ၜဳကလေၚ်၊ ဂိတုမာတ် ၁၄
ပ္ဍဲကွာန်ပန်ကွာန် မၞုံဒၞာဲဒေသဆက်ကၠောံ ပယျဵုမန်ကဵုကရေၚ် ဟိုတ်နူ ဒးဒုၚ်ကြဳဗုမ်ၜၚ်ကျာဂှ်ရ ညးဍုၚ်ကွာန် ၜါတၠ ချိုတ်အာတုဲ လၟိဟ်ကဵုစှော် ဒးအာဝပ်နွံရောၚ် ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုမာတ် ၁၂ ၜိုတ်အခိၚ်တ္ၚဲစေၚ် ၁၂ နာဍဳဂှ် ၜိုန်ရ ပေါဲဗတိုက် ဟၟဲကီုလေဝ် ပ္ဍဲကွာန်ပန်ကွာန် မၞုံဒေသဆက်ကၠောံ ပယျဵုမန်ကဵု ကရေၚ်ဂှ် နူကဵုၜၚ်ကျာ ဒပ်ကဝ်မယှေန်ပၞာန် ကၠုၚ်ကြဳဖျေံလဝ်ဗုမ် ဟွံအောန်နူ ၉ မနွံရောၚ်။
ပ္ဍဲပရေၚ်ကြဳဗုမ်ဏံမ္ဂး ပ္ဍဲကွာန်ဝက်ခဝ်ပါ ပွိုၚ်ဍုၚ်ၜဳကလေၚ်ဂှ် ဗုမ်ၜါမ၊ ပ္ဍဲကွာန်ဖဝထ ကေုာံ ကွာန်မေဝ်ပံၚ်ဝ ပွိုၚ်ဍုၚ်ဖာပန် တွဵုရးကရေၚ်ဂှ် ဗုမ်ၜါၜါမ၊ ပ္ဍဲကွာန်မလေဝ်ကျံက်ဂှ် ဗုမ် ၃ မ ဒတုံခတိုဟ်အာလဝ် မဒှ်ရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ် ဂွံလဝ်ပရိုၚ် ပြဟ်ဟ်ဏံမ္ဂး ဟိုတ်နူဒပ်ကဝ်မယှေန်ပၞာန် ကြဳဗုမ်ဗလးကျာဂှ်ရ ညးဒေသကွာန်ဖဝထ ၜါတၠ ချိုတ်အာတုဲ၊ ဟွံအောန်နူ ၁၀ တၠ ဒးအာဝပ် ညးဒေသကွာန်ဝက်ခဝ်ပါ ကဵု ကွာန်မလေဝ်ကျံက် ၈ တၠ ဒးအာဝပ်နွံရ။
ဟိုတ်နူဒပ်ကဝ်မယှေန်ပၞာန် ကြဳဗုမ် နူဗလးကျာဂှ်တုဲ ညးဒေသ နူကွာန်ပန်ကွာန်တံ ဒးဂြိပ်ပါဲဓလေတ်အာ ဒၞာဲဗၠးဘဲဗွဲမပြဟ်တုဲ ပြဟ်ဟ်ဏံမ္ဂး နွံမံၚ်ပၟိက်ကဵု အထံက်အပၚ် ပရေၚ်ဗ္စာရဏာမၞိဟ် တံရောၚ် သ္ဂးရ။
ဒပ်ပၞာန်သီအဝဵုတံ ပ္ဍဲအကြာပွိုၚ်တ္ၚဲတံဏံဂှ် အလုံမွဲဍုၚ် ဒၞာဲကွာန် ဂကောံရပ်လွဟ်ကောန်ဍုၚ်အရၚ် ထိၚ်ချုက်လဝ်တံဂှ် နူကဵုဗလးကျာ ကြဳဗုမ်ဗတိုက်မံၚ်ဂှ် ကၠောန်မံၚ်ဆက်က်ရောၚ်။
ပ္ဍဲဂိတုမာတ် ၈ လောန်ကၠုၚ်ဏံလေဝ် လ္တူဗ္ဒိုပ်ထံၚ် ဂၠုဲပၞာန် (စစ်သုံ့ပန်း) ပ္ဍဲပွိုၚ်ဍုၚ်အာန် တွဵုရးရခေၚ်ဂှ် ဟိုတ်နူ ၜၚ်ကျာ ဒပ်ကဝ်မယှေန်ပၞာန် ကြဳဗုမ်တုဲ ဂၠုဲပၞာန်ဒးဒုၚ်ရပ်လဝ် ၁၁၆ တၠ ချိုတ်အာတုဲ ၃၂ တၠ ဒးအာဝပ်နွံမံၚ်ရဂှ် ဒပ်ပၞာန်အာရက္ခ AA လလောၚ်တြးလဝ်ပရိုၚ်ရ။
ပရိုၚ် – ဌာန်ပရိုၚ်သြၚ်လောန်တိုၚ်မ်
Photo – KNU