ဝါယှေန်တန်၊ မာတ် ၂၀
သွက်ဂွံဗပေၚ်ဇြဟတ် လဝေၚ်ပၞာန် ဒေသဗၟံက်အဒေါဝ် ဂှ် အလဵုအသဳ သမ္မတ အမေရိကာန် ဒဝ်နေဝ်ထရ အဃောချပ်မံၚ်ရ။
ဟိုတ်နူပေါဲပၞာန်အဳရာန် ထပ်မွဲအဆံၚ်ပၠန် အသိၚ်သၠုၚ်တိုန်မာန်တုဲ ဒပ်ပၞာန်အမေရိကာန်တံ အဃောဒစးဒုၚ် ပလေဝ်စမံၚ်ရောၚ် သာ်ဝွံ ရိုဟ်ကၞက်ပရိုၚ် ပိဒၞာဲ ကေုာံ ညးတာလျိုၚ်အမေရိကာန်မွဲတၠ မစုက်လုက်ကဵုကိစ္စဏအ် ဟီုထမံက်လဝ်ရ။
ပရေၚ်ဗတိုက်မံၚ်အဳရာန် အခိၚ်လုပ်စိုပ်ကၠုၚ် သတ္တဟအလန်တတိယဏံ ယဝ်ရနူအမေရိကာန် ဖျေံစွံကောန်ပၞာန်မ္ဂး သွက် ဒဝ်နေဝ်ထရ ဂွံဆက်ကၠောန်အာ လဝေၚ်ပၞာန်မာန် တၚ်ရုဲစှ်ဂမၠိုၚ် မၞုံကၠုၚ် မဒှ်ရ။
အပ္ဍဲတၚ်ရုဲစှ်တံဏအ်မ္ဂး ပရေၚ်မၚ်မွဲဂၠံၚ်တရဴဗၞိက် ကိစ္စဇၞော်သွက်ဂၠးကဝ် ပ္ၚံက်ၜဳဟဝ်မုဇ်ကီု သီုကဵုဖျေံကောန်ဒပ်ပၞာန် ကြပ်ကဵု ဇိုသၚ်ၜဳအဳရာန်တံ ပါလုပ်မံၚ်ရောၚ်။
ဇရေၚ်တ္ကအ်ကာချ် ဒၞာဲပ္တိတ်ကၠေၚ်ဍေၚ် အဳရာန် ၉၀% ဂှ် အမေရိကာန် အဃောစဳဇန်မံၚ် သွက်ဂွံဗလးဏာ ဒပ်တိုက်တိရောၚ် ရိုဟ်ကၞက်ပရိုၚ်တံ ဟီုရ။
ဟိုတ်နူအဳရာန်တံ ပန်ကမ်သၠောဝ် စိုပ်တ္ကအ်ကာ့ချ်မာန်တုဲ ယဝ်ရဖျေံစွံလဝ် ကောန်ဒပ်အမေရိကာန်တံမ္ဂး ဘဲအန္တရာယ်ဂၠိုၚ်မာန်ရောၚ် ညးတာလျိုၚ်အမေရိကာန်မွဲတၠ ဟီုရ။
အမေရိကာန်တံ ပ္ဍဲမာတ် ၁၃ ဂှ် ဗတိုက်လဝ်ဒၞာဲပွန်ပၞာန် မၞုံလ္တူတ္ကအ်ဂှ်တုဲ သွက်ဂွံဆက်ဗတိုက် စမြိုၚ်ဇြဟတ်ဓါတ်တံပၠန် ဒဝ်နေဝ်ထရ ဘပဠလဝ်ရ။
ဆဂး စၞးပလီုထောံ သွက်ပရေၚ်ပိုန်ဒြပ်အဳရာန် တ္ကအ်ကိစ္စဇၞော်ဏံမ္ဂး ထိၚ်ချုပ်ရပ်စပ်ထောံဂှ် ပဵုတုဲခိုဟ်မာန်ရောၚ် တၠပညာတံ ထံက်ထ္ၜးလဝ်ရ။
ၜိုန်ရစကာဒပ်တိုက် နကဵုအပိုၚ်အခြာကီုလေဝ် သွက် ဒဝ်နေဝ်ထရ မ္ဂး ပရေၚ်ထံက်ဂလာန် နူညးဍုၚ်ကွာန်တံ ယအ်စှ်ေအာ ကၠးကၠးမးမးမာန်ရောၚ်။
သွက်ဂွံအာကေတ် ယူရေနဳယာန်တောမ်သ္အးတုဲတုဲ နူအဳရာန်မာန် အမေရိကာန်တံ စဳဇန်ဗလးမံၚ် ဒပ်တိုက်ရောၚ် ညးတာလျိုၚ်အမေရိကာန်မွဲတၠ ဟီုရ။
သွက်ဂွံဗလးဏာ ဒပ်တိုက် နူအမေရိကာန် ဇရေၚ်အဳရာန်ဂှ် ချိုတ်ပၠိုတ်မံၚ်ရောၚ် ရိုဟ်ကၞက်ပရိုၚ်မွဲ ဟီုလဝ်ရ။
Ref:Reuters