ဝါယှေန်တန်၊ မာတ် ၁၈
ယဝ်ရဗတိုက်အဳရာန်မ္ဂး လ္တူမဟာမိတ်အမေရိကာန် မၞုံပ္ဍဲပ္ၚံက်ၜဳတံဂှ် အဳရာန်ကလေၚ်ပ္လန်တဲတုဲ ဗတိုက်ကၠုၚ်မာန်ရောၚ် သာ်ဝွံ ဒစးဒုၚ်ကဵုလဝ်သတိကုသမ္မတ ဒဝ်နယ်ထရရောၚ် သာ်ဝွံ ရိုဟ်ကၞက်ပရိုၚ်ၜါဒၞာဲ ကေုာံ ညးတာလျိုၚ်မွဲတၠ မစုက်လုက်ကဵုထံၚ်ပရိုၚ်အမေရိကာန်တံ ဟီုလဝ်ရ။
ၜိုန်ရဒစးဒုၚ်ဟီုလဝ်ဗီုဏံကီုလေဝ် ပရေၚ်အဳရာန်ကလေၚ်ပ္လန်တဲဂှ် ဆဵုလဝ်ဗီုဟွံခယျလဝ်တံရောၚ် သမ္မတထရ ဟီုလဝ် ပ္ဍဲမာတ် ၁၆ ရ။
ကၠာဟွံဒှ်ပေါဲပၞာန်ဏီ အတိုၚ်ပရေၚ်လ္ၚတ်ထံၚ်ပရိုၚ်ဂှ်တှ်ေ အဳရာန်ကလေၚ်ပ္လန်တဲမာန် ဟွံဗိုန်ဗတ်ကၠံတၟံကၠမ်ပေၚ်ၚ်ကီုလေဝ် ပ္ဍဲစရၚ်သွဟ်ကတဵုဒှ်ကၠုၚ်မာန်တံမ္ဂး ပါလုပ်လဝ်ဗွဲချိုတ်ပၠိုတ်ရောၚ် သာ်ဝွံ ရိုဟ်ကၞက်ပရိုၚ်ဟွံမိက်ထမံက်ယၟုမွဲတၠ ဟီုရ။
ပရေၚ်အဳရာန်ကလေၚ်ပ္လန်တဲဗတိုက် လ္တူဍုၚ်ကာတာ၊ သဝ်ဒဳအာရေဗဳယျာ၊ ယူအေအဳ၊ ဗာရုၚ် ကေုာံ ကူဝုက်တံဂှ် ဒှ်ကိစ္စဟွံတော်ခယျလဝ်ရောၚ် ပ္ဍဲမာတ် ၁၆ ဂှ် သမ္မတထရ ဟီုထမံက်လဝ် ၜါဝါကီုရ။
သွက်ဂွံဗတိုက်အာ ဍုၚ်တၞဟ်ဟ်တံ ပ္ဍဲဒေသဗၟံက်ဒေသအဒေါဝ်ဂှ် လပါ်အဳရာန် ဖန်ကၠောန်လဝ် ဟွံသေၚ်ပုဟ် သမ္မတထရ ဟီုရ။
ပရေၚ်ဗတိုက်ကၠုၚ်ဗီုတံဏအ် ကတဵုဒှ်ကၠုၚ်မာန်ရောၚ်ဂှ် ညးမွဲလေဝ် ဟွံစၟဳစလဝ်အိုတ်ပုဟ်၊ ပိုဲတံဒးလကိုတ်အာကီု သာ်ဝွံ သမ္မတထရ ဟီုရ။
ယဝ်ရဗတိုက်ကၠုၚ် အဳရာန်မ္ဂး အဳရာန်တံကၟာတ်ဆိုအ်ထောံ ကိစ္စဇၞော်သွက်အရာပရေၚ် ပိုန်ဒြပ် ပ္ၚံက်ၜဳဟဝ်မုဇ်ဂှ်လေဝ် ကဵုလဝ်သတိကု သမ္မတထရကီုရောၚ် ရိုဟ်ကၞက်ပရိုၚ်တၞဟ်မွဲ ဟီုရ။
ပ္ဍဲပွိုၚ်ၜါသတ္တဟလောန်ကၠုၚ်ဏအ် ပ္ဍဲဍုၚ်ပ္ၚံက်ၜဳတံ ဗ္ဒိုပ်သ္ဇိုၚ်ပၞာန်အမေရိကာန်တံ ဗ္ဒိုပ်သ္ဇိုၚ်ပၞာန်ပြၚ်သေတ်တံ ကေုာံ ဟဝ်တေဝ်တံ၊ သၞေဟ်ၜၚ်ကျာတံ ကေုာံ စမြိုၚ်ဇြဟတ်ဓါတ်တံ သီုကဵုဒၞာဲညးဍုၚ်ကွာန်တံလေဝ် အဳရာန်စကာဒရုၚ်၊ ကမ်သၠောဝ်တုဲ ဗတိုက်ကၠုၚ်လဝ်ရ။
အဳရာန်ဝွံ ကမ်သၠောဝ် မပန်စိုပ်မာန် ဒဵုတိဍာ်အမေရိကာန်တံဂှ် ပ္ဍဲကာလဟွံလံမ္ဂး ပိုင်ပြဳကၠုၚ်မာန်ရောၚ်။ သွက်ဂွံပ္တိတ်လွဟ်နျူကလဳယျာဂှ် ဒးကေတ်အခိၚ် ၜိုတ်ပန်သတ္တဟဓဝ်ရောၚ် ပရေၚ်ဟီုဂးမံၚ်တံဂှ် လပါ်ထံၚ်ပရိုၚ်အမေရိကာန်တံ ဟွံထံက်ဂလာန်ပုဟ် ဂွံတီကေတ်ရ။
သွက်ဂွံဒးစကၠောန်ပေါဲပၞာန်ဂှ် သွက်အမေရိကာန်ကဵု အေဿရေဝ်တံ ပရေၚ်အန္တရာယ်ဟၟဲပုဟ် အမာတ်စၠတ်ဓဝ်ဒဳမဝ်ကရက်တံ ဟီုရ။
ယဝ်ရဗတိုက်အဳရာန်မ္ဂး ပေါဲပၞာန်ပ္ဍဲဒေသ သၠဲလးပြးဇးတိုန်အာမာန်ရောၚ် ဒစးဒုၚ်ကဵုလဝ်သတိ ကုသမ္မတထရ တုဲတုဲရောၚ် ရိုဟ်ကၞက်ပရိုၚ်တံ ဟီုရ။
ၜိုန်ရကဵုလဝ်သတိဗီုဏံကီုလေဝ် အေဿရေဝ် ကေုာံ အမေရိကာန်တံ စပ္တံဗတိုက်အဳရာန် ပ္ဍဲကဵုဖေဖော်ဝါရဳ ၂၈ မဒှ်ရ။
ပရိုၚ် – သြၚ်လောန်တိုၚ်မ်
Ref:Reuters