ရေဝ်၊ ဂိတုမာတ် ၁၁
ပ္ဍဲတွဵုရးမန် ပွိုၚ်ဍုၚ်ရေဝ် ပေါဲဗတိုက်အကြာၜါလပါ် က္တဵုဒှ်လဝ် ဗဒါဲကွာန်အံၚ်သာယာဂှ် ကောန်ပၞာန် ဒပ်ပၞာန်စဵုဒၞာညးဍုၚ်ကွာန် PDF ပိတၠ ပြဟ်လလုဲအာနွံ ဂွံတီ နူဂကောံဇြဟတ်ပၠန်ဂတးတံရ။
ပ္ဍဲဂိတုမာတ် ၈ တုဲကၠုၚ်တေံ ဟိုတ်နူ ကရောၚ်ပၞာန်ထပက်လုပ်ကၠုၚ် ဗဒါဲကွာန်အံၚ်သာယာတုဲ အကြာဒပ်ကဝ်မယှေန်ပၞာန်ကဵု ဒပ်ပံၚ်ကောံမဟာမိတ်ပၠန်ဂတးတံ ပေါဲဗတိုက်အကြာၜါလပါ် ဒှ်ကၠုၚ်လဝ်ရ။
ပ္ဍဲပေါဲဗတိုက်ဂှ် ဂကောံစဵုဒၞာညးဍုၚ်ကွာန် တပေၚ်ယှိုဲထဳ -ကောကျာ် (တပင်ရွှေထီး ကိုကျိုက်) ကောန်ပၞာန် PDF ပိတၠ ပြဟ်လလုဲအာတုဲ သေဏာတ်ပိဇကိုအ် ဆောံလေၚ်အာလဝ် မဒှ်ရ။
ကောန်ပၞာန်ပိတၠဏံဂှ် အဃောမၚ်ကၠတ်ပန်မံၚ် ကရောၚ်ပၞာန် ကဝ်မယှေန်ပၞာန်ဂှ် ဇီုဒးမုက်ကဵုကရောၚ်ပၞာန်တဝ်ဝ် ဟိုတ်နူ ဒးဒုၚ်ကၟာတ်ဆိုအ်ဗတိုက်တုဲ ပြဟ်လလုဲအာရောၚ် ရဲဂကောံပၠန်ဂတးတံ ဟီုရ။
အခန်ကၞာဇျာပန ကောန်ပၞာန် PDF ပိတၠ မသၠးအာလဝ်လမျီုတံ ပ္ဍဲဂိတုမာတ် ၉ ဂှ် ကၠောန်ဗဒှ်လဝ် ပ္ဍဲဒၞာဲတိဍာ်ဗၠးၜးမွဲဒၞာဲရ။
ကြဴနူပေါဲဗတိုက်ဒှ်တုဲ ကရောၚ်ပၞာန်ကဝ်မယှေန်ပၞာန်တံ တိတ်အာနူကွာန်အံၚ်သာယာကီုလေဝ် ဟိုတ်နူဆက်ချဳဓရာၚ်မံၚ် အကြာဗွဳဗွိုၚ်ကွာန်ကၠအ်လဳမဴတုဲ ပရေၚ်ပၞာန်ၜါလပါ် ကြံၚ်မ္ၚိဟ်မံၚ်ရောၚ်။
လောန်ကၠုၚ် ဂိတုဖေဖဝ်ဝါရဳ ၂၃ တေံလေဝ် ဗဒါဲကွာန်အံၚ်တပျေဂှ် အကြာဒပ်ကဝ်မယှေန်ပၞာန် ကဵု ဒပ်ပံၚ်ကောံပၠန်ဂတးတံ ပေါဲဗတိုက်ဒှ်လဝ် သ္ကာတ်မြဟ်တုဲ ကောန်ပၞာန် နူဒပ်ပၠန်ဂတးတွဵုရးမန် MSRF ၜါတၠ ပြဟ်လလုဲလဝ်နွံရ။
ပ္ဍဲပွိုၚ်ဍုၚ်ရေဝ် ဒၞာဲဂကောံဇြဟတ်ပၠန်ဂတး ချဳဓရာၚ်ဇြဟတ်ခိုဟ်မံၚ်ဂှ် ကြဴနူပေါဲရုဲမာဲတုဲအာတုဲ ဒပ်ကဝ်မယှေန်ပၞာန်တံ ထပက်မံၚ် ကရောၚ်ပၞာန် ထပ်ကဵုထပ်ဂှ် ပေါဲဗတိုက်အကြာၜါလပါ် ဆက်ဒှ်ကၠုၚ်မံၚ်စေက်က် အခိၚ်ကြပ်ကၠုၚ်မံၚ်ရောၚ်။
ပရိုၚ် – သြၚ်လောန်တိုၚ်မ်
Photo – MSRF (ဗီုတြေံ)