မတ်မလီု၊ မာတ် ၂၄
ပ္ဍဲတွဵုရးမန် စပ္တံနူမာတ် ၂၂ တုဲ ဂကောံဌာနစုၚ်ပံၚ်ကောံ ကဝ်မယှေန်ပၞာန်တံ ရပ်စပ်စၟဳစၟတ်တုဲ စကေတ်မံၚ်အရေဝ် ကွဳစက်မဂၞန်စောံမတံယျရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကဝ်မယှေန်ပၞာန်ဝွံ သွက်ဂွံသုၚ်စောဲကၠေၚ်စက်အောန်န် ကေုာံညံၚ်ကၠေၚ်စက်ဂွံရုံဂပ်ဂးတုဲ ပ္ဍဲတ္ၚဲမဂၞန်စောံတှ်ေ ကွဳစက်မၞုံကဵု အက္ခရ် ဂၞန်စောံ၊ ပ္ဍဲတ္ၚဲဂၞန်မတှ်ေ ကွဳစက်မၞုံကဵုအက္ခရ်မဂၞန်မတံဟေၚ် ညံၚ်ဂွံဒဳစကာအာဂှ် ကဵုလဝ်စၞောန်ပ္ညုၚ်ရ။
အတိုၚ်ညးဒေသတံဟီုမ္ဂး ကဝ်မယှေန်ပၞာန်တံဝွံ ဗက်စၟဳစၟတ်မံၚ်ကွဳစက်မဂၞန်စောံမတံ စဵုကဵုစိုပ် မုက်ဂၠံၚ်ပန်သွာၚ်ကဵု ဆေၚ်သွံကၠေၚ်စက်တံဂှ် စကေတ်မံၚ်အရေဝ်ရောၚ်။
ပ္ဍဲအရာရပ်စပ်ကေတ်အရေဝ်ဏံဂှ် ကွဳစက်ဖံက်ပကဝ်သၞောဝ်မ္ဂး ဖျေံတပ်ဒဏ်သြန် ပိဠက်ဒကေဝ်တုဲ ကွဳစက်လ္ၚဵုတံဂှ်တှ်ေ ကဵုပညာတုဲ ကလေၚ်ဗလးကဵုမံၚ်လေဝ် နွံရ။
ပရေၚ်အပိုၚ်အခြာ ဒဳကွဳစက်စောံမကဝ်မယှေန်ပၞာန်ဏအ်ဂှ် ဒှ်အရာဖန်လဝ်ကဵုပၞော်ဂၠံၚ်ဂၠာဲစသြန် သွက်ဂကောံဌာနစုၚ်ပံၚ်ကောံ သၟဝ်တဲတံရောၚ် ညးဒေသတံပါ်ပါဲမံၚ်အိုတ်ရ။
မွဲလပါ်ပၠန် ကဝ်မယှေန်ပၞာန်တံဝွံ ဆေၚ်သွံကၠေၚ်စက် သွံမံၚ်နကဵုစေဝ်၊ ပေပါတိုၚ်ကဳတံဂှ်လေဝ် ဟွံကဵုပရိုၚ် လုပ်စၟဳစၟတ် မွဲအလန်ဓဝ်တုဲ သီုကဵုကေတ်မံၚ်အရေဝ်သၟးဟွံက ကွဳစက်လာၚ်သေန်ဟၟဲမ္ဂး သီကေတ်ထောံမံၚ်ရ။
သၞောတ်ဒးဒဳကွဳစက်စောံမဏအ်ဂှ် စနူဂိတုမာတ် ၇ စိုပ် ၁၃ ဂှ် နူကဝ်မယှေန်ပၞာန် သ္ပလဝ်အခိၚ်ကာလ ကဵုပညာတုဲ စပ္တံနူမာတ် ၁၄ ဂှ် စရပ်စပ်ကေတ်အာအရေဝ်ရောၚ် လလောၚ်တြးလဝ်ရ။
ယဝ်ရ ဟွံဒဂေတ်ဗက်သၞောတ်စောံမ ဖံက်ပကဝ်မ္ဂး နကဵုသၞောဝ်ရာဇာသာဒ်ဇၞော် ၝောံပိုဒ် ၁၈၈ ဂှ် သွက်ရပ်စပ်ကေတ်အာအရေဝ်နွံတုဲ ဒုဟ်ဒဏ်ဂှ်တှ်ေ ဒးဒုၚ်ထံၚ်မွဲဂိတု၊ ဒဏ်သြန်ၜါဠက်ဒကေဝ် ကေုာံ ဒးဒဏ်သီုကဵုၜါသာ် ပံၚ်မွဲအလန်ဓဝ်လေဝ် ဒှ်မာန်ရောၚ်။
ပ္ဍဲတွဵုရးမန်ဂှ်တှ်ေ ဟိုတ်နူတင်စၟတ်ပိုၚ်ခြာသၞောတ်စောံမ ကဝ်မယှေန်ပၞာန်တံကီု ကၠေၚ်စက်ပိုတ်အိုတ်အာတုဲ လ္တူပရေၚ်ပိုန်ဒြပ်မၞိဟ် ပ္ဍဲဒေသတံဂှ် ဇီုကပိုက်မံၚ်ဇၞော်ကဵုဇြဟတ်ရ။
ပရိုၚ် – သြၚ်လောန်တိုၚ်မ်
Photo – Social Media