သာယာဝတဳ၊ ဂိတုမာတ် ၁၀
ပ္ဍဲရးဒေသဗဂေါ ထံၚ်သာယာဝတဳဂှ် စပ်ကဵုတၚ်နွံပၟိက်အခေါၚ် ပ္ဍဲထံၚ်နာနာတံ ပတိုန်ထ္ၜးလဝ်ကဵု ကမ္မတဳရီုဗၚ်ဂၠးကဝ် ICRC တုဲ ကောန်ထံၚ်ပရေၚ်ဍုၚ်ကွာန်ပိတၠ ဒးဒုၚ်ၜုၚ်တက် ပျဲပျာံဍဵုဍိုက်လဝ်ရောၚ် ဂွံတီကေတ် နူညးဍုက်ကေဝ်ကဵု ဗွိုၚ်ထံၚ်တံရ။
ပ္ဍဲဂိတုဖေဖဝ်ဝါရဳ ၈ အခိၚ် ICRC လုပ်စၟဳစၟတ်ထံၚ်သာယာဝတဳဂှ် ကောန်ထံၚ်ပရေၚ်ဍုၚ်ကွာန်တံ ပတိုန်ထ္ၜးလဝ် တၚ်ညးတံနွံပၟိက်အခေါၚ်နာနာ အပ္ဍဲကဵုထံၚ်ဏံရ။
ဟိုတ်နူညးတာလျိုၚ်ထံၚ်သာယာဝတဳ ဟွံပေၚ်စိုတ် လ္တူတၚ်ပတိုန်ထ္ၜးလဝ်ဂှ်တုဲ ကောန်ထံၚ်ပရေၚ်ဍုၚ်ကွာန် ပတိုန်ထ္ၜးလဝ်ကု ICRC တံပိတၠ နူခဒမ် ၈ ကဵု ၉ တံဂှ် ကော်ပတိတ်ဏာတုဲ ၜုၚ်တက်ပျဲပျာံလဝ် ညံၚ်ရဴမၞိဟ်ဟွံသေၚ်ရောၚ် သ္ဂးရ။
ဟိုတ်နူ ဆဵုညာတ်အာ ပရေၚ်ၜုၚ်တက်ဏံတုဲ ကောန်ထံၚ်ပရေၚ်ဍုၚ်ကွာန်တၞဟ်ဟ်တံ ထ္ၜးဆန္ဒစဵုစးအိုတ်ဂှ်ရ ညးတာလျိုၚ်ထံၚ်ကဵု သၞာဲဒါထံၚ်တံ လုပ်ၜုၚ်တက် ပ္ဍဲခဒမ် နကဵုလေအ်၊ ပှော်ကဵုပၞောအ်တံတုဲ ကၟာတ်လဝ်တိုက်ကဵု ကောန်ထံၚ်ထ္ၜးဆန္ဒတံဂှ်ရောၚ် ညးကြပ်ကဵုဗွိုၚ်ထံၚ်တံ ဟီုကဵုဌာန်ပရိုၚ်သြၚ်လောန်တိုၚ်မ် ရ။
ပရေၚ်လုပ်ၜုၚ်တက်လဝ်ဏံဂှ် အမိၚ်နူကဵုညးပိုၚ်ထံၚ်သာယာဝတဳဟွံသေၚ်၊ အမိၚ်နူကဵု ညးတာလျိုၚ်ထံၚ်ဗဟဵု မဒှ်တုဲ ညံၚ်ဟွံဂွံဆက်ၜုၚ်တက်ပျဲပျာံအာ အကြာညးပိုၚ်ထံၚ်ဆေဝ်ဒဝ်မံၚ်ဂှ် သၞာဲဒါထံၚ်တံ လုပ်ၜုၚ်တက်မံၚ် အခိၚ်ဗ္တံကဵု အခိၚ်တ္ၚဲ မဒှ်ရ။
လောန်ကၠုၚ်ဂိတုမာတ် ၂ ဏံဂှ် သွက်ဂွံပစၟတ်သမ္တီ တ္ၚဲသၟာဗ္ၚဂးတုဲ ကောန်ထံၚ်ပရေၚ်ဍုၚ်ကွာန် ၉၂ တၠ နူထံၚ်သာယာဝတဳတံဂှ် နူကဝ်မယှေန်ပၞာန် ကဵုလဝ်အခေါၚ်ဗၠးဒုဟ်ရောၚ် ဇာဖိုၚ်ကောန်ထံၚ်ပရေၚ်ဍုၚ်ကွာန် အလုံဍုၚ်ဗၟာ PPNM လလောၚ်ပ္တိတ်လဝ်ပရိုၚ်ရ။
ပရိုၚ် – သြၚ်လောန်တိုၚ်မ်
Photo – Social Media