သိုလ်၊ ဂိတုမာတ် ၁၀
ပ္ဍဲအခိၚ်ပေါဲပၞာန် အဳရာန် မက္တဵုဒှ်မံၚ် ပ္ဍဲဒေသအဒေါဝ်လပါ်ဗၟံက်ဂှ် အမေရိကာန်ကဵု ကိုဝ်ရဳယာသၠုၚ်ကျာတံ ပ္ဍဲဂိတုမာတ် ၉ ဂှ် စပ္တမ်ကၠောန်ခန်လ္ၚတ် ပရေၚ်ပံၚ်တောဲပၞာန်ဇၞော်ဇၞော် ရ။
ခန်လ္ၚတ်ပရေၚ်ပံၚ်တောဲပၞာန်ၜါဍုၚ်ဏံဂှ် ကၠောန်ဗဒှ်အာ စဵုကဵုဂိတုမာတ် ၁၉ တုဲ ကောန်ပၞာန် ကိုဝ်ရဳယာသၠုၚ်ကျာတံ ၁၈,၀၀၀ တၠ ပါလုပ်အာရောၚ် သာ်ဝွံ ရုၚ်သ္ကိုပ်ပၞာန်ကိုရိယျာသၠုၚ်ကျာ ဟီုလဴရ။
လၟိဟ်ကောန်ပၞာန်အမေရိကာန် မပါလုပ် ပ္ဍဲခန်လ္ၚတ်ပရေၚ်ပံၚ်တောဲပၞာန် ကိုဝ်ရဳယာသၠုၚ်ကျာဏံဂှ် နူကဵုဒပ်ပၞာန်အမေရိကာန်န် မၞုံပ္ဍဲကိုဝ်ရဳယာသၠုၚ်ကျာတံ ဟွံသ္ပဒတန်ဟီုလဴလဝ်ဏီပုဟ်။
သွက်ဂွံသုၚ်စောဲအာ သွက်ပေါဲပၞာန်အဳရာန် ဒဒှ်ရဒပ်ပၞာန်အမေရိကာန် ပြံၚ်လှာဲပဆုဲဏာလဝ် ကပေါတ်ပၞာန်လ္ၚဵု နူကဵုကိုဝ်ရဳယာသၠုၚ်ကျာဂှ် ကြဴနူပရိုၚ်တိတ်ကၠုၚ်လဝ် နူကဵုမဳဒဳယာကိုဝ်ရဳယာသၠုၚ်ကျာတုဲ ပရေၚ်ခန်လ္ၚတ်ပၞာန်ပံၚ်တောဲဏံ မံက်တိုန်ကၠုၚ် မဒှ်ရ။
ဆေၚ်စပ်ကဵု အကာဲအရာချဳဓရာၚ်ဒပ်ပၞာန်လ္ၚဵုတံဂှ် ဟိုတ်နူဒှ်ဂဝိၚ်ပရေၚ်ဂီုကၠီုတုဲ ဟွံထမံက်ဟီုလဴပုဟ် သာ်ဝွံ ဒပ်ပၞာန်အမေရိကာန် မၞုံပ္ဍဲကိုဝ်ရဳယာသၠုၚ်ကျာ ဟီုလဝ် ပ္ဍဲသတ္တဟ မတုဲကၠုၚ်တေံရ။
ပရိုၚ်အမေရိကာန် ပြံၚ်လှာဲပဆုဲကေတ်ဏာလဝ် သၞောတ်စဵုဒၞာကမ်သၠောဝ် Patriot ကေုာံ လွဟ်ပၞာန်တၞဟ်တံ သွက်ဂွံသုၚ်စောဲ ပ္ဍဲပေါဲပၞာန်အဳရာန်ဂှ် ညးတာလျိုၚ်ကိုဝ်ရဳယာသၠုၚ်ကျာတံလေဝ် မုလေဝ်ဟွံဟီုဂးရ။
ပရေၚ်ခန်လ္ၚတ်ပၞာန်ပံၚ်တောဲၜါဍုၚ်ဏံဂှ် ရန်တၟံလဝ် သွက်ပရေၚ်စဵုဒၞာဟေၚ်ရောၚ် အမေရိကာန် ကေုာံ ကိုရဳယာသၠုၚ်ကျာတံ ဟီုရ။
ကြဴနူ သမ္မတအမေရိကန် ဒဝ်နေဝ်ထရ ကေုာံ က္ဍိုပ်သ္ကိုပ်ကိုဝ်ရဳယာသၟဝ်ကျာ ကေန်ဂျုၚ်အာန်တံ ဆဵုဂဗသဳကၠဳ ပ္ဍဲသၞာံ ၂၀၁၉ ဟွံအံၚ်ဇၞးတုဲ ကိုဝ်ရဳယာသၟဝ်ကျာဂှ် ဒေါအ်ထောံလဝ် ပရေၚ်သဳကၠဳ သီုကဵုအမေရိကန် ကေုာံ ကိုဝ်ရဳယာသၠုၚ်ကျာတံ သီုဖအိုတ်ရ။
နူပေါဲပၞာန်ယူခရုၚ်-ရတ်ယှာဒှ်မံၚ်ဂှ် ကေန်ဂျုၚ်အာန် ကေတ်အခေါၚ်ခိုဟ် ကၠောန်ပ္တိတ်မံၚ်လွဟ်ဂၠိုၚ်တိုန်တုဲ ပ္ဍဲၚာၚ်ၜဳကိုဝ်ရဳယာဂှ် ပရေၚ်ကြံၚ်မ္ၚိုဟ်တံ သၠုၚ်တိုန်မံၚ်ရ။
ပွမခန်လ္ၚတ်ပၞာန်ပံၚ်တောဲ ကဵုလဝ်ယၟု “ဂဒံၚ်ဗၠးၜး” ဏံဂှ် ဒှ်လဝေၚ်ပၞာန်ပံၚ်တောဲ လၟေၚ်သၞာံၜါဂကူ အကြာ အမေရိကာန်ကဵု ကိုဝ်ရဳယာသၠုၚ်ကျာတံၜါဍုၚ်ဂှ် ဒှ်လဝေၚ်ပၞာန် မွဲဂကူ မဒှ်ရ။
Ref:AP