တဳဟဳရာန်၊ မာတ် ၁၇
ကြဴနူဟီုထမံက်ထ္ၜးလဝ် ဍုၚ်ယူကရုၚ် ထံက်ပၚ်မံၚ်ဒရုၚ် ဇရေၚ်ဍုၚ်အေဿရေတံတုဲ ဍုၚ်ယူခရုၚ်ဂှ် ဒှ်ကၠုၚ်ပွန်လုပ်သၞောဝ်မွဲယျ သာ်ဝွံ အဳရာန် လလောၚ်တြးလဝ်ရ။
သကိုပ်ကမ္မတဳပရေၚ်ဂီုကၠီုကောန်ဂကူ စၠတ်ဓဝ်အဳရာန် အဳဗရာဟေန် အဇြဳဇြဳ ဟီုလဝ်ပ္ဍဲသိုဲယှေဝ်မဳဒဳယာဂှ် ဍုၚ်ယူခရုၚ်ဝွံ ပါလုပ်ကၠုၚ် ပ္ဍဲကဵုအကြာပေါဲပၞာန်ဒေသဗၟံက်အဒေါဝ်ယျ။
နူဍုၚ်ယူခရုၚ် ပလံၚ်ထံက်ပၚ်မံၚ်ကဵုဒရုၚ် ဇရေၚ်အေဿရေတံဂှ် ညးတေံၜိုန်ရဟွံထမံက်ထ္ၜးသက်သဳကီုလေဝ် ဍုၚ်ယူခရုၚ်ဂှ် ထံက်ပၚ်ကဵုမံၚ်ဒရုၚ် ပ္ဍဲဒေသဗၟံက်အဒေါဝ်တံဂှ် မိက်ဂွံဂွံသြန် ကေုာံ နဲကဲပညာရောၚ် သာ်ဝွံ ရိုဟ်ကၞက်ပရိုၚ်တံ ဟီုရ။
သွက်ဂွံထံက်ပၚ်ဒရုၚ် ဇရေၚ်အေဿရေဂှ် နကဵုဍုၚ်ယူခရုၚ် ဗွဲမလုပ်သၞောဝ် လလောၚ်တြးလဝ် ဟၟဲဏီကီုလေဝ် ဇရေၚ်ဍုၚ်ကာတာ၊ ယူအေအဳ ကေုာံ သော်ဒဳအာရေဗဳယျာတံဂှ် ညးတံဗလးဏာလဝ် ဂကောံတၠပညာ စီုသကီုပရေၚ်ပၞာန်တံနွံရ။
သွက်ဂွံစဵုဒၞာ ဒရုၚ် Shahed ပ္တိတ်နူဍုၚ်အဳရာန်ဂှ် နူဍုၚ်အမေရိကာန်၊ ဒေသဗၟံက်အဒေါဝ်တံ ကေုာံ အလုံဍုၚ်ယူရောပ်တံ အာတ်မံၚ်အရီုအဗၚ် ဇရေၚ်ညးတံရောၚ် သမ္မတယူခရုၚ် ဇဳလာန်သကဳ ဟီုလဝ်ရောၚ်။
ပရေၚ်အာတ်လဝ်အရီုအဗၚ် နူယူခရုၚ်ဂှ် ညးစၞးအဳရာန် ဆေၚ်စပ်ကဵုဍုၚ်ယူခရုၚ် ရှာရဳယာ အမဝ်ဇဳကာ ဟီုလဝ်အရေဝ်ဂမြာၚ် သ္ပပရေံကီုရ။ အဳရာန်ဝွံ ကုဍုၚ်ရုယှာဂှ် ဒှ်ဍုၚ်မဟာမိတ်မစှ်ေဗျူဟာတုဲ ပ္ဍဲကိစ္စပရေၚ်ဂီုကၠီုဒေသ၊ ပရေၚ်ထံၚ်ပရိုၚ် ကေုာံ နဲကဲပညာပၞာန်တံဂှ် ပံၚ်တောဲရေၚ်တၠုၚ်လဝ် ဗွဲမဂၠိုၚ်ရောၚ်။
ပ္ဍဲအကြာပေါဲပၞာန်ယူခရုၚ်ဂှ် သွက်ဂွံဂစိုတ်ကောန်ဍုၚ်ယူခရုၚ်တံတုဲ အဳရာန် ထံက်ပၚ်ကၠုၚ်မံၚ် ကမ်သၠောဝ် ကေုာံ ဒရုၚ်တံ ကုရုယှာတံဂှ် လအ်ကၠုၚ်သၞာံဗွဲမဂၠိုၚ်ရောၚ် သာ်ဝွံ ညးအခေါၚ်ဟီုဂးနွံ ဌာနဝန်ဇၞော်ပရေၚ်ဍုၚ်သအာၚ် ယူခရုၚ် ဟီုဂးလဝ်ရ။
ဒရုၚ် Shahed-136 မပ္တိတ်လဝ်နူအဳရာန်ဂှ် ရတ်ယှာကလေၚ်ပ္တိတ်အပ္ဍဲဍုၚ်ညးတံတုဲ စပ္တံနူသၞာံ ၂၀၁၄ တေံဂှ် ဒပ်ပၞာန်ရတ်ယှာ စကာတုဲ ဗတိုက်ကၠုၚ်မံၚ်ရ။
နူဖေဖော်ဝါရဳ ၂၈ တ္ၚဲ ဍုၚ်အမေရိကာန် ကေုာံ အေဿရေဝ်တံ စဗတိုက်အဳရာန်တုဲ ကြဴနူဂှ် သွက်ဂွံဗတိုက် စမြိုၚ်ဒၞာဲပၞာန်အမေရိကာန်ဂှ် ရတ်ယှာဂစာန်ကဵုမံၚ်အရီုအဗၚ်ကဵု အဳရာန် နကဵုပရိုၚ်ပရေၚ်ထံၚ်ပရိုၚ်တံရ။
ရတ်ယှာ ပလံၚ်ကဵုမံၚ်ဒရုၚ် ဇရေၚ်အဳရာန်တုဲ ထံက်ပၚ်ကဵုမံၚ်သ္ၚိတ်တ်ရောၚ် ဝန်ဇၞော်ပရေၚ်စဵုဒၞာအဂႅလိက် ဂျောန် ဟဝ်လေ ဟီုလဝ်ရ။
ပ္ဍဲအကြာဏအ်လေဝ် ရတ်ယှာ ကဵုလဝ်ပရေၚ်ထံက်ပၚ် အရီုဗၚ်ပရေၚ်ဓရ်ဗ္စာရဏာမၞိဟ် ၁၃ တာန် ဇရေၚ်အဳရာန်နွံရောၚ် လလောၚ်တြးလဝ်ရ။
သွက်ဂွံပဒေါအ်အာပေါဲပၞာန်အဳရာန်မာန် ယူရေနဳယာန် မတောမ်သ္အးလဝ်မၞုံပ္ဍဲတဲအဳရာန်တံ သွက်ဂွံပြံၚ်လှာဲဗ္စိုပ်ဏာ ဇရေၚ်ဍုၚ်ရုယှာဂှ် အခိၚ် သမ္မတပူတေန် ဟီုလဝ်ဖုၚ်ကု သမ္မတအမေရိကာန် ဒဝ်နေဝ်ထရ ဂှ် ပတိုန်လဝ်ဂလာန်ရောၚ် ဂးလဝ်ရ။
သွက်ဂွံကၠောန်အာ ပရေၚ်ယူရေနဳယာန်အဳရာန် ညံၚ်ဂွံဂီုကၠီုနွံနွံဂှ် နွံပၟိက်မံၚ်တုဲ ပရေၚ်အာတ်မိက်လဝ်ဏံဂှ် တးပါဲထောံလဝ်ယျ သာ်ဝွံ ညးတာလျိုၚ်အမေရိကာန်မွဲတၠ ဟီုလဝ်ရ။
Ref:The Telegraph