မတ်မလီု၊ ဂိတုမာတ် ၁၀
ပ္ဍဲကဵုတွဵုရးမန် ဟိုတ်နူကဝ်မယှေန်ပၞာန်သီအဝဵု ညံၚ်ဂွံစကာအာ ကၠေၚ်စက်အောန်န် ထ္ၜးဟိုတ်တုဲ လ္တူပရေၚ်ကွဳစက်ယာန်နာနာတံ အာကၠုၚ်ဂှ် ပွမပိုင်ခြာစွံလဝ် သၞောတ်စောံ၊ မတုဲ ညးဍုၚ်ကွာန် ကဆံၚ်သ္ဇိုၚ်တံ ဒးဇီုကပိုက်မံၚ်ကဵုဒဒိုက်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဟိုတ်နူပေါဲပၞာန်အဳရာန်တုဲ တရဴဂၠံၚ်ၜၚ်ဖ္ဍိုက်ကၠေၚ်တံ ဒးဒုၚ်ကၟာတ်ဆိုအ်မံၚ်တုဲ ညံၚ်ကၠေၚ်စက်ဂွံရုမ်ဂပ် သွက်ဂွံစကာအာ ကၠေၚ်စက်အောန်န်ဂးတုဲ စနူဂိတုမာတ် ၇ ဂှ် ကဝ်မယှေန်ပၞာန် ဖန်ဇန်ကၠောန်ကၠုၚ် သၞောတ်စောံ၊ မ ဏံရောၚ်။
အတိုၚ်သၞောတ်စောံ၊ မ ကဝ်မယှေန်ပၞာန်ဂှ်မ္ဂး သွက်ကွဳစက်ပူဂဵုတံ ပ္ဍဲတ္ၚဲစောံဂှ် ကွဳစက်မဂၞန်စောံဟေၚ် ဒဳလ္တူဂၠံၚ်ဂွံတုဲ ပ္ဍဲတ္ၚဲမ မ္ဂး ကွဳစက်ဂၞန်မ တံရ ဒဳတိတ်အာလ္တူဂၠံၚ်ဂွံ မဒှ်ရ။။
ညးဍုၚ်ကွာန်ဗွဲမဂၠိုၚ်တံ သွက်ဂွံအာကမၠောန် စဴကၠုၚ်နူကမၠောန်ကေုာံ ကေၚ်ကာကိစ္စဇၞော်ဇၞော်တံဂှ် သုၚ်စောဲမံၚ် ကွဳလိုန်ဓါတ်တံအဓိကတုဲ ဟိုတ်နူသၞောတ်စောံ၊ မ ဏံတုဲ ဒးဇီုကပိုက်မံၚ်ကဵု တၚ်ဝါတ်ဂါတ်တံ မဒှ်ရောၚ်။
ဟိုတ်နူသၞောတ်စောံ၊ မ ကဝ်မယှေန်ပၞာန်ဏံတုဲ စနူသၟာကမၠောန် ကဆံၚ်သ္ဇိုၚ်တံ ဟွံပြေပြံၚ်ဒှ်ကၠုၚ် ပရေၚ်ပိုန်ဒြပ်လေဝ် ပဵုကြေပ်စှ်ေအာတုဲ သွက်ရဲကၠောန်အာမွဲတ္ၚဲ စအာမွဲတ္ၚဲတံမ္ဂး ဒှ်အခိၚ်ကာလဝါတ်ဂါတ်မွဲရောၚ် ညးဒေသမွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပြသၞာစောံ၊ မ ဏံဂှ် လၟုဟ်မ္ဂး ပိုဲတံ ပဵုတုဲဟွံပြေပြၚ်ဒှ်ကၠုၚ်၊ မုဟိုတ်ရောမ္ဂး လၟုဟ်ဏံ ပရေၚ်ပိုန်ဒြပ် ပဵုကြေပ်မံၚ်။ ဟၟဲတုဲ ဂစာန်ကၠောန်စအာဂးမှ ယဝ်ရဒးဒုၚ်ထံၚ် ဒးကဵုဒဏ်သြန်ပၠန်တှ်ေ သွက်ညးဝါတ်ဂါတ်တံကီု သွက်ရဲကၠောန်မွဲတ္ၚဲ စမွဲတ္ၚဲတံမ္ဂး ဒှ်အခိၚ်ကာလ ဝါတ်ဂါတ်ဂၠိုၚ်တိုန်မာန်မွဲ” သာ်ဝွံ သ္ဂးလဝ်ရ။
တုဲပၠန် သွက်ရဲကၠောန်မွဲတ္ၚဲစမွဲတ္ၚဲတံဂှ် ဒှ်မၞိဟ်ကၠောန်အာမွဲတ္ၚဲ စအာမွဲတ္ၚဲတုဲ စပ်ကဵုသၞောတ်စောံ၊ မ ဏံတုဲ ဒၞာဲအာကၠုၚ်တံလဝ် ဟွံပြေပြံၚ်ဒှ်မံၚ်၊ သၞောတ်စောံ၊ မ ဏံဂှ် မိက်ဂွံကဵု ကလေၚ်သ္ၚဳဂၠိပ်အာရောၚ် ညးဆက်ဟီုရ။
သၞောတ်စောံ၊ မ ကဝ်မယှေန်ပၞာန်ဏံဂှ် စနူပရေၚ်အာတရဴတံ အခက်အခုဲဒှ်မံၚ်ဗွဲမဂၠိုၚ်တုဲ ၚုဟ်ကပေါတ်တံလေဝ် ပဵုထပ်တိုန်အာမာန်၊ ညးဍုၚ်ကွာန်တံ ပရေၚ်ဝါတ်ဂါတ် ဂၠိုၚ်တိုန်ပၠန်ရောၚ် ညးဒေသတၞဟ် မွဲတၠပၠန်ဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“သွက်ညးဍုၚ်ကွာန်တံ အခက်အခုဲဂၠိုၚ်တိုန်ကွေံရ၊ အဓိကဂှ် လက်ကရဴဏံ ၚုဟ်ကပေါတ်တံကီု ပရေၚ်စသုၚ်မံၚ်စံၚ်တံကီု ဇၟာပ်အရာ ၚုဟ်သၠုၚ်တိုန်အာမာန်ဏောၚ်။ ပ္ဍဲဂၠံၚ်တံလေဝ် ယဝ်ရဒးကဵုအာမံၚ်လာပ်ဗဇဴ ဂၠိုၚ်နူကိုပ်ကၠာ (၃)/(၄)/(၅) ဆပၠန်မ္ဂး ညးဒးသုၚ်စောဲမံၚ် ကောန်ညးဍုၚ်ကွာန်ပိုဲတံရ ဒးဒုၚ်ယုက်ဒေက်အာမံၚ်” သာ်ဝွံ သ္ဂးလဝ်ရ။
မွဲလပါ်တေံလေဝ် ဂကောံသၟဝ်တဲကဝ်မယှေန်ပၞာန်တံ အခိၚ်ကၠာတေံမ္ဂး ဆၜိုတ်စၟဳစၟတ်မံၚ် လာၚ်ဇြေန်ကွဳ၊ လာၚ်ဇြေန်ဒဳ၊ မဂၞန်၊ ဒ္ၚောဝ် ကေုာံ အထုပ်တံသၟးရတုဲ ပြဟ်ဟ်ဏံ ကြဴနူကဵု သၞောတ်စောံ၊ မ လမျီုလုပ်ကၠုၚ်တုဲ စနူကဵု ပရေၚ်မဂၞန်စောံ၊ မ တံဂှ်လေဝ် ပရေၚ်စၟဳစၟတ်ပဵုတုဲကြေပ်ကၠုၚ်ပၠန်ရ။
အတိုၚ်လလောၚ်တြးကဝ်မယှေန်ပၞာန်မ္ဂး သၞောတ်စောံ၊ မ ဏံဂှ် စၟတ်သမ္တီလဝ် အခိၚ်ကာလကဵုပညာ စနူဂိတုမာတ် ၇ စဵုကဵု ၁၃ တုဲ ကြဴနူဂှ်မ္ဂး နကဵုဂကောံ One Stop Service သ္ကိုပ်အုပ်ဓုပ်တံ သ္ကိုပ်သ္ကအာတုဲ ဆက်ရပ်စပ်ရေၚ်တၠုၚ်ရောၚ် သ္ဂးရ။
ယဝ်ရဟွံဗက်အတိုၚ်သၞောတ်ကွဳစက်ယာန် စောံ၊ မ မ္ဂး ဒးဒုၚ်ရပ်စပ်နကဵု ဥပဒေရာဇသတ် ၝောံပိုဒ် ၁၈၈ တုဲ စဳရေၚ်ဒုဟ်ဒဏ်မ္ဂး ဒးဒုၚ်ထံၚ် ၁ ဂိတု၊ ဒဏ်သြန် ၂၀,၀၀၀ ဒကေဝ် ကေုာံ သီုၜါသာ်မာန်ရောၚ် သ္ဂး လဝ်ရ။
ပ္ဍဲတွဵုရးမန်ဂှ် ဟိုတ်နူခုတ်စၟတ်လဝ် သၞောတ်စောံ၊ မ လ္တူပရေၚ်အာကၠုၚ်တုဲ ကွဳစက်အာကၠုၚ်မံၚ်တံ ယအ်အောန်စှ်ေအာကီုလေဝ် ပ္ဍဲဆေၚ်ကၠေၚ်စက်တံဂှ် ဒးမၚ်ရေၚ်ပြေၚ်လဝ်မၞိဟ်တုဲ ဒးရာန်အာမံၚ် နကဵုသၞောတ်ထ္ၜတ်အပိုၚ်အခြာဏီဖိုဟ် မဒှ်ရ။
ပရိုၚ် – သြၚ်လောန်တိုၚ်မ်
Photo – CJ