ဗြဝတီ၊ ဂိတုမာတ် ၁၄
ပ္ဍဲတွဵုရးကရေၚ် ဒၞာဲကျာဖျ DKBA မၞုံဗဒါဲကွာန်ဖလူလေဝ် လပါ်သၠုၚ်ကျာဍုၚ်ဗြဝတီဂှ် ဟိုတ်နူဒပ်ကဝ်မယှေန်ပၞာန် ပန်ဏာ လွဟ်ဇၞော် ဒတုံဗကးအာတုဲ မၞိဟ် ၂၀ ပြၚ် ဒးဝပ်ချိုတ်အာလဝ်ရောၚ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဒေသဖလူဂှ် ဒပ်ကဝ်မယှေန်ပၞာန် ဗပေၚ်ဇြဟတ် ထပက်လုပ်ကၠုၚ် ကရောၚ်ပၞာန်တုဲ ပေါဲဗတိုက်ဒှ်လဝ်ကဵု ဂကောံဇြဟတ်ပၠန်ဂတး KNLA တံ ပ္ဍဲအကြာတ္ၚဲတံဏံ သ္ကာတ်မြဟ်တုဲ လပါ်ဒပ် ကဝ်မယှေန်ပၞာန် နကဵုလွဟ်ဇၞော်၊ ဒရုၚ်ပန်ရီုမံၚ် ဇၟာပ်တ္ၚဲသၟးဟွံက နူကဵုၜၚ်ကျာကြဳဖျေံဗုမ်တံ ကၠောန်မံၚ်မွဲဏှမွဲဏှရ။
အဃောပေါဲဗတိုက်အကြာၜါလပါ် သ္ကာတ်မြဟ်မံၚ်ဂှ် ပ္ဍဲဂိတုမာတ် ၁၃ အခိၚ်နူဂယးၜိုတ် ၉ နာဍဳပြၚ်ဂှ် လွဟ်ဇၞော်လပါ်ဒပ် ကဝ်မယှေန်ပၞာန် ပန်ရီုမံၚ်တံဂှ် ဒတုံဗကးခတိုဟ်အာ ပ္ဍဲဒၞာဲကျာဖျကြုက် ဂြိပ်ဆုကၠ တိဍာ် ဒပ်ပၞာန်ကရေၚ်ပတုဲဖဵု ဒဳမဝ်ကရေဇြဳ DKBA ထိၚ်ချုက်လဝ် ဗဒါဲကွာန်ဖလူလေဝ်ဂှ်ရောၚ် ရိုဟ်ကၞက်ပရိုၚ်ဒေသတံ သ္ဂးရ။
ပ္ဍဲဒၞာဲကျာဖျကြုက် ဂြိပ်ဆုကၠ DKBA ထိၚ်ချုက်လဝ် ဗဒါဲကွာန်ဖလူလေဝ်ဂှ် လွဟ်ဇၞော်ဒတုံခတိုဟ်အာ ၃ မတုဲ မၞိဟ်မံၚ်ဒၟံၚ် ပ္ဍဲဗွိုၚ်ကၠအ်ကျာဖျ ၂၀ တၠပြၚ် ဒးဝပ်ချိုတ်အာတုဲ အပ္ဍဲဂှ် ကောန်ဒပ် DKBA တံလေဝ် ပါလုပ်မံၚ်ကီုရောၚ် ဂွံတီရ။
လပါ်သၠုၚ်ကျာဍုၚ်ဗြဝတီ အတိုၚ်ပယျဵုသေံမွဲဒမြိပ်ဏံဂှ် ဗီုဒေသ ကျံက်ခက်ကီု ဒၞာဲ DKBA ထိၚ်ချုက်လဝ် ရုၚ်ကျာဖျကြုက်တံ သှ်ေမံၚ်ဗွဲမဂၠိုၚ်ဏီတုဲ ကမၠောန်ကျာဖျတံလေဝ် ဆက်ဂေတ်မံၚ် ဖိုဟ်ရောၚ်။
ပ္ဍဲအကြာတ္ၚဲတံဏံ ပ္ဍဲဍုၚ်ဗြဝတီဂှ် အကြာဒပ် DKBA ကဵု ဒပ်မၚ်ကွာန် (ပြည်သူ့စစ်) သၟဝ်ကဝ်မယှေန်ပၞာန်တံ ဒှ်ပန်ညးသ္ကံကီု၊ စပ်ကဵုကိစ္စ ကၠေၚ်စက် ပဋိပက္ခမံက်ကၠုၚ်တုဲ အကြာဒပ်ထံၚ်ပရိုၚ် (စရဖ) ကဵု DKBA တံ ဒှ်ပန်ညးသ္ကံဂှ်တှ်ေ ညးတာလျိုၚ် စရဖ မွဲတၠ ချိုတ်အာလဝ်ရ။
တုဲပၠန် ပ္ဍဲဂိတုဖေဖဝ်ဝါရဳ ၂၄ လောန်ကၠုၚ်တေံလေဝ် လ္တူဂၠံၚ် မေဝ်ကနေဝ်-ဖလူ ပွိုၚ်ဍုၚ်ဗြဝတီ ကွဳစက်ဒပ် DKBA အာကၠုၚ်မံၚ် တံဂှ် ဒပ်ကဝ်မယှေန်ပၞာန် နကဵုဒရုၚ် ကြဳဖျေံဗုမ်ဗတိုက်မံၚ်တုဲ ကောန်ဒပ် DKBA ကဵု ညးဍုၚ်ကွာန် ၅ တၠ ချိုတ်အာလဝ်ရ။
ပရိုၚ် – သြၚ်လောန်တိုၚ်မ်
Photo – DKBA