ဗြဝတီ၊ မာတ် ၁၂
ပ္ဍဲတွဵုရးကရေၚ် ဍုၚ်ဗြဝတီ သွက်ဂွံရာန်ကၠေၚ်စက်တံဂှ် ဒးပြေၚ်ရေၚ်မၞိဟ် နကဵုသၞောတ်အပိုၚ်အခြာဖိုဟ်တုဲ ၚုဟ်ကၠေၚ်စက် ဖျာဒမၠု (ၚုဟ်မ္ၚး) မွဲလေတ်မ္ဂး ကြပ်စိုပ်အာ ၂၀,၀၀၀ ဒကေဝ်ယျ ညးဒေသတံ ဟီုကဵုသြၚ်လောန်တိုၚ်မ်ရ။
ပ္ဍဲဂိတုမာတ် ၁၁ ဂှ် ပ္ဍဲဆေၚ်ကၠေၚ်စက်ဇၞော်ဇၞော် လ္တူဍုၚ်ဗြဝတီတံ မွဲလေတ်မ္ဂး ၁၀,၀၀၀ ဒကေဝ် ညးတံသွံကဵုမံၚ်တုဲ ဟိုတ်နူ မၞိဟ်ကၠုၚ်ရာန်ဂၠိုၚ်ဂှ် ကွဳလိုန်ဓါတ်မွဲမမ္ဂး ၁၅,၀၀၀ ဒကေဝ်၊ ကွဳစက် (ကာ) မွဲမမ္ဂး ၄၀,၀၀၀ ဒကေဝ်ဟေၚ် နကဵုသၞောတ်အပိုၚ်အခြာ ပြေၚ်ရေၚ်မၞိဟ်တုဲ ဒးရာန်မံၚ်ရောၚ်။
ကၠာဟွံဒှ် ပဋိပက္ခဒေသအဒေါဝ်လပါ်ဗၟံက် ပ္ဍဲဖေဖဝ်ဝါရဳ ၂၈ တေံမ္ဂး ပ္ဍဲဆေၚ်ကၠေၚ်စက်တံဂှ် မွဲလေတ်မ္ဂး ၄,၀၀၀ ကဵု ၅,၀၀၀ ဒကေဝ်ဟေၚ် သွံကဵုမံၚ် မဒှ်ရ။
ဆဂး ပ္ဍဲဂိတုမာတ် ၁၁ ဂှ်မ္ဂး ပ္ဍဲဍုၚ်ဗြဝတီ ၚုဟ်ကၠေၚ်စက် မွဲလေတ်မ္ဂး ၁၀,၀၀၀ ဒဵုကဵု ၁၂,၀၀၀ ဒကေဝ် ၚုဟ်သၠုၚ်တိုန်အာယျ ညးဒေသတံ သ္ဂးရ။
တုဲပၠန် ပ္ဍဲဍုၚ်ဗြဝတီ ၚုဟ်ကၠေၚ်စက် ဖျာဒမၠုဂှ် မွဲလေတ်မ္ဂး ၁၈,၀၀၀ ဒဵုကဵု ၁၉,၀၀၀ ဒကေဝ် ၚုဟ်မၞုံမံၚ်တုဲ ညးသွံမံၚ်ဖျာဒမၠုတံဂှ် အာရာန်ကေတ်နူဍုၚ်သေံ ဍုၚ်မေဝ်ဆံက်တုဲ ခြိုၚ်စွံလဝ်ကၠေၚ်၊ ကလေၚ်ပတိုန်ၚုဟ်မးတုဲ သွံကဵုမံၚ်ပၠန် ဂွံတီနူညးဒေသတံရ။
ပြဟ်ဟ်ဏံ ပ္ဍဲဍုၚ်ဗြဝတီ ပရေၚ်သွံကၠေၚ်စက်ဖျာဒမၠုတံ ဇၞော်တိုန်မံၚ်တုဲ ဟိုတ်နူၚုဟ်ကၠေၚ်စက်သၠုၚ်တိုန်ဂှ်ရ ၚုဟ်ဍာ်၊ ၚုဟ်လိၚ်တက်စီတံလေဝ် ၚုဟ်တိုန်မံၚ်ရောၚ် ညးဍုၚ်ဗြဝတီတံ ဟီုမံၚ်အိုတ်ရ။
လပါ်ကဝ်မယှေန်ပၞာန် ဍုၚ်ဗြဝတီဂှ်မ္ဂး ပ္ဍဲဒေသဏံ ညံၚ်ဟွံဂွံဝေၚ်ၚုဟ်မးကၠေၚ်စက် ကေုာံ ရာန်ခြိုၚ်ဒေပ်စွံလဝ် ကၠေၚ်စက်တုဲ ပတိုန်ၚုဟ်မးသွံရာန်တံ ညံၚ်ဟွံဂွံကၠောန်လးလးဂှ် ပတိတ်လဝ်အမိၚ်ကၟာတ်ဒၞာလဝ်တုဲ ယဝ်ရဖံက်ပကဝ်မ္ဂး ရပ်စပ်အာရောၚ် လလောၚ်တြးကဵုလဝ် သမ္တီရောၚ်။
ပရိုၚ် – သြၚ်လောန်တိုၚ်မ်
Photo – Social Media