ကအ်ကြိက်၊ မာတ် ၂၂
ပ္ဍဲတွဵုရးကရေၚ် ဒေသကအ်ကြိက်လပါ်သၟဝ်ကျာဂှ် အကြာဒပ်ကဝ်မယှေန်ပၞာန်ကဵု ဂကောံဇြဟတ်ပၠန်ဂတးတံ ပေါဲဗတိုက်ဆက်ကတဵုဒှ်မံၚ်တုဲ နူဒပ်ကဝ်မယှေန်ပၞာန်တံလေဝ် ဆက်ကြဳမံၚ်ဗုမ်နူကဵုၜၚ်ကျာတံ ရိုဟ်ကၞက်ပရိုၚ်ဒေသတံ ဟီုရ။
သွက်ဂွံကလေၚ်ထိၚ်ချုက်တိဍာ်ဒေသ ကွာန်မၞုံပ္ဍဲကအ်ကြိက် လပါ်သၟဝ်ကျာကေုာံ ဂၠံၚ်တြေံလ္တူဒဵုဒဝ်န ကအ်ကြိက်-ဗြဝတီဂှ် စပ္တံနူကဵုဂိတုသေပ်တေမ်ပါ သၞာံလောန်ကၠုၚ်တေံ ရဲလပါ်ဒပ်ကဝ်မယှေန်ပၞာန်တံ ထပက်ကရောၚ်ပၞာန် ချဳဒရာၚ်လုပ်ကၠုၚ်တုဲ ဒဵုကဵုစိုပ် ဂိတုမာတ်သၞာံဏအ် ပေါဲဗတိုက်ၜါလပါ်ဆက်ကတဵုဒှ်မံၚ် ဖိုဟ်ရောၚ်။
ပ္ဍဲကဵုမာတ် ၂၀ လောန်ကၠုၚ်ဏအ် ဒပ်ကဝ်မယှေန်ပၞာန် စကာၜၚ်ကျာတုဲ ကြဳဗုမ်ဗတိုက်လဝ် ပ္ဍဲကဵုဒေသသၟဝ်ကျာ ကအ်ကြိက်ကီုလေဝ် လပါ်ဂကောံဇြဟတ်ပၠန်ဂတးတံဂှ် ဒးဝပ်ချိုတ်လဝ်ဟၟဲပုဟ် ဂွံတီကေတ်ရ။
ပေါဲဗတိုက်ၜါလပါ် ကတဵုဒှ်မံၚ်ပ္ဍဲတ္ၚဲအကြာတံဏအ်ဂှ် ကောန်ပၞာန် ဒပ်ကဝ်မယှေန်ပၞာန်တံ ဒးဒုၚ်ဇီုကပိုက်ဂၠိုၚ်တုဲ ပရေၚ်ဂြိပ်ပါဲတိတ်အာ နူဒပ်တံလေဝ် မၞုံမံၚ်ရောၚ် ရိုဟ်ကၞက်ပရိုၚ်ဒေသတံ ဟီုလဴရ။
ဟိုတ်နူပေါဲပၞာန် ဒေသကအ်ကြိက်သၟဝ်ကျာတုဲ ညးဒေသ နူကွာန် မိဖာလေဝ်၊ နံၚ်ကိုၚ်၊ ကွဳမဝ်တိုၚ်၊ ထဳဖိုဝ်သာန်၊ ကအ်ဖာန်ရပ်၊ ကအ်တာသူ၊ နံၚ်မဳ၊ မျပတိုၚ် စတမ်ညးဒေသတံဂှ် ဒးဂြိပ်ပါဲဒဴလဝ်ဘဲပၞာန် ဂိတုလအ်လောန်ကၠုၚ်ကီု ပ္ဍဲကွာန်လ္ၚဵုတံပၠန် ကရောၚ်ပၞာန်ကဝ်မယှေန်ပၞာန်တံ အောပ်မာကင်ဒမၠုက် ကေတ်လဝ်ဒၞာဲမၞုံမံၚ်ရောၚ် သာ်ဝွံ ရိုဟ်ကၞက်ပရိုၚ်ဒေသ သ္ဂးရ။
အပ္ဍဲကဵုဒေသသၟဝ်ကျာကအ်ကြိက်မ္ဂး လပါ်ဒပ်ကဝ်မယှေန်ပၞာန်တံ ပါ်လဝ် ၃ ကရောၚ်ပၞာန်တုဲ လုပ်ချဳဒရာၚ်လဝေၚ်မံၚ်ပၞာန်တုဲ ဂကောံ DKBA ပါ်တိတ် ကော်ခဴစ ဒပ်ပၞာန်ကရေၚ် ဗုဒ္ဓဘာသာတောတက် (DKBA) က္ဍိုပ်ဗိုလ်ဗိတံလေဝ် ပံၚ်တောဲကဵုဒပ်ကဝ်မယှေန်ပၞာန်တုဲ ပါလုပ်ကဵုမံၚ်အရီုဗၚ်ရောၚ် ဂွံတီကေတ်ရ။
ပ္ဍဲကဵုပေါဲဗတိုက် ဗွိုၚ်တိဍာ်ဒေသကအ်ကြိက်ဂှ် နူကဵုဗလးတိကီု ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန် သၟးဟွံက သီုကဵုဒၞာဲညးဍုၚ်ကွာန်တံ မံၚ်စံၚ်တန်တဴမံၚ်ဂှ်လေဝ် ပရေၚ်ကြဳဗုမ် နူကဵုၜၚ်ကျာ၊ ပန်လွဟ်ဇၞော်ကဵုဒရုၚ် ဗတိုက်မံၚ်မွဲဏှမွဲဏှရောၚ် သာ်ဝွံ ဂွံတီကေတ် နူရိုဟ်ကၞက်ပရိုၚ်ဒေသတံရ။
ပရိုၚ် – သြၚ်လောန်တိုၚ်မ်
Photo – PDF