မတ်မလီု၊ ဂိတုမာတ် ၁၂
ကၠေၚ်စက်နွံ ရုမ်ဂပ်မံၚ်ရောၚ် ၜိုန်ရကဝ်မယှေန်ပၞာန် တြးလဝ်ဝါဒ ကီုလေဝ် ပ္ဍဲတွဵုရးမန် ကၠေၚ်စက်ပိုတ်အာတုဲ ဆေၚ်ကၠေၚ်ဗွဲမဂၠိုၚ် ကၟာတ်လဝ်ဆေၚ်အိုတ်ဂှ်ရ ဒးဇီုကပိုက်မံၚ်ကဵုအခက်အခုဲဂမၠိုၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဍုၚ်ဗၟာ ကၠေၚ်စက်အရန် သွက် ၄၀ တ္ၚဲ နွံမံၚ်တုဲ ၜၚ်ဖ္ဍိုက်ကၠေၚ် ၂ မ ဟွံဂွံဖျေံကပေါတ်ပ္ဍဲသၞေဟ်ဏီ၊ ၜၚ်ဖ္ဍိုက်ကၠေၚ် ၁၄ မနွံမံၚ်တုဲ ကၠေၚ်စက်သွက်ဂွံပိုတ်အာ ပရူပရာဟၟဲပုဟ် ပ္ဍဲဂိတုမာတ် ၄ တုဲကၠုၚ်တေံ လပါ်ကဝ်မယှေန်ပၞာန် တြးလဝ်ဝါဒရ။
တုဲပၠန် ပ္ဍဲဍုၚ်ဗၟာ သုၚ်စောဲကၠေၚ်စက်ပ္ဍဲပွိုၚ်မွဲတ္ၚဲမ္ဂး ကၠေၚ်ဓါတ် ၁၅ ပြကောတိကိုတ် ဂါလန် ကေုာံ ကၠေၚ်ဒဳဇြေလ် ၁၇ ပြကောတိကိုတ် ဂါလန် နွံမံၚ်တုဲ လၟုဟ်ဏံ ကၠေၚ်ဓါတ် ၆၀ ပြကောတိကိုတ်ဂါလန် ကဵု ကၠေၚ်ဒဳဇြေလ် ကြပ် ၇၀ ပြကောတိကိုတ်ဂါလန် ခြိုၚ်ဒေပ်လဝ် နွံမံၚ်ရောၚ် သ္ဂးလဝ်ရ။
အကာဲအရာဒၞာဲဗလးတိဍာံဍာံဂှ်မ္ဂး ဆေၚ်ကၠေၚ်စက်ဗွဲမဂၠိုၚ် ပ္ဍဲတွဵုရးမန်ဂှ် သွံမံၚ်ကၠေၚ်စက် နကဵုသၞောတ်စောံ၊ မ ကီုလေဝ် ကၠေၚ်စက်ပိုတ်မံၚ် မွဲဏှမွဲဏှကီုရ။
ဟိုတ်နူဆေၚ်ကၠေၚ်ဗွဲမဂၠိုၚ် ကၟာတ်လဝ်တုဲ ပ္ဍဲဖျာဒမၠု (ၚုဟ်မ္ၚး) ဂှ် မွဲလေတ်မ္ဂး ဒးကဵုမံၚ် ၈,၀၀၀ ဒကေဝ်တုဲ ဒးရာန်မံၚ်ရောၚ် ညးဒေသတွဵုရးမန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လၟုဟ်ဏံ ကၠေၚ်ဟၟဲတုဲ နကဵုသၞောတ်စောံ၊ မ ဇၞော်ဂှ် ကဵုမၞိဟ်တံပြေၚ်ရေၚ်၊ သွံလေဝ်ဟွံရုမ်ဂပ်တုဲ ကဵုမၞိဟ်တံပြေၚ်ရေၚ်မံၚ်ဂှ် ဒှ်ဒဒိုက်ကွေံကွေံ။ ဆေၚ်ကၠေၚ်မ္ၚးတံ၊ ဆေၚ်ကၠေၚ်ပုဂ္ဂလိကလ္ၚဵုတံ ဒးကၟာတ်ထောံတုဲ လၟုဟ်မ္ဂး အောန်အိုတ် ၇,၅၀၀ / ၈,၀၀၀ မွဲလေတ် ဒးရာန်ကေတ်မံၚ်” သာ်ဝွံ သ္ဂးရ။
တုဲပၠန် ဆေၚ်ကၠေၚ်စက်တံဂှ် တန်တဴမံၚ်ကဵုကၠေၚ်စက်နွံမံၚ်ဂှ်တုဲ သွက်ကွဳစက်၊ အိုဝ်ဝေ ကေုာံ ကွဳလိုန်ဓါတ် လၟိဟ်ဒဵုကဵုမူစိ ညးတံ သွံကဵုမာန်ဂှ် ထေက်ကဵုဒးခုတ်စၟတ်ကဵုရောၚ်၊ လၟုဟ်ဏံ ခုတ်စၟတ်ကဵုလဝ်ဟၟဲတုဲ ညးမကၠုၚ်ပြေၚ်ရေၚ်မၞိဟ် ရာန်မံၚ်တံ အခိၚ်လေဝ်အိုတ် ဇြဟတ်လေဝ်ဍောၚ်ရောၚ် ညးဆက်ဟီုရ။
ပ္ဍဲဆေၚ်ကၠေၚ်စက်တံ ကၠေၚ်စက်ပိုတ်မံၚ်ဗွဲမဂၠိုၚ်တုဲ ညးဍုၚ်ကွာန် ကဆံၚ်သ္ဇိုၚ်တံလေဝ် ဒှ်မံၚ်ဒဒိုက်ကီုရောၚ် ညးဒေသမန် မွဲတၠတၞဟ်ပၠန် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ကၠေၚ်ဂှ် ပိုတ်မံၚ်ဗွဲမဂၠိုၚ်ရ။ ဒှ်မံၚ်ဗွဲမဂၠိုၚ်ရ။ ရဲကၠောန်မွဲတ္ၚဲစမွဲတ္ၚဲတံဂှ် နကဵုကွဳလိုန်ဓါတ်အှ်အှ် ဒးအာကမၠောန် စဴကၠုၚ်နူကမၠောန်။ ဒဒိုက်သွက်ဂွံစုတ်ကၠေၚ်ဟွံဂွံဂှ် ဂၠိုၚ်ကွေံကွေံရ” သာ်ဝွံ သ္ဂးရ။
မွဲလပါ်တေံလေဝ် သွက်ဂွံစကာအာကၠေၚ်စက်အောန်န် ကေုာံ ညံၚ်ဂွံရုမ်ဂပ်ဂးတုဲ ကွဳလိုန်ဓါတ်မွဲမ ၅,၀၀၀ ဒကေဝ်၊ ကွဳသၠာပိ ကေုာံ အိုဝ်ဝေ မွဲမ ၁၀,၀၀၀ ဒကေဝ် ကေုာံ ကွဳစက်သ္ၚိ မွဲမ ၃၀,၀၀၀ ဒကေဝ်ဟေၚ် ညံၚ်ဂွံသွံအာကဵုဂှ် နူဌာန ပရေၚ်ရပ်စပ်ထိၚ်ကြာပ် ကပေါတ် ကၠေၚ်စက် တွဵုရးမန် ကဝ်မယှေန်ပၞာန် စၞောန်ပ္ညုၚ်လဝ်ပၠန်ရောၚ်။
တုဲပၠန် ကွဳစက်ပလံၚ်မၞိဟ်တံ၊ Light Truck ကေုာံ ကွဳဖ္ဍိုက်ကပေါတ်တံဂှ် ကၠေၚ်ဒဳဇြေလ် သွက်မွဲကိုတ်ဒကေဝ် ညံၚ်ဂွံသွံအာတုဲ သွက်ကွဳစက်ပရဳမီယာမ်ဒဳဇြေလ်တံမ္ဂး မဂၞန်ဗကေတ် ၄၀,၀၀၀ ဒကေဝ် ကေုာံ မဂၞန်လစံက် ၃၀,၀၀၀ ဒကေဝ်ဟေၚ် သွက်ဂွံသွံအာဂှ် ကဵုစၞောန်ပ္ညုၚ်လဝ်ရ။
ပ္ဍဲဆေၚ်သွံကၠေၚ်စက်တံဂှ် စနူဂိတုမာတ် ၇ လောန်ကၠုၚ်ဏံ ပ္ဍဲတ္ၚဲစောံမ္ဂး သွက်ကွဳမဂၞန်စောံ ကေုာံ ပ္ဍဲတ္ၚဲမမ္ဂး သွက်ကွဳစက် မဂၞန်မတံဟေၚ် ညံၚ်ဂွံသွံအာဂှ် စၞောန်ပ္ညုၚ်ကဵုလဝ်ရောၚ်။
ပရိုၚ် – သြၚ်လောန်တိုၚ်မ်
Photo – Social Media