မတ်မလီု၊ ဂိတုမာတ် ၁၃
ပ္ဍဲတွဵုရးမန် ဟိုတ်နူကဝ်မယှေန်ပၞာန် ပိုင်ခြာလဝ်ကၠေၚ်စက်ကီု အတိုၚ်ပၟိက်နွံ ရာန်ကၠေၚ်စက်ဟွံဂွံ အခက်အခုဲဒှ်အာတုဲ စနူဖျုန်က၊ သၞေဝ်ကေဝ်တံအိုတ်သီု ၚုဟ်ကပေါတ်နာနာ ဆက်သၠုၚ်တိုန်မံၚ်ရောၚ် ညးဗြဴပါၚ်ဖဴတံ ဟီုကဵုဌာန်ပရိုၚ်သြၚ်လောန်တိုၚ်မ် ရ။
ဟိုတ်နူ ကဝ်မယှေန်ပၞာန် ကၠောန်လဝ်သၞောတ်ပိုင်ခြာ ကွဳစက်မဂၞန် စောံ၊ မ တုဲ ကၠေၚ်စက်တံဂှ် ရာန်လောဲလောဲဟွံဂွံ၊ မၞိဟ်ဒးအာၜေတ်ရေၚ်လဝ် အခိၚ်လအ်လ၊ ရာန်အတိုၚ်ပၟိက်နွံဟွံဂွံ ပါဲနူဂှ်ပၠန် ပ္ဍဲဆေၚ်ကၠေၚ်ဗွဲမဂၠိုၚ်ဂှ် ကၠေၚ်ပိုတ်အာ မွဲဏှမွဲဏှတုဲ ဒးဇီုကပိုက်မံၚ်ကဵုအခက်အခုဲရ။
တုဲပၠန် ဟိုတ်နူသၞောတ်စောံ၊ မ ဂှ်ရ ဗီုကဵုကၠာတေံ ကွဳစက်ယာန်တံ အာကၠုၚ်လၟေၚ်ဓမ္မတာဟွံဂွံတုဲ ပ္ဍဲအရာပလံၚ်ဗစိုပ်ကပေါတ်တံ အခက်အခုဲနွံတိုန်ကၠုၚ်၊ ၚုဟ်ပလံၚ်ကပေါတ်တံ သၠုၚ်တိုန်အာတုဲ ၚုဟ်ကပေါတ်တံလေဝ် ထပ်သၠုၚ်တိုန်အာပၠန် မဒှ်ရ။
ဟိုတ်နူအခက်အခုဲရာန်ကၠေၚ်စက်ဂှ် ၚုဟ်တာန်သာ ပလံၚ်ကပေါတ်တံသၠုၚ်တိုန်တုဲ ကပေါတ်စၞစသုၚ်သ္ဇိုၚ် ကဖျုန်တံ စနူကဵု သၞေဝ်ကေဝ်နာနာအိုတ်သီု ၚုဟ်သၠုၚ်တိုန်မံၚ်ရောၚ် ညးဗြဴပါၚ်ဖဴမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
“ကၠေၚ်စုတ်ဝါတ်အာတုဲ ၚုဟ်တာန်သာတံ သၠုၚ်တိုန်ရ။ ၚုဟ်တာန်သာသၠုၚ်တှ်ေ ကပေါတ်တံလေဝ် ၚုဟ်သၠုၚ်အာရ။ ဟိုတ်နူၚုဟ်ကၠေၚ်တုဲ ဂိက်တံလေဝ် ဂၠိုၚ်ကၠုၚ်ပၠန်တှ်ေ ပ္ဍဲဂိက်တံလေဝ် ဒးကဵုမံၚ်လာပ်ဗဇဴတုဲ ကဖျုန်တံလေဝ် တိုန်အာရ။ ဖျုန်စာၚ် နူ ၂၀,၀၀၀ ဒကေဝ်ဂှ် ဒှ်အာ ၂၄,၀၀၀ ဒကေဝ်ယျ။ သၞေဝ်ကေဝ်တံလေဝ် တိုန်အာဖအိုတ်ရ။ ၚုဟ် ခပဳထဝ်၊ သတ်ခဍောၚ်၊ သတ်ၜဲတံအိုတ်သီု ၚုဟ်သၠုၚ်တိုန်အာဖအိုတ်ရ” သာ်ဝွံ သ္ဂးရ။
ၚုဟ်ကပေါတ်ဂွံသၠုၚ်တိုန်အာဗီုဏံဂှ် ဟိုတ်နူအခက်အခုဲကၠေၚ်စက် သၟးဟွံသေၚ်၊ ဟိုတ်နူသၞောတ်စောံ၊ မ ပရေၚ်ကွဳစက်တံအာကၠုၚ်လေဝ်ပါမံၚ်တုဲ ညးတာလျိုၚ်ဆေၚ်စပ်တံ ထေက်ကဵု ဒးကလေၚ်သ္ၚဳဂၠိပ်ထေက်ရောၚ် ညး ဆက်ဟီုရ။
ဟိုတ်နူအခက်အခုဲကၠေၚ်စက်တုဲ ကပေါတ်သၞေဝ်ကေဝ်တံ အတိုၚ်တ္ၚဲချိၚ်လဝ်ဂှ်ဟွံစိုပ်တုဲ အုဲအာ၊ သှ်ေမံၚ်ခိုဟ်ခိုဟ်တံဂှ် ဒးရာန်စမံၚ်ၚုဟ်မးဇၞော်ဇၞော်တုဲ ၚုဟ်ကပေါတ်တံသၠုၚ်တိုန်အာရဂှ် ညးဗြဴပါၚ်ဖဴ မွဲတၠပၠန်ဂှ် ဟီုကဵု ဌာန်ပရိုၚ်သြၚ်လောန်တိုၚ်မ် ရ။
“ရာန်ကၠေၚ်ဂှ် ဟွံဂွံ။ အခက်အခုဲဒှ်အာဗွဲမဂၠိုၚ်။ မုကပေါတ်လေဝ် ရာန်ဟွံဂွံ မွဲမွဲတ္ၚဲ၊ လၟုဟ်ပၠန် ကပေါတ်သၞေဝ်ကေဝ်တံ တ္ၚဲဒးစိုပ်ဂှ် စိုပ်ဟွံမာန်။ ဟိုတ်နူကၠေၚ် စိုပ်ဟွံမာန်တုဲ သေၚ်အာ အုဲအာတုဲ သှ်ေမံၚ်ခိုဟ်ဟ်တံဂှ် ဒးရာန်မံၚ် ၚုဟ်မးက္ဍၚ်က္ဍၚ်။ တိုန်အာဖအိုတ်ရ။ အပ္ဍဲၜါတ္ၚဲဏံ ၚုဟ်ကပေါတ်တံ တိုန်အာဗွဲမလောန်ရ” သာ်ဝွံ သ္ဂးရ။
မွဲလပါ်ပၠန် ဌာနပရေၚ်ရပ်စပ်ထိၚ်ကြာပ် ကပေါတ်ကၠေၚ်စက်တွဵုရးမန် သၟဝ်တဲကဝ်မယှေန်ပၞာန်ဂှ် သွက်ဂွံစကာအာကၠေၚ်စက်အောန်န်ကေုာံ ညံၚ်ဂွံရုမ်ဂပ်ဂးတုဲ သွက်ကွဳလိုန်ဓါတ်မွဲမ ၅,၀၀၀ ဒကေဝ်၊ ကွဳသၠာပိ၊ အိုဝ်ဝေ မွဲမမ္ဂး ၁၀,၀၀၀ ဒကေဝ်ဟေၚ် ညံၚ်ဂွံသွံအာဂှ် ကဵုလဝ်စၞောန်ပ္ညုၚ်ရ။
တုဲပၠန် သွက်ကွဳစက်သုၚ်စောဲသ္ၚိ မွဲမ ၃၀,၀၀၀ ဒကေဝ်၊ ကွဳစက်ပလံၚ်မၞိဟ်တံ၊ Light Truck ကေုာံ ကွဳဖ္ဍိုက်ကပေါတ်တံဂှ် မွဲကိုတ်ဒကေဝ်၊ သွက်ကွဳစက်ပရဳမီယာမ်ဒဳဇြေလ်တံမ္ဂး မဂၞန်ဗကေတ် ၄၀,၀၀၀ ဒကေဝ်၊ မဂၞန်လစံက် ၃၀,၀၀၀ ဒကေဝ်ဟေၚ် ညံၚ်ဂွံသွံအာဂှ် စၞောန်ပ္ညုၚ်လဝ် မဒှ်ရ။
ၚုဟ်ကပေါတ်တံဂှ် ပါဲနူအခက်အခုဲကၠေၚ်စက်တုဲ ပရေၚ်အာကၠုၚ်ကွဳစက်ဂှ် ဟိုတ်နူကဝ်မယှေန်ပၞာန်ကၠောန်လဝ် သၞောတ်စောံ၊ မ တုဲ ဗီုအခိၚ်ကၠာတေံကွဳစက်ပူဂဵုတံ သွက်ဂွံပလံၚ်ဗစိုပ်ကပေါတ်ဂှ် လၟေၚ်တ္ၚဲအာဟွံဂွံတုဲ အရာဟွံထေက်ကဵုအိုတ်တံဂှ် ဒးအိုတ်အာတုဲ ၚုဟ်မးဟွံထေက်ကဵုတိုန်တံ သၠုၚ်တိုန်အာရောၚ် ညးဗြဴပါၚ်ဖဴတံ ပါ်ပါဲဟီုဂးလဝ်ရ။
ပရိုၚ် – သြၚ်လောန်တိုၚ်မ်
Photo – Social Media