒေသတွဵုရးမန်မွဲတၠ ပါ်ပါဲဟီုလဝ်ရ။။
“တ္ၚဲဏံစရပ်မံၚ်ဂးဟဂှ် အတိုၚ်ဍေံတံကၠောန်မံၚ် ရပ်ဏောၚ် စၟဳစၟတ်ဏောၚ် သီဏောၚ်ဟီုဂှ် ဒၞာဲဍေံတံကၠောန်မံၚ်လၟိုန်ဂှ်ရ ကၠောန်မံၚ်။ လၟုဟ်ဂှ်မ္ဂး ဂကောံလတက်ပလောအ်အရံၚ်ဍီု ဂကောံပရေၚ်ၜိုဟ်သြိုဟ်ကဵု မုပရေၚ်ဂီုကၠီုရောဟွံတီ ပ္ဍဲကဵုအကြာဍုၚ်ကွာန် ကဵုလဝ်သြန်ဂိတုတုဲ ခါန်ကၞက်စုတ်လဝ် ၝတံဏံလေဝ်။ လၟုဟ်ဏံ ပ္ဍဲကဵုပရေၚ်ရပ်မံၚ်တံဏံဂှ် ၝတံဏံပါမံၚ်ကီု။ ဣဏံဂှ် ဖံက်လဝ်ကဵုပၞော်စ သွက်ၝတံဏံရောၚ်” သာ်ဝွံ သ္ဂးရ။
တုဲပၠန် လ္တူပရေၚ်ကွဳစက်ယာန်အာကၠုၚ်မံၚ် သၞောတ်စောံ၊ မ ဏံဂှ် ၜိုန်ရ ခုတ်စွံလဝ်အခိၚ်ကာလ ကဵုပညာကီုလေဝ် ဂကောံသၟဝ်တဲ ကဝ်မယှေန်ပၞာန်လ္ၚဵုတံဂှ် လ္တူမၞိဟ်ဟွံတီဟွံကၠိုဟ်တံဂှ် ဘပဠ ဓရတ်ပယျာတ် အာတ်မံၚ်သြန်လေဝ်နွံမံၚ်ကီုရောၚ် ညးဆက်ဟီုရ။
ဟိုတ်နူသၞောတ်စောံ၊ မ လမျီုလုပ်အာတုဲ စနူအာကၠုၚ်ကမၠောန်တံဂှ် ဒှ်တိုန်တၚ်ဝါတ်ဂါတ်တုဲ ပရေၚ်အာတရဴတံလေဝ် ဒးမၚ် အခိၚ်လအ်လကၠုၚ်မံၚ်ရောၚ် ညးဒေသတွဵုရးမန် မွဲတၠပၠန် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ညးလ္ၚဵုတံ အာကမၠောန်တံ မုတံ ဒှ်ကၠုၚ်မံၚ် တၚ်ဝါတ်ဂါတ်ကၠုၚ်မာန်။ ညးအာဒၞာဲကြပ်ပ်တံဂှ် အခက်အခုဲဟၟဲကီုလေဝ် ညးအာဒၞာဲဇမ္ၚောဲဥပမာ မၞိဟ်ဒးအာ မွဲတိုၚ် ၜါတိုၚ်တံဂှ် ဒှ်ကၠုၚ်ဒဒိုက်ရ။ လၟုဟ်ပိုဲအာတရဴ ယဝ်ရဒးကလေၚ်စဴတွဵုရးမန်မ္ဂး ဒးတိက်မွဲဗ္တံ ဒးမၚ်မွဲတ္ၚဲ အကာဲအရာ ဒှ်မံၚ်ဗီုဏံရောၚ်” သာ်ဝွံ သ္ဂးရ။
မွဲလပါ်တေံလေဝ် ကဝ်မယှေန်ပၞာန် တွဵုရးမန်ဂှ် သွက်ဂွံစကာ ကၠေၚ်စက်အောန်န်ဂးတုဲ ကွဳလိုန်ဓါတ်မွဲမဂှ် အကွက် ၅,၀၀၀ ဒကေဝ်၊ ကွဳသၠာပိ/အိုဝ်ဝေဂှ် ၁၀,၀၀၀ ဒကေဝ်၊ ကွဳစက်သ္ၚိဂှ် ၃၀,၀၀၀ ဒကေဝ်၊ ကွဳစက်ပလံၚ်မၞိဟ်ကဵု ဖ္ဍိုက်ကပေါတ်တံဂှ် အကွက် မွဲကိုတ်ဒကေဝ်၊ ကွဳပရဳမီယာမ်ဒဳဇြေလ်ဂှ် အကွက် ၄၀,၀၀၀ ဒကေဝ်ဟေၚ် ညံၚ်ဂွံသွံကဵုအာဂှ် ကဵုလဝ်စၞောန်ပ္ညုၚ်ရောၚ်။
ပ္ဍဲအရာသွံကၠေၚ်စက်မ္ဂး ဆေၚ်သွံကၠေၚ်စက်တံဂှ် စနူအခိၚ်နူဂယး ၆ နာဍဳ စဵုကဵုသဝ်တ္ၚဲ ၆ နာဍဳဟေၚ် ဒးသွံအာရောၚ်တုဲ သွံကဵုစေဝ်၊ ကဵုတိုၚ်ကဳပေပါတံဂှ် ညိမှညံၚ်ဟွံဂွံကၠောန်လးလးဂှ် ကဵုလဝ်သတိရ။
တုဲပၠန် စနူဂိတုမာတ် ၇ တုဲ ဆေၚ်ကၠေၚ်တံဂှ် ပ္ဍဲတ္ၚဲစောံမ္ဂး သွက်ကွဳစက် မဂၞန်စောံ၊ ပ္ဍဲတ္ၚဲမမ္ဂး သွက်ကွဳစက်မဂၞန်မတံဟေၚ် ညံၚ်ဂွံသွံအာဂှ် စၞောန်ပ္ညုၚ်လဝ်ရောၚ်။
ပရိုၚ် – သြၚ်လောန်တိုၚ်မ်
Photo – MOI