ဘာအၚ်၊ မာတ် ၁၉
ပ္ဍဲတွဵုရးကရေၚ် ဍုၚ်ဘာအၚ် ဟိုတ်နူပရေၚ်အခက်အခုဲ သွက်ဂွံရာန်ကၠေၚ်စက်တုဲ ပ္ဍဲဖျာဒမၠုဂှ် မွဲလေတ်မ္ဂး ၚုဟ်တိုန်စိုပ်အာ ဒဵုကဵုမွဲဠက်ဘာ်ဒကေဝ်ကီုလေဝ် ရာန်အတိုၚ်နွံပၟိက်ဟွံဂွံပုဟ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
သွက်ဂွံရာန်ကၠေၚ်စက်ဂှ် လပါ်ကဝ်မယှေန်ပၞာန်တံ ခုတ်စၟတ်လဝ်သၞောတ်စောံမတုဲ ကွဳစက်လာၚ်သေန်ဟၟဲတံ ကၟာတ်လဝ်အခေါၚ် သွံကဵုကၠေၚ်စက်ကီုလေဝ် ပ္ဍဲဆေၚ်ကၠေၚ်ဇၞော်ဇၞော် မၞုံပ္ဍဲဍုၚ်ဘာအၚ်တံပၠန် သွက်ကွဳစက်၊ ကွဳလိုန်ဓါတ် ဗွဲမဂၠိုၚ်ဒးၜေတ်ရေၚ်မၚ်မံၚ် နူဂယးပြဟ်တုဲ ဒးမင်ရာန်မံၚ်ရ။
ပ္ဍဲဆေၚ်ကၠေၚ်ဇၞော်ဇၞော်တံမ္ဂး အတိုၚ်ၚုဟ်မးကဝ်မယှေန်ပၞာန်ခုတ်စၟတ်လဝ်ဂှ် သွံကဵုမံၚ်နကဵုအပိုၚ်အခြာဟေၚ်တုဲ ကွဳလိုန်ဓါတ် မၞုံကဵုလာၚ်သေန်မွဲမမ္ဂး ၅၀၀၀ ဒကေဝ်၊ ကွဳသၠာပိ (အိုးဝေ)လိၚ်စ တံမ္ဂး ၁၀၀၀၀ ဒကေဝ်၊ ကွဳစက်တံမ္ဂး ၃၀၀၀၀ ဒကေဝ် သွံကဵုမံၚ် မဒှ်ရ။
ဆဂး ပ္ဍဲဖျာဒမၠုကၠေၚ်စက်ဂှ်တှ်ေ မွဲလေတ် နူ ၉၀၀၀ ဒဵုကဵု ၁၅၀၀၀ ဒကေဝ် ၚုဟ်မံက်မံၚ်တုဲ ပ္ဍဲဖျာဒမၠုဂှ်လေဝ် ရာန်ကၠေၚ်စက်ဝါတ်မံၚ်သၟးဟွံက ဟိုတ်နူၚုဟ်ကၠေၚ်စက်ဖျာဒမၠု သၠုၚ်တိုန်အာဟွံတန်ကဵုအဆတုဲ ၚုဟ်လိၚ်ကွဳသၠာပိ (အိုးဝေ) လေဝ် သၠုၚ်တိုန်မံၚ်ကီုရောၚ် သၟာဒဳကွဳသၠာပိမွဲတၠ ဟီုဂးလဝ်ရ။
လၟုဟ်ဝွံ ပ္ဍဲဆေၚ်ကၠေၚ်ဇၞော် မၞုံပ္ဍဲဍုၚ်ဘာအၚ်တံဂှ် ကောန်ဂကောံဒပ်မၚ်ကွာန် (ပြည်သူ့စစ်) ဂကောံပရေၚ်ဂီုကၠီု ညးဍုၚ်ကွာန်ကဝ်မယှေန်ပၞာန်တံ ဗက်စၟဳစၟတ်မံၚ်ကွဳစက်ကၠုၚ်စုတ်ကၠေၚ်တံရ။
တုဲပၠန် ကြဴနူ ပေါဲသှ်လိက်ဘာလုပ်တန်တက္ကသိုလ်တုဲမ္ဂး နကဵုသၞောတ်စောံမဂှ် လပါ်ကဝ်မယှေန်ပၞာန်တံ ဗက်စၟဳစၟတ်ရပ်စပ်အာသၟးဟွံက သီုကဵုကွဳစက်လာၚ်သေန်ဟၟဲတံဂှ်လေဝ် ကလေၚ်ရပ်စပ်အာပၠန်ရောၚ် ဂွံတီနူညးဍုၚ်ကွာန်တံရ။
ဟိုတ်နူၚုဟ်ကၠေၚ်စက်သၠုၚ်တိုန်ဂှ်ရ ရာန်လေဝ်ဝါတ်အာ၊ ဟိုတ်နူ ဒးမၚ်ရာန်ဂှ် အခိၚ်အိုတ်၊ ဟိုတ်နူစၟတ်ပိုၚ်ခြာလဝ်သၞောတ်စောံမတံကီု၊ သီုကဵုပရေၚ်ရပ်စပ်ကွဳစက်လာၚ်သေန်ဟၟဲတံတုဲ ပ္ဍဲဍုၚ်ဘာအၚ် ၚုဟ်လိၚ်ကွဳစက် ဆက်တုဲသၠုၚ်တိုန်အာ မဒှ်ရ။
မွဲလပါ်ပၠန် ဟိုတ်နူအခက်အခုဲကၠေၚ်စက်တုဲ ကမၠောန်လ္ၚဵုတံ ဒးကၟာတ်ထောံလဝ်နွံ၊ ၚုဟ်ကပေါတ်သၠုၚ်တိုန်အာကီု ပရေၚ်သွံရာန်ဟွံခိုဟ်၊ ပ္ဍဲကမၠောန်ပရေၚ်အာတရဴ ကၟုဲကၠုၚ်ဝေၚ်တံ စဵုကဵုဟၟဲ အောန်ကွေံကွေံရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media