ဟံၚ်ကံၚ်၊ ဂိတုမာတ် ၁၄
ၜၚ်ဖ္ဍိုက်ကပေါတ် သွက်ပရေၚ်ပိုန်ဒြပ်လ္ၚဵုတံဂှ် ပ္ဍဲပ္ၚံက်ၜဳဟဝ်မုဇ် ဟွံသေၚ်မ္ဂး ပ္ဍဲဗွဳဗွိုၚ်ဂှ် ဒှ်ၜၚ်ကြုက်ရောၚ် ညးတံလလောၚ်တြးတုဲ ဂစာန်ဒဳအာကၠုၚ်မံၚ်အိုတ်ရောၚ် သ္ဂးလဝ်ရ။
အခိၚ်ပေါဲပၞာန်အဳရာန် အသိၚ်ထတ်တိုန်မံၚ်ဏံ အဳရာန်ကၟာတ်ဆိုအ်လဝ် ပ္ၚံက်ၜဳဟဝ်မုဇ်တုဲ ၜၚ်မဂစာန်တတ်ကၠောံကၠုၚ်တံဂှ် စံၚ်ပၠုပ်ထောံဗွဝ်ပၟတ်ရောၚ် ဘပဠလဝ်ရ။
ၜၚ်မတတ်ကၠောံအာ ပ္ဍဲပ္ၚံက်ၜဳပါယှာန် ကေုာံ ပ္ဍဲပ္ၚံက်ၜဳအိုမာန်တံဂှ် ဒဒှ်ရၜၚ်ကြုက်ပိုင်ပြဳလဝ်ရောၚ် ညးတံလလောၚ်တြးဇကုညးတံတုဲ ဒဳတတ်ကၠောံအာမံၚ်အိုတ်ရ။
ဣဏံဂှ် သွက်အရၚ်ၜၚ် တတ်ကၠောံဗဒါဲ ပ္ၚံက်ၜဳဟဝ်မုဇ်တံ ညံၚ်ဟွံဂွံဒးဒုၚ်ဗတိုက်ဂှ် သုၚ်စောဲမံၚ် ဒှ်ကသပ်နဲကဲလက်ကရဴအိုတ်ရ။
ပ္ဍဲဗဒါဲပ္ၚံက်ၜဳဟဝ်မုဇ်ဂှ် အဳရာန်ဗတိုက်မံၚ် ၜၚ်ဖ္ဍိုက်ကပေါတ်တံတုဲ ၜၚ်ဖ္ဍိုက်ကပေါတ်ဍုၚ်သေံမွဲမလေဝ် ဒးအာလဝ်ဘဲနွံရ။
ဒဵုကဵုစိုပ်ဂိတုမာတ် ၁၃ ဂှ်မ္ဂး ပ္ဍဲဗဒါဲပ္ၚံက်ၜဳဂှ် အဳရာန် ပန်ဗတိုက်လဝ် ၜၚ်ဖ္ဍိုက်ကပေါတ် ၁၉ မပြၚ်ရ။
ၜၚ်နူဍုၚ်ပနာမာကေုာံ တ္ကအ်မာယှေဝ်တံလေဝ် ဒှ်ၜၚ်ကြုက်ပိုင် လလောၚ်တြးလဝ်တုဲ တတ်ကၠောံမံၚ် ပ္ဍဲပ္ၚံက်ၜဳတံဏံ မဒှ်ရ။
အခိၚ်ဒးဇီုကပိုက်ကဵု ပရေၚ်ဂကောံဟူသဳ ပန်ဗတိုက်မံၚ် ပ္ဍဲၜဳဗကေတ်တေံလေဝ် ၜၚ်ဖ္ဍိုက်ကပေါတ်တံဂှ် နကဵုနဲကဲဗီုဏံဟေၚ် လလောၚ်တြးနဒဒှ်ၜၚ်ကြုက်တုဲ အာကၠုၚ်မံၚ်အိုတ်ရ။
ပ္ၚံက်ၜဳဟဝ်မုဇ် မဒှ်ဒၞာဲကၠေၚ်စက်ဂၠးကဝ် ၅ ဂအုံ ၁ ဂအုံ တတ်ကၠောံမံၚ်ဂှ် ဟိုတ်နူအဳရာန်ကၟာတ်လဝ်ဂှ် ပရေၚ်ပိုန်ဒြပ်ဂၠးကဝ် လီုလာ်အာမာန်ရောၚ် သ္ဂးလဝ်ရ။
အခိၚ်ပေါဲပၞာန်အဳရာန် အသိၚ်ထတ်တိုန်မံၚ်ဏံ ၚုဟ်ကၠေၚ်စက်ဂှ် ဂေတ်ဂေၚ်မံၚ် လ္တူ ၁၀၀ ဒဝ်ဠာတုဲ ၚုဟ်ယှေဝ်ယာ ပ္ဍဲအာရှတံလေဝ် ယအ်စှ်ေအာ ကၠးကၠးခၠေဲခၠေဲရ။
ယဝ်ရပေါဲပၞာန်ဒေသအဒေါဝ်လပါ်ဗၟံက် လအ်လအာမ္ဂး ပရေၚ်ပိုန်ဒြပ်ဂၠးကဝ် ယုတ်ဒေက်အာ ဇၞော်ကဵုဇြဟတ်မာန်ရောၚ် တၠပညာတံ ကဵုမံၚ်သတိတုဲ ဗွဝ်ဖျာကၠေၚ်စက်တံလေဝ် ဒှ်မံၚ်ဆဆဵုရ။
Ref:AP