မတ်မလီု၊ မာတ် ၁၈
ပ္ဍဲတွဵုရးမန် ဟိုတ်နူကၠေၚ်စက်ပိုတ်အာဂှ်ကီု သွက်ဂွံရာန်ဒှ်မံၚ်အခက်အခုဲတုဲ ပ္ဍဲဖျာမ္ၚးကၠေၚ်စက်မွဲလေတ်မ္ဂး ဒးရာန်မံၚ် သြန်မွဲဠက်ဒကေဝ်ပြၚ်အာမံၚ်ယျ ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဒေသတံမ္ဂး ဟိုတ်နူပေါဲပၞာန်အဳရာန်တုဲ စနူဂိတုမာတ်မံက် လောန်ကၠုၚ်ဏအ်ရ အတိုၚ်နွံပၟိက် ရာန်ကၠေၚ်စက်ဟွံဂွံ၊ ဒးၜေတ်ရေၚ်မၚ်မံၚ်အခိၚ်လအ်လတံ နကဵုသၞောတ်ကွဳစက်စောံမဟေၚ် သွံမံၚ်တုဲ ပရေၚ်အခက်အခုဲကၠေၚ်စက် ကတဵုဒှ်မံၚ်ရောၚ်။
ဟိုတ်နူပရေၚ်အခက်အခုဲကၠေၚ်စက်တုဲ ညးမရာန်ခြိုၚ်ဒေပ်စွံလဝ်ကၠေၚ်စက်တံဂှ် သွံမံၚ်ပ္ဍဲဖျာဒမၠု အတိုၚ်ပၟိက်စိုတ် ပတိုန်လဝ်ၚုဟ်မးတုဲ သွံမံၚ်မွဲလေတ်မ္ဂး ၚုဟ်မးစိုပ်အာ ဒဵုကဵုမွဲဠက်ဒကေဝ်ပြၚ် မဒှ်ရ။
ပ္ဍဲကဵုဆေၚ်ကၠေၚ်စက်ဗွဲမဂၠိုၚ်ဂှ် ရာန်ကၠေၚ်စက်ဟွံဂွံတုဲ ပ္ဍဲဖျာဒမၠုဂှ်မွဲလေတ်မ္ဂး ဒးရာန်မံၚ် မွဲဠက်ဒကေဝ်ပြၚ်မံၚ်ရောၚ် ညးဒေသတွဵုရးမန်မွဲတၠ ဟီုရ။
“အဓိကဂှ်တှ်ေ ဟိုတ်နူကၠေၚ်စက်ရ။ ကွဳလိုန်ဓါတ်နွံမံၚ်ကီုလေဝ် မွဲမလေဝ် ဍိုက်ဟွံဂွံပုဟ်။ တ္ၚဲမ အာရာန်လေဝ်ဟွံဂွံ၊ တ္ၚဲစောံ အာရာန်လေဝ်ဟွံဂွံ။ ဒှ်အာအခက်အခုဲဗွဲမလောန်။ ညးသွံဖျာဒမၠုတံ နွံမံၚ်၊ မွဲဗူတှ်ေ ဒးကဵု ၁၂၀၀၀ ဒကေဝ်။ ဆဂး မိက်ဂွံရာန်လေဝ် ရာန်ဟွံဂွံပုဟ်” သာ်ဝွံ သ္ဂးရ။
တုဲပၠန် အတိုၚ်ၚုဟ်မးခုတ်စၟတ်လဝ် နူကဵုဆေၚ်ကၠေၚ်စက်တံ သွက်ဂွံသွံကဵုကၠေၚ်စက် ရုံရုံဂပ်ဂပ်မာန်ဂှ် လပါ်ကဝ်မယှေန်ပၞာန် ထေက်ကဵု ဒးဖန်ဖက်ကၠောန်ကဵုတုဲ နူကဵုဆေၚ်ဖျာဒမၠုတံ ဟိုတ်နူ ဒးရာန်မံၚ်ၚုဟ်မးသၠုၚ်ၚ် ဗီုဏအ်တုဲ ၚုဟ်ကပေါတ်တံလေဝ် သၠုၚ်တိုန်အာမာန်ရောၚ် ညးဆက်ဟီုရ။
အတိုၚ်ၚုဟ်မး ကဝ်မယှေန်ပၞာန်ခုတ်စၟတ်လဝ်မ္ဂး ပ္ဍဲတွဵုရးမန် ကၠေၚ်ဓာတ် 95 မွဲလေတ်တှ်ေ ကြပ်စိုပ် ၃၅၀၀ ဒကေဝ်၊ ကၠေၚ်ဓာတ် 92 မွဲလေတ်တှ်ေ ၃၃၀၀ ဒကေဝ်ပြၚ်၊ ကၠေၚ်ဒဳဇြေလ်ပရဳမဳယာမ် မွဲလေတ် ၄၂၀၀ ဒကေဝ်ပြၚ် ၚုဟ်မးနွံမံၚ် မဒှ်ရ။
ၜိုန်ရ ပရေၚ်ကၠေၚ်စက်ပိုတ် ကတဵုဒှ်မံၚ်ဏံကီုလေဝ် ပ္ဍဲဍုၚ်ဗၟာဂှ် ကၠေၚ်ဒေပ်စွံလဝ် သွက်၄၀ တ္ၚဲ နွံမံၚ်တုဲ ရာန်လဝ်ကၠေၚ်စက် ဖ္ဍိုက်လဝ်ၜၚ် နွံမံၚ် ၁၉ မဏီရောၚ် ပ္ဍဲမာတ် ၁၄ လောန်ကၠုၚ်ဏအ်ဂှ် ညးအခေါၚ်ဟီုဂးနွံ ကဝ်မယှေန်ပၞာန် သ္ကိုပ်ပၞာန် ဇြဝ်မေန်ထောန် ဟီုလဝ်ရ။
ပရိုၚ် – သြၚ်လောန်တိုၚ်မ်
Photo – CJ