ကျံက်ကျဳ၊ ဂိတုမာတ် ၁၀
ပ္ဍဲပွိုၚ်ဍုၚ်ကျံက်ကျဳ ခရိုၚ်ညံၚ်လေဝ်ပေန်ဂှ် ညးဍုၚ်ကွာန် ကြပ် ၃၀ တၠ ဒးဒုၚ်ရပ်လဝ် နဒဒှ်ဂဒံၚ်မၞိဟ်တံဂှ် ကရောၚ်ပၞာန်ဗမာတံ ဂစိုတ်ထောံလဝ်ရောၚ် ဗော်သွးကောန်ဂကူကရေၚ် KNU ဗဟဵု လလောၚ်တြးလဝ်ပရိုၚ် ပ္ဍဲဂိတုမာတ် ၉ ရ။
လောန်ကၠုၚ်ဂိတုမာတ် ၅ တေံ ကရောၚ်ပၞာန်ပံၚ်ကောံ ဒပ်ပၞာန်ဗမာ ခမရ ၂၀၊ ခလရ ၂၆၄ ကေုာံ ခမရ ၄၃၉ တံ လုပ်ကၠုၚ်ပ္ဍဲပွိုၚ်ဍုၚ်ကျံက်ကျဳဂှ် ပရူပရာဟိုတ်ဖဵုနာနာဟၟဲမွဲသာ် ရပ်ဏာညးဍုၚ်ကွာန် နူဂအုံကွာန်ယေတွောန်ကုၚ် ကြပ် ၁၆၀ တၠတံရောၚ် ပ္ဍဲလိက်လလောၚ်တြး ချူထမံက်ထ္ၜးလဝ်ရောၚ်။
အကြာဒပ်ပၞာန်ဗမာ ကေုာံ ဒပ်ပၞာန်ဗၠးၜးကောန်ဂကူကရေၚ် KNLA တံ ဒှ်ပေါဲဗတိုက် ပ္ဍဲဂိတုမာတ် ၇ ဂှ် ဟိုတ်နူဒပ်ပၞာန်ဗမာတံ သုၚ်စောဲဒရုၚ်၊ ၜၚ်ကျာပၞာန်ဂျက်ဖိုက်တာတုဲ ကြဳလဝ်ဗုမ် ပ္ဍဲဂအုံကွာန်ယေတွောန်ကုၚ်ဂှ်ရ ညးဍုၚ်ကွာန်ဒးဒုၚ်ရပ်လဝ် ၂၅ တၠတံ ဒးချိုတ်အာလဝ်ရောၚ် ဗဟဵု KNU သ္ဂးရ။
ပါဲနူဂှ် ညးဍုၚ်ကွာန် ၅ တၠပၠန် ဒပ်ပၞာန်ဗမာ ရပ်ဂစိုတ်ထောံတုဲ လၟိဟ်ညးဒးဒုၚ်ဝပ် ကေုာံ ညးချိုတ်အာလဝ်တံဂှ် နူကဵု KNU ဆက်ဂၠိုက်ဂၠာဲသ္ပမံၚ်ဒတန်ဏီဖိုဟ်တုဲ ညံၚ်ဂွံကိတ်ညဳကဵုအခိၚ်ဂှ် ဆက်လလောၚ်တြးအာရောၚ် ဗဟဵု KNU ကဵုလဝ်သမ္တီရ။
အတိုၚ်လိက်လလောၚ်တြး ဂကောံဇာဖိုၚ်အထံက်အပၚ် ပရေၚ်ၜိုဟ်လလမ်ကရေၚ် KPSN ပ္တိတ်လဝ် ပ္ဍဲဂိတုမာတ် ၉ ဂှ်မ္ဂး ဟိုတ်နူဒပ်ပၞာန်ဗမာ ကြဳလဝ်ဗုမ် နကဵုဒရုၚ် ကေုာံ ၜၚ်ကျာပၞာန် ဂျက်ဖိုက်တာဂှ်ရ ညးဍုၚ်ကွာန်ဗွဲမဂၠိုၚ် ဒးချိုတ်အာတုဲ ဂစိုတ်ထောံညးကွာန် ၅ တၠကီု သီုကဵုရပ်ထိၚ်လဝ် ညးကွာန် ကြပ် ၁၆၀ တၠ နဒဒှ်ဂဒံၚ်မၞိဟ် စွံလဝ်ပ္ဍဲဘာဗတောန်လိက်ကွာန်ဂှ်ရောၚ် ဂွံတီရ။
ဒပ်ပၞာန်ဗမာတံ ပရေၚ်ဖံက်ပကဝ်လဝ် အခေါၚ်အရာမၞိဟ်တံဂှ် နူကဵုဗော်သွးကောန်ဂကူကရေၚ် KNU ကဵု ဂကောံ KPSN တံ လလောၚ်တြးထမံက်ထ္ၜးလဝ် သီုကဵုဗီုရုပ်သက်သဳတံရောၚ်။
ဒပ်ကဝ်မယှေန် ပၞာန်ဗမာတံဂှ် သွက်အဝဵုဍေံဂွံခိုၚ်ဗိုန်ဂးတုဲ နူကိုပ်ကၠာဍေံဟွံသီအဝဵုဏီလေဝ် စွံပွန်ဗတိုက်မံၚ် ညးဍုၚ်ကွာန်တံဗီုဗီုဏံ ပ္ဍဲအလုံမွဲဍုၚ် ကေၚ်ဒှ်ကၠုၚ်မံၚ်ရတုဲ ပ္ဍဲအခိၚ်လၟုဟ်ဏံမှ ညးဍုၚ်ကွာန်ဂမၠိုၚ် ဂွံဆဵုညာတ်ကၠးကၠုၚ် အကာဲအရာဍေံတံရောၚ် ဗဟဵု KNU သ္ဂးရ။
ကဝ်မယှေန်ပၞာန်ဂှ် နဒဒှ်ဂၠံၚ်တိတ်ပၞော် ပရေၚ်ဍုၚ်ကွာန်ဂးတုဲ ကၠောန်ဗဒှ်ကၠုၚ်လဝ် ပေါဲရုဲမာဲအလီတုဲ ပ္ဍဲအခိၚ်ဂှ်လေဝ်ဖံက်ပကဝ်လဝ် အခေါၚ်အရာမၞိဟ်တံတုဲ ပေါဲရုဲမာဲတုဲအာကီုလေဝ် ဆက်ဖံက်ပကဝ်အာမံၚ် အခေါၚ်အရာမၞိဟ်ဂှ် ပဵုဂၠိုၚ်တိုန်မံၚ်ရောၚ် ဗဟဵု KNU ဟီုလဝ်ရ။
ပရိုၚ် – သြၚ်လောန်တိုၚ်မ်
Photo – KNU