ဝါယှေန်တာန်၊ မာတ် ၁၁
ယဝ်ရ အမေရိကာန် ကေုာံ အေဿရေတံ ဆက်ဗတိုက်မံၚ်ဏောၚ်မ္ဂး နူဒေသအဒေါဝ်လပါ်ဗၟံက်ဏံ ကၠေၚ်ဍေၚ် မွဲလေတ်မှ ပလံၚ်ပတိတ်ဟွံဂွံရောၚ် ဒပ်ပၠန်ဂတးမင်မွဲအဳရာန် ဟီုလဝ် ပ္ဍဲဂိတုမာတ် ၁၀ ဂှ်ရ။
ယဝ်ရကၟာတ်ဆိုအ်လဝ် ပရေၚ်ပလံၚ်ကပေါတ်မ္ၚးဍုၚ် ဇြဟတ်ဓါတ်ကိစ္စဇၞော်နူဒေသတံမ္ဂး သွက်ဂွံဗတိုက်အဳရာန် ပဵုသ္ကာတ်မြဟ်အာနူလၟုဟ်ရောၚ် သမ္မတအမေရိကာန် ဒဝ်နေဝ်ထရ ဘပဠလဝ်ရ။
လက်ကရဴက္ဍိုပ်သ္ကိုပ်တၟိ မိုဂျ်တာဘာဂှ် ဆဵုညာတ်မံၚ် ဒပ်ပၞာန်စဵုဒၞာအဳရာန်တံ ဆက်ဒတူလိုၚ်အာ လကျှ်န် ဗွဲမညဳသၟဟ်တုဲ အကာဲအရာ သွက်ဂွံဂစိုၚ်က္ဍိုပ် ပြဟ်ဟ်ဏံဟၟဲဂှ် ဆဵုညာတ်မံၚ်တုဲ ဖျာဘဏ္ဍာဂၠးကဝ် ပ္ဍဲဂိတုမာတ် ၉ ဂှ် တိုန်တိုန်စှ်ေစှ်ေ ဒှ်မံၚ်ရ။
ဒပ်ပၞာန်အဳရာန် ဒးဒုၚ်လီုလာ်အာဗွဲမဇၞော်ဂှ် အမေရိကာန် ကၠောန်မာန်လဝ်ရောၚ် ပေါဲပၞာန်ဂှ် အတိုၚ်မစဳဇန်လဝ် ပွိုၚ် ၄ သတ္တဟဂှ် ပြဟ်နူဂှ် တုဲဒှ်အာမာန်ရောၚ် ဒဝ်နေဝ်ထရ ဟီုရ။
အတိုၚ်ပၟိက်နွံ ညံၚ်သွက်ဂွံဆက်ဗတိုက်အာဂှ် ပြေၚ်ဇန်ပလေဝ်စလဝ်ရောၚ် ဝန်ဇၞော်ပရေၚ်ဍုၚ်သ္အာၚ်အဳရာန် အဘတ်သပ အာရက်ချဳ ဟီုလဝ် ပ္ဍဲဂိတုမာတ် ၁၀ ဂှ်ရ။
စနူကၞောတ်ဂိတုဖေဖဝ်ဝါရဳဂှ် အမေရိကာန် ကေုာံ အေဿရေတံ စဗတိုက်လဝ် မွဲအလုံဍုၚ်အဳရာန်တုဲ ကြဴနူဂှ် ပ္ဍဲအဳရာန် ညးမချိုတ်လဝ် ၁၃၃၂ တၠနွံတုဲ ညးမဒးဘဲဝပ် နွံလၟိဟ်ကဵုလ္ၚီတံရ။
ဇြဟတ်ဓါတ်အလုံဂၠးကဝ် နွံမံၚ်ပၟိက် ၅ ဂအုံ ၁ ဂအုံ မတတ်ကၠောံမံၚ် ပ္ၚံက်ၜဳဟဝ်မုဇ်ဂှ် ယဝ်ရအဳရာန် ဆက်ဂစာန်ကၟာတ်ဆိုအ်အာဏောၚ်မ္ဂး ပဵုတုဲသ္ကာတ်သ္ကာတ်မြဟ်မြဟ် သွက်ဂွံဗတိုက်အာ အဳရာန်ရောၚ် ဒဝ်နေဝ်ထရ ဟီုလဝ်ရ။
ပေါဲပၞာန်ခြာဟွံလအ် အိုတ်အာဏောၚ် ဒဝ်နေဝ်ထရ ဟီုတုဲ ၚုဟ်ကၠေၚ်ဍေၚ်တံ ကလေၚ်စှ်ေအာပၠန်ရ။
တုဲပၠန် အတိုၚ်ပရေၚ်အထံက်ပံၚ် နွံကၠုၚ်ပၟိက် ဇြဟတ်ဓါတ်အၚ်နာဂျဳဂၠးကဝ် သွက်ဂွံယှအ်ဖျေံကဵု ဒဏ်ပရေၚ်ကၟာတ်ဆိုအ် ကၠေၚ်ဍေၚ်ရတ်ယှာတံဂှ် အမေရိကာန် ချိၚ်ဆချပ်ဗ္စာမံၚ်ရ။
နူဒေသအဒေါဝ်လပါ်ဗၟံက် ကၠေၚ်ဍေၚ်မွဲတော်မှ ညံၚ်ဟွံဂွံတိတ်အာမ္ၚးဂှ် ဒပ်ပၠန်ဂတးမင်မွဲအဳရာန် တြးလဝ်ဝါဒတုဲ ညးမကဵုသ္ဂုတ်သွာတ် ပေါဲပၞာန်အိုတ်ကၞောတ်ဂှ် ဒးဒှ်ညးတံဟေၚ် ဟီုလဝ်ရောၚ်။
Ref:Reuters