တဳဟဳရာန်၊ မာတ် ၂၄
အပ္ဍဲပွိုၚ် ၄၈ နာရဳ အတိုၚ် သမ္မတအမေရိကာန် ဒဝ်နေဝ်ထရ ဘပဠလဝ် ဂတတေံ ယဝ်ရဆက်ဗတိုက်အာ ဇာဖိုၚ်ပလံၚ်ဗစိုပ်ဓါတ်ပၟတ်အဳရာန်မ္ဂး နကဵုအဳရာန်လေဝ် သွက်ဂွံကလေၚ်ပ္လန်တဲ ဗတိုက်ပလီုထောံ သၞောတ်ဇြဟတ်ဓါတ် ကေုာံ သၞောတ်ပလံၚ်ဗစိုပ်ဍာ်သုၚ် ပ္ဍဲဍုၚ်သ္ၚိဗဒါဲ ပ္ၚံက်ၜဳတံရောၚ် ပ္ဍဲမာတ် ၂၂ ဂှ် အဳရာန် ဘပဠဏာရ။
နနဲသဘဴ ကိတ်ကၞိၚ်ကလေၚ်ကိတ်ကတောဝ် နကဵုနဲကဲကလေၚ်ပ္လန်တဲညးသ္ကံ ပေါဲဗတိုက် လ္တူစမြိုၚ်ညးဍုၚ်ကွာန်တံ ကတဵုဒှ်ကၠုၚ်မာန်တုဲ ပ္ဍဲအခိၚ်ပံက်ဖျာဂယး မာတ် ၂၃ ဂှ်တှ်ေ ဖျာဂၠးကဝ်တံ ကလိုက်ကမဵုချဳဓရိုက်အာအိုတ်ရ။
ဟိုတ်နူ ပေါဲပၞာန်အဳရာန် အသိၚ်သၠုၚ်တိုန်အာတုဲ အကာဲအရာ ပရေၚ်ဝဳလမျီု ဘဝညးဍုၚ်ကွာန်တံ ဂွံမံၚ်စံၚ်တန်တဴ ပြကောတိကိုတ်ဗွဲမဂၠိုၚ်တံ ဒးဆဵုဂဗမံၚ် ဘဲအန္တရာယ်ရ။
ပ္ဍဲပွိုၚ်ပိသတ္တဟပြၚ်ၚ်ဏံ ကြဴနူအမေရိကာန် ကေုာံ အေဿရေဝ်တံ ကြဳဗုမ် ဗတိုက်လဝ်ဗွဲမသကာတ်မြဟ်တုဲ ဇြဟတ်အစောံကမ်သၠောဝ်အဳရာန်တံဂှ် ယှအ်ဖျေံကဵုမာန်အာ ကၠးကၠးမးမးရောၚ် သာ်ဝွံ ညးတာလျိုၚ်အမေရိကာန်တံ ဟီုရ။ လပါ်အဳရာန်တှ်ေ ညးတံ ဆက်ဗတိုက်မာန်မံၚ်ဖိုဟ်ရောၚ် ဆက်ဟီုမံၚ်ရ။
ပ္ဍဲဒေသဂှ် ၜိုန်ရထရ ဗလးဏာလဝ်ဒပ်မရိၚ် ကေုာံ ကွဳခြပ်ဇက်တိုန်ကုန်တံကီုလေဝ် သွက်ဂွံဖအောန်ဖျေံအသိၚ် ပေါဲပၞာန်အဳရာန်ဂှ် ပ္ဍဲမာတ် ၂၁ သဝ်တ္ၚဲဂှ် ဟီုထမံက်လဝ် အယောၚ်အလာနွံညိရ။
ယဝ်ရသၞတံ ဗတိုက်သ္ဇိုၚ်စမြိုၚ်ဆေၚ်စပ်ကဵု ဇွောံစံၚ် ကေုာံ ဇြဟတ်ဓါတ်အဳရာန်မ္ဂး သွက်ပရေၚ်ဇြဟတ်ဓါတ်အလုံဒေသမွဲ သီုကဵုဌာန်စမြိုၚ်နဲကဲပညာ ကေုာံ သၞောတ်ပလံၚ်ဗစိုပ်ဍာ်သုၚ်တံဂှ် ပန်ဗတိုက်ပလီုဏာရောၚ် ညးအခေါၚ်ဟီုဂး ဒပ်ပၞာန်အဳရာန် အဳဗရာဟေန် ဇိုလ်ဖာကာရီ ဟီုရ။
ယဝ်ရသၞောတ်ပလံၚ်ဗစိုပ်ဓါတ်ပၟတ်အဳရာန် ဒးဒုၚ်ဗတိုက်မ္ဂး သွက်အဳရာန် ယုက်ဒေက်ဂၠိုၚ်မာန်ကီုလေဝ် ယဝ်ရသၞောတ်ပလံၚ်ဗစိုပ်ဓါတ်ပၟတ် ဍုၚ်ဇိုၚ်ဝုတ်ဒိုဟ်ဗဒါဲပ္ၚံက်ၜဳ မသုၚ်စောဲမံၚ်ဓါတ်ပၟတ် ၅ ဆ ဂၠိုၚ်နူကဵုအဳရာန်တံ လီုလာ်အာမ္ဂး ဒှ်အာဘဲအန္တရာယ်ကပ်ဇၞော်မွဲမာန်ရောၚ်။
ဟိုတ်နူဓါတ်ပၟတ်ဟေၚ် ပ္ဍဲဍုၚ်ကန္တာရတံဂှ် မၞိဟ်ဂမၠိုၚ် မံၚ်စံၚ်တန်တဴအာမာန်တုဲ သၞောတ်ပလံၚ်ဗစိုပ်ဍာ်ဂှ်လေဝ် ဒှ်အရာကိစ္စဇၞော်မံၚ် ညံၚ်ရဴလမျီုတံကီုရ။
Ref:Reuters