ညံၚ်လေဝ်ပေန်၊ မာတ် ၁၂
ပ္ဍဲပွိုၚ်ဍုၚ်ညံၚ်လေဝ်ပေန် ရးဒေသဗဂေါ ဒပ်ကဝ်မယှေန်ပၞာန် ရပ်ကော်သ္ပလဝ်ပးဒၞန် ညးဍုၚ်ကွာန် ၃၀၀ ပြၚ် နူကဵုပိကွာန်တံဂှ် ထမံက်ဏာ လဝေၚ်ပၞာန်မွဲတုဲ ဟံၚ်ပြာ်ကော်ပ္တိတ်ဏာလဝ်ရဂှ် နူကဵုဌာနဝန်ဇၞော်ပရေၚ်စဵုဒၞာ NUG လလောၚ်တြးလဝ် ပ္ဍဲသဝ်တ္ၚဲ ဂိတုမာတ် ၁၀ ဂှ်ရ။
စနူဂိတုမာတ် ၅ တေံ ကရောၚ်ပၞာန်ကဝ်မယှေန်ပၞာန် ထပက်လုပ်ကၠုၚ် ပ္ဍဲကွာန်ကုန်ပလိုၚ်၊ ကုန်ကၞု ကေုာံ ကုန်ဘာ ပွိုၚ်ဍုၚ်ဇြဲပန်တၞံ (ညံၚ်လေဝ်ပေန်)တုဲ ရပ်ကော်ဏာညးဍုၚ်ကွာန် ၃၀၀ ပြၚ် နဒဒှ်ပးဒၞန်မၞိဟ်ရ။
သွက်ဂွံဟံၚ်ပြာ်ပ္တိတ်ဏာ ညးဒေသ ဒးဒုၚ်ရပ်လဝ် နဒဒှ်ပးဒၞန်မၞိဟ်တံ ဂှ် ထမံက်ရုပ်ရဴကၠောန်ဗဒှ်လဝ် “လဝေၚ်ပၞာန်ဟံၚ်ပြာ်ညးဍုၚ်ကွာန်” မွဲတုဲယျရောၚ် ပ္ဍဲလိက်လလောၚ်တြး ဌာနဝန်ဇၞော်ပရေၚ်စဵုဒၞာ NUG ထမံက်ထ္ၜးလဝ် ပ္ဍဲလိက်လလောၚ်တြးရ။
ပ္ဍဲလဝေၚ်ပၞာန် လပါ်ကဝ်မယှေန်ပၞာန် ၁၀ တၠပြၚ် ချိုတ်တုဲ ဟွံအောန်နူ ၂ ၀ တၠဒးလဝ်ဝပ်သ္ကာတ်မြဟ် လပါ်ဒပ်ပံၚ်ကောံ မဟာမိတ်ပၠန်ဂတးတံပၠန် ကောန်သ္ဂံၚ် ၁၁ တၠ ပြဟ်လလုဲအာ လဝ်ရောၚ်။
ကြဴနူလဝေၚ်ပၞာန်တုဲ ညးဍုၚ်ကွာန် ၃၀၀ ပြၚ်တံဂှ် နကဵုၜိုဟ်ဟ်သြိုဟ်ဟ် ဘဲအန္တရာယ်ဟၟဲမွဲ ကောန်သ္ဂံၚ် ဒပ်စဵုဒၞာ ညးဍုၚ်ကွာန် ကေုာံ ဒပ်ပံၚ်ကောံ ဒပ်ပၞာန်ဗၠးၜးကောန်ဂကူ ကရေၚ်တံ ပလံၚ်ဗစိုပ်ကဵုလဝ် ဒၞာဲတိဍာ်ဗၠးၜးတံရောၚ် သ္ဂးလဝ်ရ။
လဝေၚ်ပၞာန်ဏံဂှ် နူကဵုတမ်ဒပ် PDF သၟဝ်အလဵုအသဳညဳသၟဟ်ဂကူ NUG၊ တမ်ဒပ် ကဝ်မာန်ဒဝ်တၟေၚ်တံကီု သီုကဵုဒပ်ပၞာန်ဗၠးၜး ကောန်ဂကူကရေၚ် KNLA တံ ပံၚ်တောဲကၠောန်ဗဒှ်လဝ် မဒှ်ရ။
ဒပ်ကဝ်မယှေန်ပၞာန် ရပ်ကော်လဝ်ညးဍုၚ်ကွာန် နဒဒှ်ပးဒၞန်မၞိဟ်တံဂှ် ဂိတုမာတ် ၇ လောန်ကၠုၚ်တေံ ပ္ဍဲအကြာပေါဲဗတိုက်ဂှ် ၜၚ်ကျာကြဳဖျေံဗုမ်ဂှ်ရ ညးဍုၚ်ကွာန် ၂၅ တၠ ချိုတ်အာတုဲ ပါဲနူဂှ် ဒးဒုၚ်ဂစိုတ်လဝ် ၅ တၠရောၚ် နူဗော်သွးကောန်ဂကူကရေၚ် KNU ကေုာံ NUG တံလေဝ် ပ္တိတ်လဝ်ပရိုၚ်ရ။
ဆေၚ်စပ်ကဵုကိစ္စ ညးဍုၚ်ကွာန်ဒေသ ဇြဲပန်တၞံ (ညံၚ်လေဝ်ပေန်) ရးဒေသဗဂေါတံ ဒးဒုၚ်ဂစိုတ်ထောံလဝ်ဂှ် နူကဵုလပါ် ကဝ်မယှေန်ပၞာန် ဒဵုကဵုလၟုဟ်ဏံ ပရေၚ်လလောၚ်တြးပရိုၚ် မွဲမွဲသာ်လေဝ် ဟွံဂွံဆဵုညာတ်လဝ်ဏီပုဟ်။
ပရိုၚ် – သြၚ်လောန်တိုၚ်မ်
Photo – PDF