နေပျဳဒဝ်၊ မာတ် ၂၄
အပ္ဍဲကောံဓရီုလၟေၚ်ဍာံ တ္ၚဲဒုတိယ၊ အလန်ပထမ စၠတ်ဓဝ် ညးဍုၚ်ကွာန် အလန်တတိယဏံဂှ် အမာတ်ဗော်ပျဳခိုၚ်ဖျိုဝ် ဓယံက်ဒပ်ပၞာန်တံ ပၠတရဴတုဲ စဒက်ပတန်လဝ် ကမ္မတဳလၟိုန် ကမ္မတဳဥပဒေအပြောံ ကေုာံ ကမ္မတဳစရၚ်သြန်ညးဍုၚ်ကွာန်ရ။
ပ္ဍဲကောံဓရီုစၠတ်ဓဝ်ညးဍုၚ်ကွာန် ကၠောန်ဗဒှ်လဝ်ပ္ဍဲမာတ် ၂၃ ဂှ် လၟိဟ်ကောန်ဂကောံကေုာံ စရၚ်ရန်လဝ် သွက်ဂွံပါလုပ်အာ ပ္ဍဲကမ္မတဳလၟိုန် ကမ္မတဳဥပဒေအပြောံ ကေုာံ ကမ္မတဳစရၚ်သြန် ညးဍုၚ်ကွာန်တံဂှ် အတိုၚ်ရန်လဝ် ယၟုဥက္ကဋ္ဌကဵု ညးအုပ်ကာကမ္မတဳ တံဂှ် ပတိုန်ထ္ၜးတုဲ ရုဲစှ်လဝ်အိုတ်ရ။
ဥက္ကဋ္ဌကမ္မတဳဥပဒေအပြောံဂှ် ဒံက်တာနန္ဒကျဝ်သွာ၊ ညးအုပ်ကာ ဥူတိၚ်ထောန်ဥူ မဒှ်တုဲ ပ္ဍဲကမ္မတဳစရၚ်သြန်ညးဍုၚ်ကွာန်ဂှ်တှ်ေ ဥက္ကဋ္ဌ ဥူတေဇကျဝ်ကေုာံ ညးအုပ်ကာ ဥူတေန်အံၚ်ချေတ် မဒှ်ရ။
ညးတံဏံဂှ်တှ်ေ ဒှ်ညးစၞးစၠတ်ဓဝ် နူဗော်ပျဳခိုၚ်ဖျိုဝ် ဇၞးလဝ်မာဲ ပ္ဍဲကဵုဒေသဆန္ဒမာဲ ဆေၚ်စပ်တံရောၚ်။ ပ္ဍဲကမ္မတဳလၟိုန်ၜါ ဒက်ပ္တန်လဝ် ဂှ်တှ်ေ သီုကဵုညးစၞးဒပ်ပၞာန် ၂ တၠ ပါလုပ်တုဲ သီုဖအိုတ်ညးစၞး ၁၅ တၠ ပါလုပ်မံၚ်ရ။
တုဲပၠန် နူကောံဓရီုလၟေၚ်ဍာံ အလန်ပထမဏအ်ဂှ် သွက်ဂွံဆက် ဒက်ပ္တန်အာကမ္မတဳလၟိုန် ဆေၚ်စပ်ကဵုစၠတ်ဓဝ်ညးဍုၚ်ကွာန် ၜါကမ္မတဳနွံမံၚ်ရောၚ်ဂှ် ဌာန်ပရိုၚ်အပ္ဍဲဍုၚ် စုက်လုက်ကဵုကဝ်မယှေန်ပၞာန်တံ ထမံက်ထ္ၜးလဝ်ရ။
အတိုၚ်သဇိုၚ်သၞောဝ်ဥပဒေသမ္ဂး ပ္ဍဲစၠတ်ဓဝ်ညးဍုၚ်ကွာန်ဂှ် ပါဲနူ ကမ္မတဳလၟိုန် ၄ ဂကောံတုဲ အတိုၚ်ပၟိက်နွံကၠုၚ် ပ္ဍဲကဏ္ဍလၟေၚ်ၚ်တံမ္ဂး ကမ္မတဳတၞဟ်ဟ်ကဵု ကဝ်မယှေန်တံဂှ်လေဝ် ဗွဲယာယဳ ဟွံသေၚ်မ္ဂး သွက်ဒက်ပ္တန်အာတန်န်ကြန်န်ဂှ် အခေါၚ်မၞုံရ။
ဂကောံတံဏအ်ဝွံ ဒးစၟဳစၟတ်ဥပဒေအပြောံ၊ ဒးမၚ်ရံၚ်လ္ၚတ်အာ ကမၠောန်ဌာနဝန်ဇၞော်မဆေၚ်စပ်ကေုာံ ပ္ဍဲကိစ္စဖဵုဂုဏ် ညးဍုၚ်ကွာန် တံဂှ် ဒးပတိုန်ထ္ၜး ကဵုအာကသပ်နာနာတံ မဒှ်ရ။
အပ္ဍဲကာလသီလဝ်အဝဵုဏံ ကဝ်မယှေန်ပၞာန်ကီု ကံၚ်သဳစဵုဒၞာ ကောန်ဂကူကေုာံ ပရေၚ်ဂီုကၠီုတံကီု သီုဥပဒေအပြောံ ဆေၚ်စပ်ကဵု ဘဏ္ဍာသြန်လုပ်သြန်အိုတ်ကေုာံ ဥပဒေနာနာတံဂှ် အတိုၚ်ပၟိက်စိုတ် ညးတံ ချူပလေဝ် သ္ပကၠုၚ်လဝ်ဒတန်ရောၚ်။
လၟုဟ်ဝွံ စၠတ်ဓဝ်မံက်ကၠုၚ်ယျတုဲ ကြဴနူဒက်ပ္တန်အလဵုအသဳတၟိတုဲမ္ဂး ပရေၚ်ချူခၞံဥပဒေ၊ ပရေၚ်သ္ပဒတန် ကိုန်အစဳဇန်ကောန်ဂကူ ကေုာံဘဏ္ဍာ သီုကဵုပရေၚ်ထိၚ်ကြာပ် ကမၠောန်ဂကောံအလဵုအသဳတံဂှ် ဒှ်အာတာလျိုၚ်စၠတ်ဓဝ် အဓိကတုဲ ဒးကၠောန်ထမံက်အာရုပ်ရဴ မဒှ်ရ။
ပ္ဍဲသတ္တဟလောန်ကၠုၚ်ဏံ ညးဒးဒုၚ်ရုဲစှ်ခပ္တန်လဝ် ဥက္ကဋ္ဌ ကေုာံ ဒုဥက္ကဋ္ဌ စၠတ်ဓဝ်နာနာတံဂှ် ဒှ်ညးကေၚ်ကေတ်လဝ်တာလျိုၚ် ပ္ဍဲယန္တရာပရေၚ်အုပ်ဓုပ်ပၞာန်တံကဵု ညးစၞး နူဗော်ပျဳခိုၚ်ဖျိုဝ်တံသၟးရ။
ပ္ဍဲအကာဲအရာဗီုဏအ်ဂှ် သွက်ဂွံပဓဝ်ထိၚ်ကြာပ်အာ အလဵုအသဳဒက်ပ္တန်ယၟု ဒးဒုၚ်ရုဲစှ်လဝ်နူညးဍုၚ်ကွာန်တံတုဲ စပ္တံဒက်ပ္တန်ကၠုၚ်ကမ္မတဳလၟိုန် ညးတံမနွံပၟိက်ဂှ် မဒှ်ရ။
ဆဂး ကံၚ်သဳတေၚ်ဗၚ်ကၟိန်ဍုၚ် ဒက်ပ္တန်နူသမ္မတဂှ်လေဝ် နွံကၠုၚ်မံၚ်ဏီတုဲ ပ္ဍဲကံၚ်သဳဂှ်တှ်ေ ပူဂဵုနူဒပ်ပၞာန် ဟွံသေၚ်တှ်ေ ညးမစုက်လုက်ကဵု ဗွိုၚ်တံဏံဂှ် ကၠုၚ်ပၠတရဴသ္ကိုပ်သ္ကအာမာန်ရောၚ် သာ်ဝွံ ညးလ္ၚတ်တံ ဟီုမံၚ်အိုတ်ရ။
ကံၚ်သဳတေၚ်ဗၚ်ဂှ်တှ်ေ သီုပရေၚ်ဂီုကၠီု၊ ပရေၚ်အုပ်လဒမ်သၞောဝ်ဓဝ်၊ ပရေၚ်ဆက်ဆောံဂၠးကဝ်၊ ပရေၚ်ၜိုဟ်လလမ် ကေုာံ ပရေၚ်ခၞံဥပဒေတံဂှ် သွက်ဂွံကဵုကသပ်ပ္ညဳပ္ညပ်အာနွံတုဲ အခေါၚ်သွက်ဂွံပိုၚ်ခြာ ထိၚ်ကြာပ်အာ အလဵုအသဳကေုာံစၠတ်ဓဝ်တံကီုရောၚ် ညးခါတ်အကာဲ ပရေၚ်ဍုၚ်ကွာန်တံပါ်ပါဲ သ္ၚဳဂၠိပ်လဝ်ရ။
ပရိုၚ် – သြၚ်လောန်တိုၚ်မ်
Photo – USDP