မတ်မလီု၊ ဂိတုမာတ် ၁၃
ပ္ဍဲတွဵုရးမန် သွက်ဘာတန်ဗတောန်ယိုက်ဝန်ပၞာန် ညးဍုၚ်ကွာန် လၟေၚ် ၂၃ သွက်ဂွံပံက်အာ ပ္ဍဲဂိတုမာတ်ဏံတုဲ ညံၚ်ဂွံကဵု မၞိဟ်ယိုက်ဝန်ပၞာန်တံဂှ် ဒးဒုၚ်ဘပဠမံၚ်ဆက်က်ရောၚ် သ္ကိုပ်အုပ်ဓုပ်ကွာန်/အရာပ် ဟွံမိက်ထမံက်ယၟုတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်တန်ဗတောန်ယိုက်ဝန်ပၞာန် လၟေၚ် ၂၃ ညံၚ်ဂွံပံက်အာပ္ဍဲသတ္တဟတတိယ ဂိတုမာတ်ဏံဂှ် စဳဇန်လဝ်တုဲ ညံၚ်ဂွံဂၠာဲပကောံလဝ်ကဵုကောန်ပၞာန်တၟိ သွက်ဂွံတိုန်ဘာတန်ဗတောန်ဂှ် ကဝ်မယှေန်ပၞာန် ကဵုမံၚ်ဇြဟတ်ဟရိုဟ် လ္တူသ္ကိုပ်အုပ်ဓုပ်တံရ။
အတိုၚ်သ္ကိုပ်အုပ်ဓုပ် ဟွံမိက်ထမံက်ယၟုတံဟီုလဴမ္ဂး ပ္ဍဲကွာန်အရာပ်မွဲမွဲမ္ဂး အောန်အိုတ် ညးယိုက်ဝန်ပၞာန်နူ ၈ တၠ ဒဵုကဵု ၁၀ တၠ ရဲကဵုဟွံမာန်ဏီတံဂှ် ဒးဒုၚ်ကဵုမံၚ်ဇြဟတ်ဟရိုဟ်ဆက်က် မဒှ်ရ။
ပ္ဍဲကဵုဂၠာဲကောန်ပၞာန်တၟိ ကဵုမံၚ်ဇြဟတ်ဟရိုဟ်ပၠန်လေဝ် သ္ကိုပ်အုပ်ဓုပ် ယဝ်ရကဵုမၞိဟ်ယိုက်ဝန်ပၞာန်ဟွံမာန်မ္ဂး သွက်ဂွံပတိတ်ထောံ နူတာလျိုၚ်ဂှ်လေဝ် ဘပဠမံၚ်ရောၚ် သ္ဂးရ။
ဟိုတ်နူ ပရေၚ်ဇြဟတ်ဟရိုဟ်ကဝ်မယှေန်ပၞာန်တုဲ သ္ကိုပ်အုပ်ဓုပ်ကွာန်အရာပ်တံ ကဵုသြန်နူ ၅၀ ကိုတ် ဒဵုကဵု ၈၀ ကိုတ်တုဲ ဗက်ရာန်ကေတ်မံၚ်သၟတ်ဗၠာဲ ဒပ်ပၞာန်ကဵုဒပ်ဗၠာဲသၟိၚ်တံ ရပ်ထိၚ်လဝ် နကဵုဟိုတ်နာနာတံဂှ် ဗက်ပပေၚ်ကဵုမံၚ် သွက်မၞိဟ်ယိုက်ဝန်ပၞာန်ရောၚ် ဂွံတီရ။
အတိုၚ်ဌာန်ပရိုၚ် သြၚ်လောန်တိုၚ်မ် ဂၠိုက်ဂၠာဲသၟာန်လဝ်မ္ဂး ပ္ဍဲတမ်ဒပ်ကေုာံ ရုၚ်ဗၠာဲသၟိၚ်ဆေၚ်စပ်တံဂှ် သွက်ဂွံယိုက်ဝန်ပၞာန် ပ္ဍဲမွဲဂိတုမ္ဂး အောန်အိုတ် သၟတ်ဗၠာဲ ၄ တၠ ဒဵုကဵု ၁၀ တၠ ဒစးဒုၚ်ရပ်ပကောံစွံလဝ် နွံမံၚ်ရောၚ်။
ပ္ဍဲတွဵုရးမန် သွက်ဘာတန်ဗတောန်ယိုက်ဝန်ပၞာန် ကဝ်မယှေန်ပၞာန် ပံက်ကၠုၚ်လဝ်ဇၟာပ်ဂိတု စနူအလန် ၁ ဒဵုကဵုအလန် ၂၂ ဂှ် သၟတ်ဗၠာဲ လုပ်အဝေါၚ်ယိုက်ဝန်ပၞာန် ဟွံအောန်နူကဵု ၄,၅၀၀ တၠ ဒးဒုၚ်ပကောံဏာလဝ် ကောန်ပၞာန်ရောၚ်။
ပရိုၚ် – သြၚ်လောန်တိုၚ်မ်
Photo – MOI