တိုကျို၊ မတ် ၂၂
ပ္ဍဲပ္ၚံက်ၜဳဟဝ်မုဇ် မဒှ်လမျီု သွက်ဂွံထံက်ပၚ်ဇြဟတ်ဓါတ်ဂၠးကဝ်တံ သွက်ဂွံကဵုအခေါၚ် ၜၚ်မဆေၚ်စပ်ကဵု ဂျပါန်တံ ဂွံတတ်အာဂှ် မင်လဝ်ဂွန်ရောၚ် အတိုၚ်လဟီု ဝန်ဇၞော်ပရေၚ်ဍုၚ်သအာၚ် အဳရာန် အဘတ်စ် အာရက်ချီ ဂှ် ဌာန်ပရိုၚ်ဂျပါန် ကျိုဒို (Kyodo News) ချူလဝ်ရ။
စပ်ကဵုပရိုၚ်ဏအ်တုဲ သွက်ဂွံသ္ပအာဒတန်ပၠန်ဂှ် ဌာန်ပရိုၚ်ရိုက်တာ ဆက်သၟာန်အာ ဌာနဝန်ဇၞော်ပရေၚ်ဍုၚ်သအာၚ် ဂျပါန်၊ ဌာနဝန်ဇၞော်ပရေၚ်ဗၞိက် ကေုာံ ရုၚ်သ္ကိုပ်ဝန်ဇၞော်တံ ပ္ဍဲမာတ် ၂၁ ကီုလေဝ် ဟွံဂွံအဆက်ပုဟ် သာ်ဝွံ ထမံက်ထ္ၜးလဝ်ရ။
နကဵုလပါ်ဂျပါန်တံ ယဝ်ရဂစာန် သွက်ဂွံကလေၚ်ပံက် ပ္ၚံက်ၜဳဟဝ်မုဇ်မ္ဂး နူကဵုဂၠံၚ်တရဴဏံ ၜၚ်ဆေၚ်စပ်ကဵုဂျပါန်တံဂှ် အဳရာန် သွက်ကဵုအခေါၚ်တတ်အာရောၚ် သာ်ဝွံ ဝန်ဇၞော် အဘတ်စ် အာရက်ချီ ဟီုလဝ်ရောၚ် သ္ဂးရ။
ဂျပါန်ဝွံ သွက်ဍုၚ်ညးတံ အရာနွံမံၚ်ပၟိက်ပၠုပ်ကၠေၚ်ဍေၚ် ၉၀% တံဂှ် ဒးတတ်ပၠုပ်ကေတ်နၚ် နူပ္ၚံက်ၜဳဟဝ်မုဇ်ရောၚ် မဒှ်ရ။
ကြဴနူအမေရိကာန် ကေုာံ အေဿရေဝ်တံ စပ္တံဗတိုက်အဳရာန်တုဲ အဳရာန်တံ ကၟာတ်ဆိုအ်ထောံပ္ၚံက်ၜဳဂှ် ကြပ်အိုတ်အာရ။
ပ္ဍဲမာတ် ၂၁ ဂှ် ပေါဲပၞာန်အဳရာန် လုပ်စိုပ်ကၠုၚ် သတ္တဟအလန်စတုတ္ထတုဲ ဟိုတ်နူၚုဟ်မးကၠေၚ်ဍေၚ်ဂၠးကဝ် သၠုၚ်တိုန်အာဂှ် ဂျပါန် ကေုာံ ဍုၚ်တၞဟ်ဟ်တံ ဒးပ္တိတ်သုၚ်စောဲအာမံၚ် ကၠေၚ်အရန်ညးတံရ။
သွက်ဂွံကလေၚ်ပံက် ပ္ၚံက်ၜဳဟဝ်မုဇ်ဂှ် နူကဵုမဟာမိတ်တံ ညံၚ်သ္ဂောံဂွံအရီုအဗၚ်ဂှ် သမ္မတအမေရိကာန် ဒဝ်နေဝ်ထရ ဗ္တိုက်ဖ္အောဝ်လဝ် ဍုၚ်ယူရောပ်တံကီုလေဝ် ဟွံဆေၚ်စပ်ကဵုပေါဲပၞာန် ဍုၚ်ညးတံရောၚ် ကလေၚ်ခၠေဝ်ဟီုလဝ်ရ။
ပ္ဍဲမာတ် ၁၉ ပ္ဍဲအရာဒုၚ်တၠုၚ်ဆဵုဂဗလဝ် သ္ကိုပ်ဝန်ဇၞော်ဂျပါန်ဂှ်လေဝ် ဒဝ်နေဝ်ထရ ဗ္တိုက်ဖ္အောဝ်လဝ် ညံၚ်ဂွံအရီုအဗၚ် သွက်ဂွံကလေၚ်ပံက် ပ္ၚံက်ၜဳဏံရ။
သ္ကိုပ်ဝန်ဇၞော်ဂျပါန် တာကာအိချီဝွံ သွက်ဂွံကလေၚ်ပံက်ဂၠံၚ်ဍာ်မာန်ဂှ် အတိုၚ်သၞောဝ်ဥပဒေဂျပါန်မ္ဂး နကဵုအကာဲအရာဇကုတံကၠောန်ဂွံ၊ ကၠောန်ဟွံဂွံတံဂှ် သောၚ်ထ္ၜးလဝ်ကဵု ဒဝ်နေဝ်ထရ ရောၚ် တီကေတ်ရ။
အတိုၚ်သၞောဝ်ဥပဒေသဇိုၚ်ပရေၚ်ၜိုဟ်လလမ် ကြဴနူပၞာန်ဂၠးကဝ်ဒှ်တုဲ ပရေၚ်ချဳဒရာၚ်ဂျပါန်တံ အပိုၚ်အခြာနွံမံၚ်ကီုလေဝ် ပ္ဍဲအကာဲအရာ ဒးဒုၚ်ဗတိုက်ကၠုၚ် နူဍုၚ်မ္ၚးမှ စကာဇြဟတ်ပၞာန်ဂွံရောၚ်ဂှ် သၞောဝ်ဥပဒေပရေၚ်ဂီုကၠီု ၂၀၁၅ ကဵုလဝ်အခေါၚ်နွံရ။
Ref:Reuters