တယိတ်ချံၚ်၊ ဂိတုမာတ် ၁၃
ၜိုန်ရ လပါ်ဒပ်ကဝ်မယှေန်ပၞာန်တံ ပန်ရီုကဵုမံၚ်ၜၚ်ကျာ ဗွဲမသ္ကာတ်မြဟ်ကီုလေဝ် ဗ္ဒိုပ်ဒပ်ပၞာန်ဗၟာဝေန်ဝ မၞုံပွိုၚ်ဍုၚ် တယိတ်ချံၚ် ခရိုၚ်ထဝါဲ ရးတနၚ်သဳဂှ် ဗတိုက်သီကေတ်လဝ်မာန်ယျ ဂွံတီကေတ် နူခရိုၚ်ဗိက်-ထဝါဲ KNU ရ။
ဇြဟတ်ပၞာန်ဗၟာၜိုတ် ၁၀၀ နွံမံၚ် ဗ္ဒိုပ်ပၞာန်ဝေန်ဝဂှ် ပ္ဍဲဖေဖဝ်ဝါရဳ ၇ တုဲကၠုၚ်တေံ ဒပ်ပံၚ်ကောံပၠန်ဂတး KNLA သ္ကိုပ်သ္ကစဗတိုက်ကၠုၚ်လဝ်ဂှ် ပ္ဍဲဂိတုမာတ် ၁၁ ဏံ သီကေတ်မာန်လဝ် သီုဖအိုတ်ရောၚ်။
ပ္ဍဲပေါဲဗတိုက်သီဗ္ဒိုပ်ဝေန်ဝ အခိၚ်ကြပ်ပေၚ်ပွိုၚ်မွဲဂိတုဏံဂှ် လပါ်ကဝ်မယှေန်ပၞာန် နူကဵုၜၚ်ကျာကၠုၚ်ပန်ရီုလဝ် ဟွံအောန်နူကဵု ၅၀ ဝါ နွံမံၚ်ရောၚ် ညးတာလျိုၚ်လလောၚ်ပရိုၚ် ခရိုၚ်ဗိက်-ထဝါဲ KNU ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲပေါဲဗတိုက်သီဗ္ဒိုပ်ဂှ် လပါ်ကဝ်မယှေန်ပၞာန် ဗိုလ်ဇၞော် ၄ တၠကီု သီုဖအိုတ် ၅၀ တၠပြၚ် ချိုတ်အာလဝ်၊ လပါ်ဒပ်ပံၚ်ကောံ KNLA တံ ကောန်သ္ဂံၚ် ၂ တၠ ပြဟ်လလုဲတုဲ ဒးလဝ်ဝပ် ၅ တၠနွံရောၚ် သ္ဂးရ။
တုဲပၠန် သီဂွံလွဟ်နာနာ နူကဵုဒပ်ကဝ်မယှေန်ပၞာန် ၅၀ ဇကိုအ်ပြၚ် သီုကပေါတ်ပၞာန်တံတုဲ ဗ္ဒိုပ်ပၞာန်ဂှ်လေဝ် ဟိုတ်နူဒးလဝ်ဘဲဗုမ်ဒရုၚ်တံတုဲ လီုလာ်အာလဝ်သီုဖအိုတ် မဒှ်ရ။
ဗ္ဒိုပ်ပၞာန်ဝေန်ဝဝွံ နွံမံၚ်ပ္ဍဲပွိုၚ်ဍုၚ်တယိတ်ချံၚ် ဂၠံၚ်ဇၞော်လၟေၚ် (၈) ထဝါဲ-ဗိက် ပ္ဍဲကွာန်မေန်ဒပ်ဂှ်တှ်ေ ဒပ်ကဝ်မယှေန်ပၞာန်တံ ဖျေံလဝ်ဒပ်ပ္တန်လဝ်ဒၞာဲ လောန်ကၠုၚ် ၃၀ သၞာံပြၚ် မဒှ်ရ။
ပ္ဍဲပေါဲဗတိုက်သီဗ္ဒိုပ်ဝေန်ဝဏံဂှ် ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ်ပၞာန်စဵုဒၞာညးဍုၚ်ကွာန် PDF ကေုာံ ဒပ်ပံၚ်ကောံ မဟာမိတ်ပၠန်ဂတးတံ ပံၚ်တောဲဗတိုက်လဝ်ရောၚ်။
ပ္ဍဲကဵုပေါဲဗတိုက်လဝေၚ်ပၞာန်ဏံ သွက်သရာဲဂံၚ် ညးမသၠးကၠုၚ်လမျီုတံကီု သီုကဵုညးဍုၚ်ကွာန် ထံက်ပၚ်ရီုဗၚ်ကၠုၚ်လဝ် နူဇၟာပ်ပ်သွာၚ်တံဂှ် သ္ပစၟတ်သမ္တီပတိုန်စရာဲရ သာ်ဝွံ နူကဵုခရိုၚ်ဗိက်-ထဝါဲ KNU ပ္တိတ်လဝ်လိက်လလောၚ်တြးရ။
ပရိုၚ် – သြၚ်လောန်တိုၚ်မ်
Photo – KNU