ဖာပန်၊ မာတ် ၂၄
ပ္ဍဲတွဵုရးကရေၚ် ပွိုၚ်ဍုၚ်ဖာပန် ဗ္ဒိုပ်ကဝ်တွိုယ်ကျိုဝ် ကဝ်မယှေန်ပၞာန် ဒးဒုၚ်ဗတိုက်သီတုဲ လပါ်ကဝ်မယှေန်ပၞာန် ချိုတ်လဝ်သီုကဵုဒးဝပ်ဗွဲမဂၠိုၚ်ရောၚ် ဂွံတီကေတ် နူရိုဟ်ကၞက်ပရိုၚ်ပၞာန် ပ္ဍဲဒေသရ။
တုဲကၠုၚ်ပ္ဍဲကဵုမာတ် ၁၇ ဏအ် ဗ္ဒိုပ်ကဝ်တွိုယ်ကျိုဝ် ဒပ်ပၞာန်ကဝ်မယှေန်ပၞာန် ဖျေံလဝ်ဒပ် အကြာမဟာဒပ် ၅ ကဵု မဟာဒပ် ၃ (KNU) ဒေသလပါ်သၟဝ်ကျာဖာပန်ဂှ် ဒပ်ပၞာန်ဗၠးၜးကောန်ဂကူ ကရေၚ် KNLA မဟာဒပ် ၅ ကဵု ဂကောံပံၚ်ကောံ မဟာမိတ်ပၠန်ဂတးတံ လုပ်ပန်ဗတိုက်လဝ်ရ။
ဗ္ဒိုပ်ကဝ်တွိုယ်ကျိုဝ်ဝွံ ပ္ဍဲမာတ် ၁၇ နူဂယး ဂကောံပံၚ်ကောံ မဟာမိတ်ပၠန်ဂတး မဟာဒပ် ၅ KNLA အာက္ဍိုပ်တုဲ စဗတိုက်ကၠုၚ်ဂှ် စိုပ်အခိၚ်သဝ်တ္ၚဲဂှ်တှ်ေ သီကေတ်မာန်အာ သီုအလုံဗ္ဒိုပ်မွဲရောၚ်။
ပ္ဍဲပေါဲဗတိုက် သီဗ္ဒိုပ်ကဝ်တွိုယ်ကျိုဝ်ဂှ် လပါ်ကဝ်မယှေန်ပၞာန် ချိုတ် ဒးဝပ် နွံဗွဲမဂၠိုၚ်တုဲ ညးဂြိပ်ပါဲအာတံလေဝ်နွံမံၚ်ရောၚ် အတိုၚ် တမ်ရိုဟ်ကၞက်ပရိုၚ်ပၞာန်ဒေသတံ ဟီုတုဲ ဂွံတီရ။
တုဲပၠန် ပ္ဍဲမာတ် ၁၄ ဂှ်လေဝ် ဗ္ဒိုပ်ကဗဝ်ဗူ ဒပ်ပၞာန်ကဝ်မယှေန်ပၞာန် ဖျေံသ္ဇိုၚ်ဖာပန်ဂှ်လေဝ် KNU မဟာဒပ် ၅ ကေုာံ ဂကောံပံၚ်ကောံ မဟာမိတ်ပၠန်ဂတးတံ လုပ်ပန်ဗတိုက်လဝ်တုဲ သီဂွံလွဟ်ကပေါတ်ပၞာန်တံနွံတုဲ ဟိုတ်နူဒပ်ပၞာန်ဗၟာတံ ကၠုၚ်ကဵုရီုဗၚ် ဗတိုက်လဝ်ကဵုၜၚ်ကျာဂှ်ရ ဒးကလေၚ်ဆုတ်တိတ်ကၠုၚ်လဝ် သ္ဂးရ။
စပ်ကဵုပေါဲဗတိုက်သီဗ္ဒိုပ် ပ္ဍဲတိဍာ်မဟာဒပ် ၅ ခရိုၚ်ဖာပန်တံဂှ်တှ်ေ နူကဵု KNU မဟာဒပ် ၅ ခရိုၚ်ဖာပန် ဒဵုစိုပ်မာတ် ၂၃ သဝ်တ္ၚဲဂှ် လလောၚ်တြးလဝ်ပရိုၚ် ဟၟဲဏီရ။
ပ္ဍဲတွဵုရးကရေၚ် ဒေသသၟဝ်ကျာဖာပန်ဂှ် ဗ္ဒိုပ်ဒပ်ပၞာန်ကဝ်မယှေန်ပၞာန် သှ်ေၜက်မံၚ်ဟွံအောန်နူ ၅ ဒၞာဲ နွံမံၚ်ဏီတုဲ ဗ္ဒိုပ်တံဂှ်တှ်ေ ဟိုတ်နူ ဂကောံဇြဟတ်ပၠန်ဂတးတံ ကၟာတ်ဆိုအ်ကုတ်ထပိုတ်လဝ်တုဲ လပါ်ဒပ်ပၞာန်ဗၟာတံ ဒးစကာမံၚ်ၜၚ်ကျာမွဲဓဝ်တုဲ ဒးပလံၚ်ကဵုမံၚ် စၞစဇွောံမတံရောၚ်။
ပ္ဍဲဒၞာဲဗ္ဒိုပ်ဗျူဟာဖာပန် ဂကောံဇြဟတ်ပၠန်ဂတးတံ ဗိုၚ်ကၟာတ်ဆိုအ်လဝ်ဂှ်လေဝ် နူကဵုဒပ်ကဝ်မယှေန်ပၞာန်တံ ဗတိုက်လဝ် နကဵုၜၚ်ကျာဂၠိုၚ်ကဵုဝါနွံတုဲ ဟိုတ်နူဒပ်ပၞာန်ဗၟာ စွံပွန်ကဵုညးဍုၚ်ကွာန်တံတုဲကြဳဗုမ်ဂှ် ညးဒေသဗွဲမဂၠိုၚ် ဒးဝပ်ချိုတ်တံ နွံကၠုၚ်မံၚ်ရ။
အတိုၚ်လိက်လလောၚ်တြး KNU မဟာဒပ် ၅ ခရိုၚ်ဖာပန်မ္ဂး နူဂိတုမာတ် ၁ စိုပ် ၁၅ အကြာဂှ် ပေါဲဗတိုက်ကတဵုဒှ်လဝ်ကြပ် ၅၀ ဝါနွံတုဲ လပါ်ကဝ်မယှေန်ပၞာန် ၅ တၠချိုတ်အာ၊ ၃၃ တၠ ဒးအာဝပ် ဟိုတ်နူဒပ်ပၞာန်ဗၟာ ကြဳဗုမ်နူၜၚ်ကျာဂှ် ညးဍုၚ်ကွာန် ၆ တၠ ချိုတ်အာလဝ်နွံရ။
ပရိုၚ် – သြၚ်လောန်တိုၚ်မ်
Photo – PDF