ၜဳကလေၚ်၊ မာတ် ၁၉
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ဒၞာဲခါဲထဝ် ယှိုဲမျဝ် ကောန်ဍုၚ်ကြုက်တံကၠောန်မံၚ် ကရပ်ကွာန်ဝေန်ကလေဝ်ဂှ် ဟိုတ်နူ ဒးဒုၚ်ကြဳဗုမ်တုဲ ပရေၚ်ချိုတ်ဒးလဝ်ဝပ်တံဂၠိုၚ်မာန်ရောၚ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုဂိတုမာတ် ၁၆ အခိၚ်နူဂယး ၁၁ နာရဳဂှ် ဒၞာဲခါဲထဝ် ယှိုဲမျဝ်ကြုက် မၞုံကရပ်ကွာန်ဝေန်ကလေဝ်ဂှ် ဒပ်ကဝ်မယှေန်ပၞာန် ကၠုၚ်ကြဳဖျေံဗုမ် နူကဵုဗလးကျာ ပိမ မဒှ်ရ။
အတိုၚ်တၚ်နၚ်ပရိုၚ် ဌာန်ပရိုၚ်သြၚ်လောန်တိုၚ်မ် ဂွံလဝ်တံမ္ဂး ပ္ဍဲအရာကြဳဗုမ်ဏံဂှ် သၟာကမၠောန်ယှိုဲမျဝ် ဟွံအောန်နူၜါတၠ ချိုတ်အာတုဲ သီုကောန်ဍုၚ်ကြုက်သၟာကမၠောန်ယှိုဲမျဝ် လၟိဟ်ကဵုစှော်တံ ဒးအာဝပ်ဘဲဝပ်ဇၞော်ကဵုဇြဟတ်ရောၚ် ဂွံတီကေတ်ရ။
ဟိုတ်နူဒပ်ကဝ်မယှေန်ပၞာန် ကြဳလဝ်ဗုမ် ဒၞာဲခါဲထဝ်ယှိုဲမျဝ် ၜါဒၞာဲဂှ် ပၟတ်တူအာလဝ်တုဲ အကာဲအရာချိုတ်ဒးဝပ်တံဂှ် ဆက်ဂၠိုက်ဂၠာဲမံၚ်ချိုတ်တ်ပၠိုတ်တ်ရ။
ပ္ဍဲကရပ်ကွာန်ဝေန်ကလေဝ်ဂှ် ဒၞာဲခါဲထဝ်ယှိုဲမျဝ် ကောန်ဍုၚ်ကြုက်တံကၠောန်မံၚ် နွံကြပ် ၃၀ ဒၞာဲတုဲ ကောန်ဍုၚ်ကြုက် လၟိဟ်ကဵုကၠံတံကၠုၚ်မံၚ်ဒၟံၚ်ရောၚ် သ္ဂးရ။
ကောန်ဍုၚ်ကြုက် ကၠောန်မံၚ်ယှိုဲမျဝ် ဗွဲမဂၠိုၚ်တံဂှ် ဒှ်ညးလုပ်ကၠုၚ် နကဵုဂၠံၚ်ဟွံလုပ်သၞောဝ်တံရောၚ်ဂှ် နူတင်နၚ်ပရိုၚ်ဒေသတံ ဟီုလဝ်ကဵု ဌာန်ပရိုၚ်သြၚ်လောန်တိုၚ်မ်ဂှ် ဂွံတီရ။
ပ္ဍဲကွာန် မၞုံအကြာကြုၚ်ၜဳကလေၚ် ပွိုၚ်ဍုၚ်ၜဳကလေၚ်တံဂှ် ဒၞာဲခါဲထဝ်ယှိုဲမျဝ် နွံမံၚ် ၁၀၀ ဒၞာဲပြၚ်၊ ကြဴနူဒပ်ပၞာန်သီအဝဵုတုဲဂှ်တှ်ေ ပ္ဍဲဒၞာဲတံဏံ ကောန်ဍုၚ်ကြုက်ဗွဲမဂၠိုၚ်တံ ကၠုၚ်စိုပ်တုဲကၠောန်မံၚ် ကမၠောန်ယှိုဲမျဝ်တံရောၚ်။
ပ္ဍဲကဵုဂိတုမာတ် ၁၂ လောန်ကၠုၚ်ဏအ်ဂှ်လေဝ် ကွာန် ၅ ကွာန် မၞုံပ္ဍဲပယျဵု ပွိုၚ်ဍုၚ်ၜဳကလေၚ်ဂှ် ဟိုတ်နူၜၚ်ကျာ ကြဳဗုမ်တုဲ ညးဍုၚ်ကွာန်ကောန်အရာပ် ၜါတၠချိုတ်တုဲ၊ ဟွံအောန်နူ ၁၈ တၠ ဒးလဝ်ဘဲဝပ်တံနွံရ။
ပရိုၚ် – သြၚ်လောန်တိုၚ်မ်
Photo – CJ