ၜၚ်ကံက်၊ ဂိတုမာတ် ၁၂
ယဝ်ရ အသိၚ်ပဋိပက္ခ ပေါဲပၞာန်ဒေသအဒေါဝ်လပါ်ဗၟံက်ဏံ စိုပ်အာအကာဲအရာ ပရေအ်အိုတ်မ္ဂး ပ္ဍဲအခိၚ်ဗ္တံ သွက်ဂွံကၟာတ်အာ ဆေၚ်ကၠေၚ်ဓါတ်တံဂှ် အလဵုအသဳဍုၚ်သေံ စဳဇန်လဝ်ရောၚ် ဂွံတီရ။
ဆဂး အကာဲအရာ ပြဟ်ဟ်ဏံမ္ဂး သွက်ဂွံထမံက်ရုပ်ရဴ အစဳဇန်ဏံ ဒဵုကဵုစိုပ်အဆံၚ်သ္ကာတ်မြဟ်ဂှ် ဟွံဒှ်ဏီပုဟ် ဌာနဝန်ဇၞော်သၟုဟ်ဇြဟတ်ဓါတ် ဍုၚ်သေံ သ္ဂးရ။
ဟိုတ်နူပေါဲပၞာန် ဒေသအဒေါဝ်လပါ်ဗၟံက်တုဲ လ္တူကၠေၚ်စက်အရန် ဍုၚ်သေံတံ ယဝ်ရဇြဟတ်ပရေၚ်ဇီုကပိုက် ဇၞော်ကၠုၚ်မှ ကြဴနူအခိၚ် ၁၀ နာဍဳဗ္တံတုဲ ညံၚ်ဂွံကၟာတ်အာ ဆေၚ်ကၠေၚ်ဓါတ်တံဂှ် စဳဇန်လဝ်ရောၚ် သ္ကိုပ်စၞောန်ပ္ညုၚ်ဌာန သာရာဝပ် ကဝေတေတ် သ္ဂးရ။
အကာဲအရာ ကၠေၚ်စက် ညံၚ်ဂွံရုမ်ဂပ်ဂှ် ဒဵုကဵုလၟုဟ် ထိၚ်ချုက်လဝ်မာန်ဖိုဟ်ရောၚ် သ္ကိုပ်စၞောန်ပ္ညုၚ် သာရာဝပ် ဟီုရ။
ပ္ဍဲဒေသပယျဵုတံဂှ် ကွဳစက်ယာန်တံ နူဍုၚ်ဗၟာ ကၠုၚ်ရာန်ပ္တိတ်ကၠေၚ်စက် ဂၠိုၚ်တိုန်မံၚ်တုဲ အကြာညးဒေသဍုၚ်သေံတံ ဒှ်မံၚ်ဂဝိၚ်အိုတ်ရ။
ပ္ဍဲဍုၚ်သေံ ဆေၚ်ကၠေၚ်ဓါတ်လ္ၚဵုတံ ကၠေၚ်စက်ပိုတ်အာဂှ် သ္ကိုပ်စၞောန်ပ္ညုၚ် စွံမံၚ်သတိနွံကီုလေဝ် ညံၚ်ၚုဟ်မး ဟွံဂွံသၠုၚ်တိုန်အာလောန်ကာဲအာ ဒးစၟဳစၟတ်မံၚ် အကာဲအရာပရေၚ်ပလံၚ်ဗစိုပ်တံ ကြပ်ပ်ရောၚ် ညးတာလျိုၚ်တံ ဟီုရ။
လ္တူညးဍုၚ်ကွာန်တံ ညံၚ်ဂွံဂိအောန်ဂးတုဲ ကၠေၚ်စက်ဗကန်လဝ်တံ ညံၚ်ဂွံစိုပ်ကၠုၚ်ပြဟ်ဟ်မာန်ဂှ် ဌာနဝန်ဇၞော်သၟုဟ်ဇြဟတ်ဓါတ် ဍုၚ်သေံ ပံၚ်တောဲကၠောန်မံၚ် ကုကမၠောန်ပလံၚ်ဗစိုပ်ကၠေၚ်တံရောၚ် သ္ဂးရ။
သြန်ဂအုံကၠေၚ်စက်အလဵုအသဳဂှ် ပတိတ်သုၚ်စောဲမံၚ် သွက်ဂွံဒၞာဗပေၚ်ကဵု ပွမၚုဟ်ကၠေၚ်စက်သၠုၚ်တိုန်တံတုဲ ပ္ဍဲပွိုၚ်မွဲတ္ၚဲမ္ဂး ဒးဒုၚ်ဆောံမံၚ် သြန်ဗာတ်သေံ ၁ ဗဳလဳယာန်ပြၚ်ရောၚ် ဂွံတီရ။
ဍုၚ်သေံဝွံ ကၠေၚ်စက်နွံပၟိက် သွက်ဍုၚ်ညးတံဂှ် ဒးရာန်ပၠုပ်နၚ်လဝ် နူဍုၚ်မ္ၚးအဓိကတုဲ ၜိုတ်ကဝက်ဂှ် ရာန်သုၚ်စောဲအာမံၚ် နူကဵုဒေသအဒေါဝ်လပါ်ဗၟံက် မဒှ်ရ။
ဟိုတ်ဂှ်ရ ပ္ဍဲဒေသတေံ ယဝ်ရပဋိပက္ခဒှ်ကၠုၚ် ဟွံသေၚ်မ္ဂး ယဝ်ရပဋိပက္ခလအ်လအာမ္ဂး ဒးဇီုကပိုက်ကဵု ဘဲအန္တရာယ် ကၠေၚ်စက်ပိုတ်အာ ဗွဲမဇၞော်နွံကၠုၚ်မာန်ရောၚ်။
ၜိုန်ရညးတာလျိုၚ်တံ ဟီုမံၚ် ဆက်ထံက်ပၚ်ကဵုမံၚ် ရုံရုံဂပ်ဂပ်ကီုလေဝ် ပ္ဍဲဒေသကွာန်တံဂှ် သၟာဗ္ၚကဵု ညးဍုၚ်ကွာန်တၞဟ်ဟ်တံ စခြိုၚ်ဒေပ်စွံမံၚ် ကၠေၚ်စက်တံအိုတ်ယျ။
Ref:Bangkokpost