ကတာ၊ မာတ် ၂၂
ပ္ဍဲဒေသဗၟံက်အဒေါဝ် ဟိုတ်နူပေါဲပၞာန်အဳရာန် ကေုာံ အမေရိကာန်-အေဿရေဝ်ဂှ် ညံၚ်ရဴဍုၚ်တၞဟ်တံကီု ပ္ဍဲဍုၚ်ဗၟာ ကၠေၚ်စက်ကဵုကၠေၚ်ၜၚ်ကျာ အောန်မံၚ်ကီုလေဝ် ပရေၚ်ဗတိုက်ပ္ဍဲကဵုဗလးကျာ နူဒပ်ပၞာန်ဗၟာဂှ်ဆက်တုဲက္တဵုဒှ် မံၚ်ဖိုဟ်ရောၚ်။
ပ္ဍဲမာတ် ၂၀ အခိၚ်နူဂယးဂှ် ဟိုတ်နူဗတိုက်လဝ်ကဵုၜၚ်ကျာ ပ္ဍဲရးသေတ်ကိုၚ် ဍုၚ်ကတာ လ္တူဘာလကျာ်မဟာ ပန်ထပ် ဒၞာဲရဲပါဲဘဲပၞာန်တံ စ္ၜောဲစ္ၜော်ဗ္ဒဗ္ဒာဲမံၚ်ဂှ်တုဲ သၚ်ဂမၠိုၚ်ပဝ်အာသၟးဟွံက ရဲပါဲဘဲပၞာန်လၟိဟ်ကဵုစှော် ဗွဲမဂၠိုၚ် ဒးဝပ်ချိုတ်အာလေဝ်နွံရ။
တုဲပၠန် ပ္ဍဲမွဲတ္ၚဲဂှ်ပၠန် လပါ်ရးသဂိုၚ် ပွိုၚ်ဍုၚ်မျံၚ် ဟိုတ်နူၜၚ်ကျာပၞာန် ကြဳဗုမ် ကွာန်စဳပျးနဗက်ဂှ် ကောန်ၚာ်အယုက်ဟွံပေၚ်မွဲဂိတုဏီကီု သီုကဵုမၞိဟ်ဗြဴမွဲတၠ ချိုတ်အာတုဲ ကောန်ကွာန်ၜိုတ် ၁၀ တၠတံ ဒးလဝ်ဝပ် ဘဲဒဏ်နွံရ။
ပ္ဍဲဍုၚ်ဗၟာဝွံ ဟိုတ်နူပိုၚ်ခြာလဝ် သၞောတ်စောံ/မတုဲ စနူတမ်ဂိတုမာတ် ဂှ် ပ္ဍဲအရာရာန်ကၠေၚ်စက်ကီု ဒဳကွဳစက်တံဂှ် ညးဍုၚ်ကွာန်တံ ဒးဆဵုဂဗမံၚ် ပရေၚ်အခက်ခုဲဇၟာပ်ပ်တ္ၚဲတုဲ ဇီုကပိုက်ကၠုၚ်မံၚ်ကဵုပရေၚ်မၞိဟ် ပရေၚ်ပိုန်ဒြပ် မၞိဟ်ဂမၠိုၚ်တံရ။
လပါ်မွဲပၠန် လိုၚ်ၜၚ်ကျာဗၟာ MNA ကေုာံ MAI တံဝွံ ဟိုတ်နူကၠေၚ်ၜၚ်ကျာဝါတ်ဂါတ်အာဂှ်ရ လျိုၚ်ကပေါတ်အပဵု ဖ္ဍိုက် လ္တူၜၚ်ကျာ သွက်ရဲအာတရဴတံဂှ် ယှအ်ဖျေံလဝ်ရောၚ် လလောၚ်တြးလဝ် ပ္ဍဲမာတ် ၁၉ ရ။
ဟိုတ်နူအခက်အခုဲကၠေၚ်ၜၚ်ကျာတုဲ လၟေၚ်တရဴယာန်ကျာ အပ္ဍဲဍုၚ်မ္ၚးဍုၚ်လ္ၚဵုလ္ၚဵုတံဂှ် နုက်ပလီုထောံကီု ကလေၚ်အာမ်ကဵုသြန် စၟတ်တဲတံကီု ပ္ဍဲမာတ် ၂၀ ဂှ် စကၠောန်ကၠုၚ်တုဲ ပရေၚ်သွံစၟတ်တဲတံဂှ်လေဝ် ဒေါအ်ဇူလဝ်ယာယဳရောၚ် သာ်ဝွံ ပရိုၚ်အပ္ဍဲဍုၚ်တံ ချူလဝ်ရ။
ပ္ဍဲအခိၚ်ကၠေၚ်ၜၚ်ကျာ ၜိုန်ရ ဒှ်မံၚ်အခက်အခုဲ ဗီုဏအ်ကီုလေဝ် ဒပ်ပၞာန်ဗၟာစကာၜၚ်ကျာပၞာန်တုဲ အကြာကွာန် ဂကောံရပ်လွဟ် ကောန်ဍုၚ်အရၚ်တံကဵု ဂကောံဇြဟတ်ပၠန်ဂတးထိၚ်ချုက်လဝ်တံဂှ် ဗက်ကြဳထောံဖျေံမံၚ်ဗုမ် ဆက်က် ညံၚ်ရဴဗြဲဂူ ညိလေဝ်ဟွံဒးဒေါအ်ဇူယီု မဒှ်ရ။
လောန်ကၠုၚ် ၜိုတ်ၜါသတ္တဟတေံဂှ်လေဝ် ပ္ဍဲရးဗဂေါ ပွိုၚ်ဍုၚ်ဇြဲပန်တၞံ ကွာန်ပလိုၚ်ကုန်၊ ကုန်ကၞုကေုာံ ကွာန်ကုန်ဘာဂှ် ဟိုတ်နူဒပ်ပၞာန်ဗၟာ ဗတိုက်လဝ်ကဵုၜၚ်ကျာ၊ ဒရုၚ်ကဵုလွဟ်ဇၞော်တံတုဲ ညးဍုၚ်ကွာန် ၂၈ တၠ ဒးချိုတ်အာလဝ် မွဲဂအုံဓဝ်ရ။
တုဲပၠန် ပ္ဍဲမာတ် ၈ ဂှ်လေဝ် ပ္ဍဲတွဵုရးရခေၚ် ပွိုၚ်ဍုၚ်အာမ် ပ္ဍဲလ္တူ ဗ္ဒိုပ်ထံၚ်ဂၠုဲပၞာန်တံဂှ် ဟိုတ်နူဗတိုက်လဝ်ကဵုၜၚ်ကျာတုဲ ဂၠုဲပၞာန် ၁၁၆ တၠ ချိုတ်အာ၊ ၃၂ တၠ ဒးလဝ်ဝပ်နွံရောၚ် ဒပ်ပၞာန်အာရက္ခ AA လလောၚ်တြးလဝ်ပရိုၚ်ရ။
မွဲလပါ်ပၠန် သွက်ဒပ်ပၞာန်ဗၟာဂှ် နူအဳရာန် ပလံၚ်ဗစိုပ်ကဵုလဝ်ကၠေၚ်ၜၚ်ကျာ ၁၇၅၀၀ တာန် နူကဵုသၞာံ ၂၀၂၄ အံက်တဝ်ပါ- ဒဵုစိုပ် ဒဳဇြေမ်ပါ ၂၀၂၅ နွံမံၚ်ရောၚ် အတိုၚ်ဌာန်ပရိုၚ်ရိုက်တာ ချူထမံက်လဝ်ပရိုၚ်ဂှ် ဂွံတီရ။
အတိုၚ်တၚ်နၚ် ဂကောံပိုၚ်ပြဳအဝဵု သၞေဟ်ၜၚ်ဗၟာမ္ဂး နူကဵုသၞာံ ၂၀၂၄ စိုပ် ၂၀၂၅ ပၠုပ်နၚ်လဝ်ကၠေၚ်ၜၚ်ကျာ ပ္ဍဲဍုၚ်ဗၟာဂှ်တှ်ေ နူကဵု မက်ထရိတ်တာန် ၆၄,၅၆၂ စိုပ်အာ ၁၀၆,၆၀၄ တုဲ ဂၠိုၚ်တိုန်အာ ကြပ်ၜါဆနွံရောၚ် သာ်ဝွံ Justice for Myanmar ဟီုလဝ်ရ။
ပြဟ်ဟ်ဏံမ္ဂး ကဝ်မယှေန်ပၞာန်တံ သွက်ဂွံဂွံကၠေၚ်ၜၚ်ကျာကဵု ကၠေၚ်စက်တံဂှ် ၜိုန်ရသြန်အိုတ်ဂၠိုၚ်ကီု တရဴသ္ၚောဲကီုလေဝ် နူဍုၚ်ရတ်ယှာ မဟာမိတ်တံဂှ် သွက်ဂွံထပ်ရာန်ဟလိုၚ်တိုန်ဂှ် အဃောဂစာန်မံၚ်ရောၚ် သာ်ဝွံ ဌာန်ပရိုၚ်ဂမၠိုၚ်တံ ချူထမံက်လဝ်ရ။
ပရိုၚ် -သြၚ်လောန်တိုၚ်မ်
Photo – CJ