ဗြဝတီ၊ မာတ် ၁၈
လပါ်သၠုၚ်ကျာ ဍုၚ်ဗြဝတီ ကြပ်ကဵုပယျဵုသေံ-ဗၟာ ပ္ဍဲဒေသဖလူဂှ် အကြာဒပ်ကဝ်မယှေန်ပၞာန်ကဵု ဂကောံဇြဟတ်ပၠန်ဂတးတံ ပေါဲဗတိုက်သကာတ်မြဟ်ဆက်ဒှ်မံၚ်ဂှ်တှ်ေ လပါ်ဒပ်ကဝ်မယှေန်ပၞာန် လုပ်ဗတိုက်လဝ် ဗ္ဒိုပ်ညးပါဲဘဲပၞာန်တံနွံမံၚ်ရောၚ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲတွဵုရးကရေၚ် ပွိုၚ်ဍုၚ်ဗြဝတီ သွက်ဂွံကလေၚ်သီကေတ် တိဍာ်ဖလူ၊ တိဍာ်မေန်လက်ပါန်တံမာန်ဂှ် ဒပ်ကဝ်မယှေန်ပၞာန် နူဂိတုဗွဲမဂၠိုၚ် ထပက်လဝ်ပၞာန်ကီု ပ္ဍဲကဵုမာတ် ၁၇ နူဂယးဂှ်လေဝ် ဒပ်ကဝ်မယှေန်ပၞာန် ထပက်ပၞာန်ဂှ်ရ ဒှ်လဝ်ပေါဲဗတိုက်ကဵု ဂကောံဇြဟတ်ပၠန်ဂတး မဟာဒပ် ၆ KNLA တံ ဗွဲမသကာတ်မြဟ် ရ။
ပ္ဍဲပေါဲဗတိုက် ဗွိုၚ်တိဍာ်ဖလူ၊ မေန်လက်ပါန်တံဂှ် လပါ်ဒပ်ကဝ်မယှေန်ပၞာန် ဂွံအရီုဗၚ်ဗတိုက်နူဗလးကျာ၊ လွဟ်ဇၞော် ကေုာံဒရုၚ်တံတုဲ ဗတိုက်မံၚ် ဂကောံဇြဟတ်ပၠန်ဂတးတံသၟးဟွံက သီုကဵုရဲဒးဒဒိုက် နွံမံၚ်ဗ္ဒိုပ်ပါဲဘဲပၞာန် ဗွိုၚ်ပယျဵုတံဂှ်လေဝ် နူလပါ် ဒပ်ကဝ်မယှေန်ပၞာန်တံ ဆက်ဗတိုက်မံၚ်ရ။
ပ္ဍဲမာတ် ၁၇ နူဂယးဂှ် ဒၞာဲရဲပါဲဘဲပၞာန်တံ ဗ္ဒဗ္ဒာဲမံၚ်ယာယဳမွဲဒၞာဲ ကြပ်ကဵု ဒေသဖလူဂှ် ဟိုတ်နူမကမ်လွဟ်ဇၞော် ဒပ်ကဝ်မယှေန်ပၞာန် ပန်စုတ်လဝ်တံ ဒတုံခတိုဟ်အာတုဲ ရဲပါဲမံၚ်ဘဲပၞာန် မၞုံပ္ဍဲဗ္ဒိုပ်ယာယဳ တံဂှ်လေဝ် ဒးဂြိပ်ပါဲတိတ်အာ ဒၞာဲဗၠးဘဲတၞဟ်တံယျ ရိုဟ်ကၞက်ပရိုၚ်ဒေသတံ ဟီုဂးလဝ်ရ။
ပ္ဍဲမာတ် ၁၄ လောန်ကၠုၚ်ဏအ်လေဝ် ဗ္ဒိုပ်ပါဲဘဲပၞာန် ပလဝ်တပိုအ် မၞုံဇိုၚ်ၜဳသံၚ်ရေၚ် ကြပ်ကဵုပယျဵုသေံ လၟိဟ်မၞိဟ်နကဵုလ္ၚီတံနွံမံၚ်ဂှ် လပါ်ဒပ်ကဝ်မယှေန်ပၞာန်တံ စကာဒရုၚ်ဂစိုတ်ဇကု ကာမဳကာဇေလ် ဗတိုက်လဝ် ၜါဝါတုဲ ရဲပါဲဒဴဘဲပၞာန်မွဲတၠ ချိုတ်အာဒၞာဲရ၊ တုဲပၠန် မၞိဟ်မွဲတၠပၠန် ဒးဝပ်ဘဲဒဏ်တုဲနွံ ရဲပါဲဒဴမံၚ်ဘဲပၞာန် မၞုံပ္ဍဲဗ္ဒိုပ် ကြပ်ဖအိုတ်တံဂှ် ဒးဂြိပ်ပါဲဓလေတ်အာအိုတ်ရောၚ်။
ဟိုတ်နူဒပ်ကဝ်မယှေန်ပၞာန် ဗတိုက်နကဵုဒရုၚ်တုဲ ရဲပါဲဒဴဘဲပၞာန် နူဗ္ဒိုပ်ပလဝ်တပိုအ် ဗွဲမဂၠိုၚ် ဒးပြံၚ်အာဒၞာဲ ဒၞာဲဒပ် DKBA ထိင်ချုပ်လဝ် ပ္ဍဲကျံက်ခက်၊ ဇြုၚ်သဳမျာၚ်ကေုာံ လပါ်ကွာန် တေအ်ဗဝ်ဗိုတံတုဲ ရဲပါဲဒဴဘဲပၞာန်လ္ၚဵုတံဂှ်တှ်ေ ဒၞာဲဂွံအာဟၟဲပုဟ် သာ်ဝွံ ရိုဟ်ကၞက်ပရိုၚ်ဒေသတံ ဟီုရ။
ဟိုတ်နူဒပ်ကဝ်မယှေန်ပၞာန် ဗတိုက်မံၚ်ဗ္ဒိုပ်ရဲပါဲဒဴဘဲပၞာန် နကဵုဒရုၚ်တုဲ ညးဍုၚ်ကွာန်ဒးပါဲဒၞာဲပြံၚ်အာ ကာမံက်တိုန်တံ စၞစဇွောံမ၊ ဍာ်ပလးသ္အးဇ္ၚးကေုာံ အရာမနွံပၟိက်ကိစ္စဇၞော်တံ က္တဵုဒှ်မံၚ်ရောၚ် သာ်ဝွံ ဂကောံဇာဖိုၚ်သၟတ် လေဝ်ကေကဝ် ရဲကဵုမံၚ်အရီုဗၚ် ညးပါဲဘဲပၞာန်တံ ပ္တိတ်လဝ် လိက်လလောၚ်တြးကီုရ။
ပရိုၚ် – သြၚ်လောန်တိုၚ်မ်
Photo – Social Media