ဒူဗိုၚ်၊ မာတ် ၁၃
ပ္ဍဲအခိၚ် အနှေန်ၚုဟ်ကၠေၚ်စက် ကလေၚ်သၠုၚ်တိုန် ကြပ်စိုပ် ၁၀၀ ဒဝ်ဠာဂှ် ပ္ဍဲပ္ၚံက်ၜဳ ၜၚ်ဖ္ဍိုက်ကပေါတ် ၃ မ ထပ်ဒးဒုၚ်ဗတိုက်လဝ်ပၠန်ရောၚ်။
ညံၚ်ဟွံဂွံဒှ်ဂဝိၚ် ပ္ဍဲဖျာကၠေၚ်စက်တံဂးတုဲ ၜိုန်ရနူဍုၚ် ၃၂ ဍုၚ်တံ လလောၚ်တြးလဝ် သွက်ဂွံပ္တိတ်ကဵု ခြိုၚ်စွံလဝ်ကၠေၚ်စက်အရန် စေဝ်ဗေၚ် ၄၀၀ ပြကောတိကိုတ်ကီုလေဝ် ၚုဟ်ကၠေၚ်စက် ကလေၚ်သၠုၚ်တိုန်အာပၠန် မဒှ်ရ။
ပ္ဍဲကဵုဗတိုက်လဝ် တရဴၜၚ် ဗွဲကြဴအိုတ်ဏံမ္ဂး ဗဒါဲဍုၚ်အဳရတ် ၜၚ်ဖ္ဍိုက်ကၠေၚ် ၜါမဂှ် ဒးဒုၚ်ပန်ဗတိုက် နကဵုလွဟ် ဟွံတီယၟုတံရောၚ်။
ပ္ဍဲအခိၚ်သဝ်တ္ၚဲ ဂိတုမာတ် ၁၁ ဂှ် ၚုဟ်ကၠေၚ်စက် ကလေၚ်စှ်ေဏောၚ်တုဲ ပဵုနူပိုဲတံမကၠိုဟ်လဝ်ဂှ် ၚုဟ်မးစှ်ေကၠုၚ်မာန်ရောၚ် သမ္မတအမေရိကာန် ဒဝ်နေဝ်ထရ ဟီုလဴလဝ်ရ။
ဟိုတ်နူအေဿရေ ထပ်ဗတိုက် ဍုၚ်လက်ဗနန်ပၠန်တုဲ ပ္ဍဲကရပ်ဇိုၚ်သၞေဟ်ၜဳ ဍုၚ်ဗေရောတ်ဂှ် မၞိဟ် ၈ တၠတံပါလုပ် ညးဍုၚ်ကွာန်ဗွဲမဂၠိုၚ် ဒးချိုတ်အာလဝ်ရ။
ဟိုတ်နူအဳရာန်ဗတိုက်လေဝ် ဍုၚ်ပါရုၚ်၊ အိုမာန် ကေုာံ ဒူဗိုၚ်တံတုဲ အလုံမွဲဒေသဂှ် ပရေၚ်လီုလာ်တံ က္တဵုဒှ်ကၠုၚ် လဝ်ရ။
ဟိုတ်နူ အဳရာန်ဗတိုက်တုဲ အလုံမွဲဍုၚ် ကဵုလဝ်အမိၚ် ဒပ်ပၞာန်မၚ်လဝ်ဂွန်ရောၚ် ဝန်ဇၞော်ကေၚ်ကာအပ္ဍဲဍုၚ် ပါရုၚ် ဟီုရ။
ဗ္ဒိုပ်ပၞာန်အဳတလဳ မၞုံလပါ်သၟဝ်ကျာဍုၚ်အဳရတ် မွဲဒၞာဲလေဝ် ဒးဒုၚ်ဗတိုက်လဝ် နကဵုကမ်သၠောဝ်ရောၚ် ဝန်ဇၞော်ပရေၚ်စဵုဒၞာ အဳတလဳ သ္ဂးရ။
ပ္ဍဲအခိၚ်ပၟတ်ပၞာန်သ္ကာတ်မြဟ်ကၠုၚ်မံၚ် ပ္ဍဲဒေသအဒေါဝ်လပါ်ဗၟံက် ဒၞာဲအဓိကပတိတ်မံၚ်ကၠေၚ်စက်တံဂှ် ၚုဟ်ကၠေၚ်စက်ဂၠးကဝ် သၠုၚ်တိုန်အာ ၁၂၀ ဒဝ်ဠာတုဲ ကြဴနူဒဝ်နေဝ်ထရ ဟီုလဝ် ပေါဲပၞာန်အဳရာန် ဟွံလအ်တုဲဒှ်ဏောၚ်တုဲ ၚုဟ်ကလေၚ်စှ်ေအာလဝ်ရောၚ်။
ကြဴနူဂှ်ပၠန် ပေါဲဗတိုက်ကလေၚ်သ္ကာတ်မြဟ်ကၠုၚ်တုဲ ၚုဟ်ကၠေၚ်စက် ကလေၚ်သၠုၚ်တိုန်အာ ကြပ်စိုပ် ၁၀၀ ဒဝ်ဠာပၠန် မဒှ်ရ။
အဳရာန် ဗတိုက်မံၚ်ၜၚ်ဖ္ဍိုက်ကပေါတ်တံတုဲ ဟိုတ်နူပေါဲပၞာန်ဂှ် ပရေၚ်ပိုန်ဒြပ်ဂၠးကဝ် လီုလာ်အာမာန်ရောၚ် ကဵုလဝ်သတိရ။
ပ္ၚံက်ၜဳဟဝ်မုဇ် မဒှ်ဒၞာဲကၠေၚ်စက်ဂၠးကဝ် ၅ ဂအုံ ၁ ဂအုံ မတတ်ကၠောံမံၚ်ဂှ်လေဝ် အဳရာန်ကၟာတ်ဆိုအ်လဝ်တုဲ နူဒေသဏံ ကၠေၚ်စက်မွဲလေတ်မှ ညံၚ်ဟွံဂွံတိတ်အာမ္ၚးဂှ် ကမြေဲလလောၚ်လဝ်ရောၚ်။
Ref:BBC