မတ်မလီု၊ မာတ် ၂၄
ပ္ဍဲတွဵုရးမန် ဟိုတ်နူကၠေၚ်စက်ပိုတ်တ်အာကီု ပရေၚ်အခက်အခုဲရာန်ကၠေၚ်ဟွံဂွံတံတုဲ သွက်ကာလဍာ်ဇမၠိုၚ်မ္ဂး ကမၠောန်ပရေၚ်တဵုလွဳ အလုံသီုဖအိုတ်တံ ဟောံဗြောမ်စှ်ေအာမာန်ရောၚ် ညးတဵုလွဳတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ကမၠောန်ပရေၚ်တဵုလွဳ နွံအပ္ဍဲတွဵုရးတံဂှ် စကာစက်ပၟတ်တုဲ ဒးစုတ်ကဵုမံၚ်ဍာ် သွက်ပရေၚ်တဵုလွဳကီုလေဝ် ဟိုတ်နူကၠေၚ်စက်ပိုတ်အာဂှ် အခိၚ်လၟုဟ်မ္ဂး ပၠုပ်ဍာ်ပရေၚ်တဵုလွဳဟွံဂွံ စိုပ်မံၚ်အကာဲအရာဏံရောၚ်။
လၟုဟ်မ္ဂး ကမၠောန်ပရေၚ်တဵုလွဳတံ သွက်ဂွံပၠုပ်ပတိုန်ကဵုဍာ်ဂှ် ကၠေၚ်စက်ဟၟဲတုဲ ခၞေဝ်ကေဝ်သတ်ဆုသတ်ဒုန်တံ ဟွံစိုပ်အခိၚ်ဏီဂှ် လီုလာ်ကှ်ကေဲအိုတ်ဂှ်ရ သွက်ဂွံဆက်တဵုအာမာန်ဂှ် ဒးဇီုကပိုက်မံၚ်ကဵု အခက်အခုဲနာနာသာ်ရ။
ဟိုတ်နူ ပရေၚ်အခက်အခုဲရာန်ကၠေၚ်စက်ဟွံဂွံတုဲ သတ်ဆုသတ်ဒုန် ဒးပၠုပ်ကေတ်ဍာ်တဵုလွဳမံၚ်တံ လီုလာ်အာဂှ်ရ ၜိုတ်တဵုလဝ် ဒးဒုၚ်ကျ ဆောံလေၚ်အိုတ်ယျဂှ် ညးတဵုလွဳမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ညးတဵုလွဳတံ ညးမွဲလေဝ် ဟွံပြေပြံၚ်ပုဟ်။ ကၠေၚ်စက် နဲလဵုလေဝ် ရာန်ဟွံဂွံပုဟ်။ လၟုဟ် ဗီုကဵုတၞံဟာမ်ဗောမ်တံ တှ်ေ ဒးပတိုန်ကဵုဍာ် မွဲတ္ၚဲပေၚ်ၚ်။ ပတိုန်ဍာ်ဟီုတှ်ေ ဒးဒဳစက်စကာအာကၠေၚ်စက်။ စကာဍာ်တုဲ ဒဳစက်ဂွံဟွံသေၚ်ပုဟ်၊ ဟိုတ်ဂှ်ရ ကျအာယျ။ ခပဳထဝ်တံ၊ သတ်ဂန်တံ၊ ဟာန်ဗောမ်တံ၊ ခဍောၚ်ဗ္စးတံဂှ် မၞိဟ်ရာန်ဟၟဲရပုဟ်။ ကွဳစက်တံမွဲမလေဝ် ဟွံကၠုၚ်ပုဟ်။ ကၠေၚ်ဟၟဲတှ်ေ မုလေဝ်ကၠောန်ဟွံဂွံပုဟ်” သာ်ဝွံ သ္ဂးရ။
တုဲပၠန် သွက်ကမၠောန်ပရေၚ်တဵုလွဳမ္ဂး နူကဵုဆေၚ်ကၠေၚ်တံ သွံကဵုစေဝ်၊ တိုၚ်ကဳပေပါတံ ဟွံသေၚ်တုဲ နကဵုနဲလဵုလေဝ် ပြေပြံၚ်ဟွံမာန်တုဲ ခၞေဝ်ကေဝ်သတ်ဆုသတ်ဒုန် ၜိုတ်သှ်ေဇးမံၚ်တံဂှ် ၜိုတ်ဂွံၜိုတ်ကေတ် စိုပ်အာအကာဲအရာဏံ သာ်ဝွံ ညးဆက်ဟီုရ။
ဟိုတ်နူ အခက်အခုဲ ရာန်ကၠေၚ်စက်ဟွံဂွံတုဲ သွက်ဂွံဆက်တဵုလွဳအာ တၞံခၞေဝ်ကေဝ် သတ်ဆုသတ်ဒုန်တၟိတၟိတံပၠန်ဂှ်လေဝ် ချပ်လေဝ်ချပ်ဟွံမာန် စိုပ်မံၚ်ဍာ်ဏံယျရောၚ် ညးတဵုလွဳမွဲတၠတၞဟ်ပၠန် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ကၠေၚ်စက်ရာန်ဟွံဂွံတှ်ေ သီုညးဖအိုတ် ဒှ်အာအခက်အခုဲရ။ ညးတဵုလွဳတံဂှ်လေဝ် သွက်ဂွံပၠုပ်ပတိုန်ဍာ်ဂှ် ဟွံပြေပြံၚ်ပုဟ်။ လၟုဟ် ဆၜိုတ်တၞံတဵုလဝ်တုဲတုဲတံဂှ်ဟေၚ် ကလေၚ်ရံၚ်စံၚ်အာမာန်။ သွက်ဂွံထပ်တဵုလွဳအာဂၠိုၚ်ၚ်ဂှ်တှ်ေ ဟွံဂံၚ်ကလေၚ်ချပ်ရ အကာဲအရာဒှ်အာဗီုဏအ်ယျ” သာ်ဝွံ သ္ဂးရ။
ဟိုတ်နူအခက်အခုဲရာန်ကၠေၚ်စက် ဟပၠုပ်ပတိုန်ဍာ်ဟွံဂွံတုဲ သီုကဵုသြောံကညၚ်တံကီု တၞံခၞေဝ်သတ်ဆုသတ်ဒုန်တံ လီုလာ်အိုတ်အာဗွဲမဂၠိုၚ်တုဲ ယဝ်ရပရေၚ်အခက်အခုဲကၠေၚ်စက်ဏအ် အခိၚ်ပဵုလအ် တိုန်အာမံၚ်နူဏအ်မ္ဂး ပရေၚ်ဆောံလေၚ်တံဂှ် ကြပ်အိုတ်အာသီုဖအိုတ်ဒှ်မာန်ရောၚ် ညးတဵုလွဳတံ ဟီုရ။
ပ္ဍဲကဏ္ဍပရေၚ်တဵုလွဳ ပြသၞာကၠေၚ်စက်ကတဵုဒှ်မံၚ်ဂှ် လပါ်ကဝ်မယှေန်ပၞာန်တံ ထေက်ကဵုဒးသောၚ်ကဵုအာပရေၚ်ဏံ ဗွဲမပြဟ်နွံမံၚ်ပၟိက်တုဲ ယဝ်သောၚ်ကလးကဵုပရေၚ်ဏံ ဟွံမာန်မ္ဂး ကမၠောန်ပရေၚ်တဵုလွဳ အလုံသီုဖအိုတ်တံ ဟောံဗြောမ်စှ်ေအာမာန်ရောၚ် ညးတဵုလွဳတံ ထံက်ထ္ၜးရ။
ပ္ဍဲဒေသဂှ်တှ်ေ ဟိုတ်နူကၠေၚ်စက်အောန်ဂၠာဲဝါတ်တုဲ ပ္ဍဲဒၞာဲမ္ၚးဆေၚ်ဖျာဒမၠုတံဂှ် မွဲလေတ်မ္ဂး နူ ၁၂၀၀၀ ဒကေဝ် စိုပ်မံၚ် ၁၅၀၀၀ ဒကေဝ် ဒှ်မံၚ်ကီုလေဝ် အတိုၚ်နွံပၟိက် ရာန်ကေတ်ဟွံဂွံ စိုပ်မံၚ်အကာဲအရာဏံရ။
မွဲလပါ်ပၠန် နူကဵုဌာနစၟဳစၟတ်ထိၚ်ကြာပ်ကပေါတ် ပတိတ်ကၠေၚ်ဍေၚ် တွဵုရးမန် သၟတ်တဲကဝ်မယှေန်ပၞာန်ဂှ် ဆေၚ်ကၠေၚ်တံ ညိလေဝ် ညံၚ်ဟွံဂွံသွံကဵုကၠေၚ်စက် နကဵုစေဝ်၊ ပေပါတိုၚ်ကဳတံလးလးဂှ် ကဵုလဝ်စၞောန်နွံတုဲ ပ္ဍဲကဏ္ဍပရေၚ်တဵုလွဳကီု သီုကဵုကဏ္ဍ ပရေၚ်ပိုန်ဒြပ်မၞိဟ်တံကီု ဒးဇီုကပိုက်အာမံၚ် ဇၞော်ကဵုဇြဟတ်ရောၚ်။
ပရိုၚ် – သြၚ်လောန်တိုၚ်မ်
Photo – CJ