ကျာ်ထဝ်၊ မာတ် ၁၈
ပ္ဍဲတွဵုရးမန်၊ ကရေၚ်ကေုာံ ရးတနၚ်သဳ ဍုၚ်ဗၟာလပါ်ဒေသ သၠုၚ်ကျာဂှ် ဒပ်ကဝ်မယှေန်ပၞာန် ဆက်ဖံက်ပကဝ်မံၚ် အခေါၚ်အရာမၞိဟ် လ္တူညးဍုၚ်ကွာန်တံ နကဵုနဲကဲနာနာရောၚ် ဇာဖိုၚ်ပရေၚ်ဓရ်ဗ္စာရဏာမၞိဟ်ဍုၚ်ဗၟာ သ္ကုတ်သၠုၚ်ကျာ SBHN ပ္တိတ်လဝ်လိက်လလောၚ်တြးရ။
ပ္ဍဲကဵုဂိတုဖေဖော်ဝါရဳမလောန်ကၠုၚ်ဂှ် ဒပ်ကဝ်မယှေန်ပၞာန်တံ ပၠံၚ်ၜးပလီုပလာ်လဝ်ကပေါတ်ဒြပ်ရတ် ညးဍုၚ်ကွာန်ကောန်အရပ်တံသၟးဟွံက ဟိုတ်နူပန်လဝ်လွဟ်ဇၞော်ကြာန်န်တံတုဲ ပရေၚ်ဒးဝပ်ချိုတ်တံနွံလဝ်ရောၚ် သ္ဂးရ။
တုဲပၠန် ဒပ်ကဝ်မယှေန်ပၞာန် အခိၚ်ထပက်ကရောၚ်ပၞာန်ဂှ် သီုရပ်စပ်မၞိဟ်တံကီု၊ ဍဵုဍိုက်ပျဲပျာံလဝ်တုဲ စကာညးဍုၚ်ကွာန်တံ နကဵုဂဒံၚ်မၞိဟ်လေဝ် ဆက်တုဲကၠောန်မံၚ်ရောၚ် SBHN ဟီုရ။
ဗွဲတၟေၚ် ပ္ဍဲတွဵုရးမန် ဒေသရေဝ်သၟဝ်ကျာ၊ ၜဳကလေၚ်ကေုာံ ပွိုၚ်ဍုၚ်ကျာ်ထဝ်တံမ္ဂး ဟိုတ်နူဒပ်ကဝ်မယှေန်ပၞာန် ထပက်မံၚ် ကရောၚ်ပၞာန်ဆက်က်ဂှ်ရ ညးဍုၚ်ကွာန်တံ ဒးထောံဌာန် ဒးဂြိပ်ပါဲမံၚ် ဆက်ဆက်တုဲ ဟိုတ်နူပန်မံၚ်ကဵုၜၚ်ကျာကီု လွဟ်ဇၞော်တံဂှ်တုဲ ပရေၚ်ချိုတ်ဒးဝပ်တံ မၞုံမံၚ်ရ။
ပ္ဍဲဖေဖော်ဝါရဳ ၂၂ လောန်ကၠုၚ်ဏအ်လေဝ် ဟိုတ်နူလွဟ်ဇၞော်တမ်ဒပ် ခမရ ၅၉၁ ဖျေံဒပ် ပ္ဍဲပွိုၚ်ဍုၚ်ရေဝ် ပန်ပ္တိတ်လဝ်ကြာန်န်ဂှ်ရ မၞိဟ်တြုံမွဲတၠချိုတ်အာတုဲ မၞိဟ်ပိတၠဒးဝပ်ဘဲဒဏ်နွံရ သာ်ဝွံ ချူထမံက်ထ္ၜးလဝ်ရ။
အတိုၚ်တင်နၚ်ပရိုၚ် ဇာဖိုၚ်ပရေၚ်ဓရ်ဗ္စာရဏာမၞိဟ်ဍုၚ်ဗၟာ သ္ကုတ်သၠုၚ်ကျာမ္ဂး ပ္ဍဲပွိုၚ်ဍုၚ်လ္ၚဵု တွဵုရးမန်၊ ကရေၚ်ကေုာံ တနၚ်သဳတံဂှ် ပေါဲဗတိုက်အောန်မံၚ်ကီုလေဝ် ဒပ်ကဝ်မယှေန်ပၞာန်ကဵု ဂကောံအုပ်ဓုပ်တံ ဟိုတ်နူဍဵုဍိုက်ပျဲပျာံမံၚ်ဂှ်ရ ညးဍုၚ်ကွာန်တံဒးဆဵုဂဗမံၚ်ကဵု အကာဲအရာပရေံပရေံ လၟေၚ်ၚ်တ္ၚဲနွံမံၚ်သ္ဂးရ။
ပြဟ်ဟ်ဏံ ဟိုတ်နူဒပ်ကဝ်မယှေန်ပၞာန် ထပက်ကရောၚ်ပၞာန်ကီု သီုကဵုပန်မံၚ်လွဟ်ဇၞော်တုဲ သွက်ညးဍုၚ်ကွာန်ကရပ် ၂၀၀၀၀ တၠ မၞုံပ္ဍဲဒေသပဋိပက္ခတံ နွံမံၚ်ပၟိက်ကဵု ပရေၚ်အရီုဗၚ်ဗ္စာရဏာ မၞိဟ်တံရောၚ် SBHN ဟီုလဝ်ရ။
ပရိုၚ် – သြၚ်လောန်တိုၚ်မ်
Photo – KNU