မတ်မလီု၊ ဂိတုမာတ် ၁၄
ၚုဟ်ကၠေၚ်စက် ပ္ဍဲတွဵုရးမန်ဝွံ ယဝ်ရၜတ်ကေတ်ကဵု ရးဒေသကေုာံ တွဵုရးတၞဟ်ဟ်တံမ္ဂး ပ္ဍဲပွိုၚ်မွဲတ္ၚဲဓဝ်ဟေၚ် မွဲလေတ်မ္ဂး နူ ၅၀၀ ဒကေဝ် ဒဵုကဵု ၈၀၀ ဒကေဝ်ပြၚ် ၚုဟ်မးပဵုတိုန်မံၚ်တုဲ ဒှ်အကာဲအရာ ၚုဟ်မးထပက်တိုန်အာ မြက်မံၚ်ကွေံကွေံရောၚ်။
အတိုၚ်ကဝ်မယှေန်ပၞာန် ပိုင်ခြာခုတ်လဝ်မ္ဂး ပ္ဍဲဂိတုမာတ် ၁၂ ဂှ် ကၠေၚ်ဓါတ် ဂကူ 95 မွဲလေတ် ၂,၉၅၅ ဒကေဝ်ဓဝ် မၞုံမံၚ်ကီုလေဝ် ပ္ဍဲဂိတုမာတ် ၁၃ ဂှ် ၚုဟ်သၠုၚ်တိုန်အာ မွဲလေတ်မ္ဂး စိုပ်အာ ၃,၄၇၀ ဒကေဝ်မဒှ်ရ။
ကၠေၚ်ဓါတ်ဂကူ 92 မွဲလေတ် နူ ၂,၈၇၅ ဒကေဝ်ဂှ် ဒှ်အာ ၃,၃၃၀ ဒကေဝ် ၚုဟ်သၠုၚ်တိုန်အာဂှ်ကီု သီုကဵု ကၠေၚ်ဒဳဇြေလ် ပရဳမီယာမ် မွဲလေတ် နူ ၃,၄၁၀ ဒကေဝ်ဂှ် ဒှ်အာ ၄,၂၂၅ ဒကေဝ် ၚုဟ်မးထပက်သၠုၚ်တိုန်အာ ဗွဲမလောန်ရ။
နကဵုတၚ်တၟေၚ်မ္ဂး ပ္ဍဲဒေသတၞဟ်ဟ် လ္ဂုၚ်၊ မာန္တလေဝ်၊ နေပျဳဒဝ်၊ ဗဂေါ၊ မကွေ၊ ထဝါဲ ကေုာံ ဘာအၚ်တံဂှ် ကၠေၚ်ဓါတ်ဂကူ 95 မွဲလေတ်မ္ဂး ၜိုတ် ၃,၀၀၀ ဒကေဝ် ကေုာံ ဂကူ 92 မွဲလေတ်မ္ဂး နွံမံၚ်သၟဝ် ၃,၀၀၀ ဒကေဝ်ဓဝ်ရ။
နူကဝ်မယှေန်ပၞာန် ဟိုတ်နူဟွံသွံကဵုသြန်ဒဝ်ဠာ သွက်ညးရာန် ပၠုပ်နၚ်မံၚ် ကၠေၚ်စက် တွဵုရးမန်ဂှ်ရ ၚုဟ်ကၠေၚ်စက်တွဵုရးမန် ဂွံသၠုၚ်တိုန်မံၚ် နူကဵုဒေသတၞဟ်ဟ်တံဂှ်ရောၚ်
တၠကမၠောန်ကၠေၚ်စက် မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
“အဓိကဂှ် သွက်ညးရာန်ပၠုပ်နၚ်မံၚ်ကၠေၚ်စက် တွဵုရးမန်တံဂှ် အလဵုအသဳ ဟွံသွံကဵုဒဝ်ဠာပုဟ်။ ဒးဗက်ရာန်ကေတ်ကေတ်ရ။ အခိၚ်ဒးဗက်ရာန်ကေတ်မ္ဂး ၚုဟ်ဒဝ်ဠာ အလဵုအသဳသွံလဝ်တံကဵု ၚုဟ်ဒဝ်ဠာဖျာမ္ၚးတံဂှ် တၞဟ်ခြာမံၚ်ညိည။ ဟိုတ်ဂှ်ရ အခိၚ်ခုတ်စၟတ်ၚုဟ်ကၠေၚ်မ္ဂး တၞဟ်ခြာအာညိညရောၚ်” သာ်ဝွံ သ္ဂးရ။
တုဲပၠန် ပ္ဍဲအခိၚ်ကာလ ကၠေၚ်စက်ဝါတ်ဂါတ်မံၚ်ဏံ ညံၚ်ၚုဟ်မး ဟွံဂွံတၞဟ်ခြာအာ နူကဵုဒေသတၞဟ်တံဂၠိုၚ်ၚ်ဂှ် ပ္ဍဲကာလဏံ ထေက်ကဵု ဒးသွံကဵုဒဝ်ဠာ ကုညးမရာန်ပၠုပ်နၚ်ကၠေၚ်တံကီုရောၚ် ညးဆက်ဟီုရ။
မွဲလပါ်တေံလေဝ် နူကဵုဌာန ပရေၚ်ရပ်စပ်ထိၚ်ကြာပ်ကပေါတ် ကၠေၚ်စက် တွဵုရးမန် သၟဝ်ကဝ်မယှေန်ပၞာန်ဂှ် ဆေၚ်သွံကၠေၚ်တံ ညိလေဝ် လ္ပပတိုန်ၚုဟ်မးဂှ် ပ္ဍဲဂိတုမာတ် ၄ တေံ ကဵုလဝ်သတိ ရောၚ်။
ၚုဟ်ကၠေၚ်စက်သၠုၚ်တိုန်အာကီုလေဝ် အတိုၚ်ပၟိက်နွံရာန်မံၚ်ဟွံဂွံတုဲ ကွဳလိုန်ဓါတ်မွဲမ ၅,၀၀၀ ဒကေဝ်၊ ကွဳသၠာပိ ကေုာံ အိုဝ်ဝေ ၁၀,၀၀၀ ဒကေဝ်၊ ကွဳစက်သ္ၚိ ၃၀,၀၀၀ ဒကေဝ်၊ ကွဳစက်ပလံၚ်မၞိဟ် ကေုာံ ကွဳဖ္ဍိုက်ကပေါတ်တံဂှ် မွဲကိုတ်ဒကေဝ်၊ ကွဳစက်ပရဳမီယာမ်ဒဳဇြေလ် မဂၞန်ဗကေတ် ၄၀,၀၀၀ ဒကေဝ် ကေုာံ မဂၞန်လစံက် ၃၀,၀၀၀ ဒကေဝ်ဟေၚ် သွံကဵုမံၚ်ရောၚ်။
ပ္ဍဲပရေၚ်သွံကၠေၚ်စက်ဏံလေဝ် စနူဂိတုမာတ် ၇ ဂှ်တုဲ ပ္ဍဲတ္ၚဲစောံမ္ဂး သွက်ကွဳစက်မၞုံကဵုမဂၞန်စောံ၊ ပ္ဍဲတ္ၚဲမမ္ဂး သွက်ကွဳစက်မၞုံကဵု မဂၞန်မတံ ဟေၚ် သွံကဵုမံၚ်တုဲ ကၠုၚ်ရာန်စုတ်ကဵုစေဝ်၊ တိုၚ်ကဳတံဂှ် ဟွံသွံကဵုလးလးရောၚ် ဂွံတီရ။
ပ္ဍဲတွဵုရးမန်ဂှ် စနူသတ္တဟပထမ ဂိတုမာတ်ဏံတုဲ ကၠေၚ်စက်တံဂှ် အတိုၚ်ပၟိက်နွံရာန်ကေတ်ဟွံဂွံ၊ ဒးရာန်မံၚ် နကဵုသၞောတ်ထ္ၜတ် အပိုၚ်အခြာ၊ မၞိဟ်ဒးၜေတ်ရာန်ကေတ် ဒးမၚ်အခိၚ်လအ်လ သၟးဟွံက ဆေၚ်ကၠေၚ်ဗွဲမဂၠိုၚ်လေဝ် ကၠေၚ်စက်ပိုတ်မံၚ်မွဲဏှမွဲဏှတုဲ ဒးဇီုကပိုက်မံၚ်ကဵု အခက်အခုဲ ကၠေၚ်တံရ။
ပရိုၚ် – ဌာန်ပရိုၚ်သြၚ်လောန်တိုၚ်မ်
Photo – Social Media