ဝါယှေန်တန်၊ မာတ် ၂၁
ကောန်ဍုၚ်သေင်ကာပူ မွဲတၠ ဟိုတ်နူ ဟီုဂးသ္ပလဝ်သအေဝ်သအာ်လဝ် လ္တူညးမဒက်ပ္တန်နိဂီုဍုၚ် လဳကွာန်ယု ညးဂမၠိုၚ်တီညာတ်ပြာကတ်ဂၠိုၚ်ဂှ် သွက်ဂွံပတိုန်အမှု ပ္ဍဲဍုၚ်ဌာန်မိဇကုတုဲ အမေရိကာန် ပလံၚ်ဖျဴဏာယျ။
စပ်ကဵုဗဳဒဳယဝ် ပါ်ပါဲပရေၚ်ဘာသာတုဲ အမိုစ်ယီ ဒးဒုၚ်ဖျေံထံၚ်ၜါဝါ ပ္ဍဲသေင်ကာပူတုဲ ပ္ဍဲသၞာံ ၂၀၁၇ ဂှ် ဂွံလဝ်အခေါၚ်ဇူဒီု ပ္ဍဲဍုၚ်အမေရိကာန်ရ။
ဆဂး ပ္ဍဲသၞာံ ၂၀၂၀ ဂှ်တှ်ေ ဟိုတ်နူဂွံလဝ်ဗဳဒဳယဝ်ပပ်ပဳကောန်ၚာ် ကေုာံ ဒုဟ်ဒဏ်စပ်ကဵုပရေၚ်လိၚ် လ္တူကောန်ၚာ်ဗြဴ အယုက် ၁၄ သၞာံတုဲ ပ္ဍဲအမေရိကာန်ဂှ် ဒးဒုၚ်ထပ်ဖျေံထံၚ် မွဲဝါပၠန်ရ။
ကြဴနူဂှ် ယီ ညးမဗၠးတိတ်ကၠုၚ်နကဵုတၚ်ဒုၚ်လျိုၚ်ဂှ် သွက်ဂွံရပ်စပ်ဂှ် ပ္ဍဲနဝ်ဝေမ်ဗါ သၞာံလောန်ကၠုၚ်ဏအ် ညးတာလျိုၚ် လဝကတံ ထပ်ဂစာန်ကၠုၚ်ပၠန်ရ။
လ္တူသၟတ်အယုက် ၂၇ သၞာံဏံ ပ္ဍဲရုၚ်သၞောဝ်ဓဝ်သေင်ကာပူ ပ္ဍဲမာတ် ၂၀ ဂှ် ပတိုန်ရုၚ်စၟဳစၟတ်တုဲ ဒးဒုၚ်စောဲလဝ်အမှု စပ်ကဵုပရေၚ်ပါဲဓလေတ်သၞောဝ်ယိုက်ဝန်ပၞာန်ရောၚ် စၟဳစလဝ်ရ။
သအာၚ်နူအမှုပါဲဓလေတ်သၞောဝ်ယိုက်ဝန်ပၞာန်တုဲ အမှုတၞဟ်တံ ဆက်ဒးဆဵုဂဗမာန်ဏီဟာဂှ် ကၠးကၠးမးမး ဟွံတီကေတ်ဏီပုဟ်။
ကြဴနူသ္ကိုပ်ဝန်ဇၞော်တြေံ လဳကွာန်ယု ချိုတ်အာတုဲ ၜိုတ်မွဲၜါတ္ၚဲဂှ် ဟိုတ်နူဗဳဒဳယဝ် ပါ်ပါဲလဳကွာန်ယုဂှ် ပ္ဍဲသၞာံ ၂၀၁၅ ယဳဂှ် နကဵုယၟုပရေံ ဒယှ်တှ်ကၠုၚ်ရ။
ညးတေံဝွံ ပတောအ်ၜတ်လဝ် လဳကွာန်ယု ကဵု ကျာ်ယေယှု တုဲ ဟိုတ်နူဘာသာခရေတ်ယာန်ဂှ် ပ္ဍဲအပ္ဍဲဍုၚ် ပြသၞာကတဵုဒှ်မံၚ်ရောၚ် စောဲစပ်ဟီုဂးလဝ်ရ။
သ္ကိုပ်ဝန်ဇၞော်တြေံဗြိတိၚ် ဗီုရုပ်ကာတောန် မာဂရက် တက်ချာ ကေုာံ လဳကွာန်ယုတံ ဆက်ဆံမံၚ်လိၚ်တံဂှ်လေဝ် ယီ ထမံက်ထ္ၜးလဝ်ရ။
စပ်ကဵုညးတေံကၠောန်လဝ်ဂှ်တုဲ မၞိဟ်ဟွံအောန်နူ ၃၀ တၠတံ ပတိုန်လိက်ဂှ် ကြဴနူဂှ် ယီ ဒးဒုၚ်စောဲအမှုဗွဲမပြဟ်တုဲ ဒးဒုၚ်ဖျေံထံၚ်ရ။
ဆဂး စပ်ကဵုအခေါၚ်ဟီုဂးဗၠးၜးတုဲ ညးထံက်ဂလာန်မံၚ်ညးတေံလေဝ် နွံဗွဲမဂၠိုၚ်ကီုရ။
သွက်ဂွံဒုၚ်ကဵုတာလျိုၚ် သြန်သွက်အရၚ်ညးတေံဂှ် မၞိဟ်ဟွံကေၚ်တီညာတ်ညးတေံတံလေဝ် ဟီုကၠုၚ်လဝ်နွံရ။
ဆဂး ညးတေံဝွံ ဟိုတ်နူဂွံလဝ် ဗဳဒဳယဝ်ပပ်ပဳကောန်ၚာ် ကေုာံ ဒုဟ်ဒဏ်စပ်ကဵုပရေၚ်လိၚ် လ္တူကောန်ၚာ်ဗြဴ အယုက် ၁၄ သၞာံဂှ် ကြဴနူဒးဒုၚ်ရပ်လဝ် ပ္ဍဲအမေရိကာန်တုဲ ပ္ဍဲသေင်ကာပူပၠန် ဒးဆက်ဆဵုဂဗာအာ အမှုပၠန်ရောၚ်။
Ref:BBC