မတ်မလီု၊ မာတ် ၁၉
ပ္ဍဲတွဵုရးမန် ပေါဲသှ်လိက်လုပ်တက္ကသိုလ် သၞာံ ၂၀၂၆ တုဲဗက်ဂှ်တှ်ေ အလဵုအသဳတွဵုရးမန် သၟဝ်တဲကဝ်မယှေန်ပၞာန်တံ ကလေၚ်ကဵုအခေါၚ်ပံက်ဝိုၚ်ဝေၚ်ဇၞော်ကဵုဇြဟတ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကဝ်မယှေန်ပၞာန်ဝွံ တ္ရဲသှ်လိက်လုပ်တက္ကသိုလ် စပ္တံကၠောန်ဗဒှ်လဝ် နူဂိတုမာတ် ၁၁ တုဲ စိုပ်မာတ် ၁၇ ဂှ် တုဲဒှ်အာ မဒှ်ရ။
ကဝ်မယှေန်ပၞာန် တွဵုရးမန်ဝွံ ပေါဲသဘၚ်ကေုာံ ဝိုၚ်ဝေၚ်တံဂှ် ပ္ဍဲအခိၚ်သှ်မံၚ်လိက်မ္ဂး ကဵုဒေါအ်ဇူလဝ်ယာယဳကီုလေဝ် ပ္ဍဲဗ္တံမာတ် ၁၇ ပေါဲသှ်လိက်တုဲဗက်ဂှ် ကလေၚ်ကဵုအခေါၚ်ကၠောန် ပံက်ဝိုၚ်ဝေၚ်ရ။
ဟိုတ်နူကလေၚ်ကဵုအခေါၚ် ပံက်ဝိုၚ်ဝေၚ်ဂှ်ရ သၟတ်တံပဵုတုဲလီုလာ်ကၠုၚ်မာန်တုဲ ပရေၚ်ကၠတ်ဂၠံက်ပၠံၚ်ၜးတံလေဝ် ဂၠိုၚ်တိုန်မာန်ရောၚ် သၟတ်ဗၠာဲဒေသမွဲတၠ ဟီုရ။
“အဓိက ဝိုၚ်ဝေၚ်ကၠုၚ်မ္ဂး ပရေၚ်ကၠတ်ဂၠံက်ပၠံၚ်ၜးစ တောဲပါကၠုၚ်ရ။ ယဝ်ဝေၚ်ကျအာမ္ဂး အရာဟွံထေက်ကဵုဒှ်တံ ဒှ်ကၠုၚ်မာန်။ အရာဟွံကၠောန်ထေက်တံ ကၠောန်ကၠုၚ်မာန်။ သၟတ်လ္ၚဵုတံ ယဝ်စိုတ်လုပ်စဝိုၚ်ဝေၚ်မ္ဂး စိုပ်အာလပါ်တေံရ။ ကဵုအခေါၚ်ဝိုၚ်ဝေၚ်မ္ဂး နူတမ်မူလဂှ် အကာဲအရာသၟတ်တံ ဟွံပြေပြံၚ်မံၚ်ရတှ်ေ ပဵုတုဲလီုလာ်အာဏီရောၚ်” သာ်ဝွံ သ္ဂးရ။
တုဲပၠန် လၟုဟ်ဝွံ ဒှ်အခိၚ်ဘာကၟာတ်တုဲ အခိၚ်ကောန်ၚာ်၊ သၟတ်တံသၠးမံၚ်ဏံ ဟိုတ်နူကဵုအခေါၚ်ပံက်ဝိုၚ်ဝေၚ် ဟၟဲကဵုဂုဏ်ဖဵုတအ်တုဲ စိုတ်ဓာတ်ကဵုဒဂေတ်ပဋိပတ်တံ ပဵုတုဲလီုလာ်ကၠုၚ်မာန်ရောၚ် ညးဆက်ဟီုရ။
မွဲလပါ်ပၠန် ကၠာဟွံဒက်ပတန်အလဵုအသဳတၟိဏံ ကဝ်မယှေန်ပၞာန်တွဵုရးမန်ဝွံ သွက်ဂွံပံက်အာဝိုၚ်ဝေၚ်ဂှ် နူကၠာဟွံသှ်လိက်ဏီ ဒစးဒုၚ်ကဵုလဝ်အခေါၚ်ပါမေတ် သွက်သ္ကိုပ်အုပ်ဓုပ်ကွာန်၊ အရာပ်တံ တုဲတုဲရောၚ်။
ပ္ဍဲဒေသတံဏံမ္ဂး ပေါဲသဘၚ်ကျာ်၊ ပေါဲလံၚ်ဗဗေၚ်ဇၞော်၊ ပေါဲလးကထိုန်ကဵု ပေါဲလၟေၚ်ရာသဳတံဟွံသၟးက သီုကဵုပေါဲမိပ်လဟိၚ်နာနာတံလေဝ် ကဵုအခေါၚ်ပံက်ဝိုၚ်ဝေၚ် မဒှ်ရ။
သြန်လုပ်နူဝိုၚ်ဝေၚ်တံဂှ် သ္ကိုပ်ဝန်ဇၞော် ညးမယိုက်ဝန်တွဵုရးမန် သၟတ်တဲကဝ်မယှေန်ပၞာန်ကေုာံ ညးတာလျိုၚ်အဆံၚ်ဆံၚ်တံ ပါ်ပရအ်ကေတ်အိုတ်တုဲ သီုကဵုညးတာလျိုၚ်ပၞာန်အဆံၚ်သၠုၚ် နူဌာန်ဂအုပ်ပၞာန် ရးအဂၞဲတံလေဝ် ပါ်ပရအ်ကဵုလဝ်နွံကီု ဂွံတီကေတ်ရ။
ပ္ဍဲတွဵုရးမန်ဝွံ ဟိုတ်နူကဵုအခေါၚ်ဝိုၚ်ဝေၚ် ညံၚ်ရဴလုပ်သၞောဝ်ဂှ်တုဲ ပ္ဍဲဒေသမ္ဂး ပရေၚ်ကၠတ်ကွဳလိုန်ဓာတ်၊ ပရေၚ်ကၠတ်ဂၠံက်ပၠံၚ်ၜးတံသၟးဟွံက သီုကဵုကွးဘာကေုာံ သၟတ်အယုက်ဟွံပေၚ်တံလေဝ် ဒဂေတ်ပဋိပတ် လီုလာ်က္တဵုဒှ်မံၚ် မဒှ်ရ။
ပရိုၚ် – သြၚ်လောန်တိုၚ်မ်
Photo – CJ