မတ်မလီု၊ မာတ် ၂၅
အပ္ဍဲတွဵုရးမန် ဍုၚ်မတ်မလီု ဟိုတ်နူသွံကၠေၚ်စက်ဟွံလုပ်သၞောဝ်ဂှ်ရ တၠဆေၚ်ကၠေၚ်စက်ကီု သီုကဵု ညးတာလျိုၚ်ကမၠောန် ၇ တၠ ဒးဒုၚ်ရပ်စပ်ကေတ်အရေဝ်လဝ်ရောၚ် ဂွံတီကေတ် နူညးမစုက်လုက်ကဵု ကဝ်မယှေန်ပၞာန်တံရ။
ဂကောံဌာနစုၚ် ပံၚ်ကောံကဝ်မယှေန်ပၞာန်တံဝွံ စပ္တံနူမာတ် ၁၃ ဂှ် အရာသွံမံၚ်ကၠေၚ်စက်တံကီု သွံမံၚ်ကၠေၚ်စက် နကဵုသၞောတ်စောံမ မၞုံဟၟဲဂှ် ဟွံထေၚ်ခယျ လုပ်စၟဳစၟတ်လဝ်ရောၚ်။
အပ္ဍဲအရာစၟဳစၟတ်လဝ်ဏံမ္ဂး သွံကၠေၚ်စက်နကဵုစေဝ်၊ တိုၚ်ကဳပဳပါတံ စောဲစပ်တုဲ တၠဆေၚ်ကၠေၚ်စက် “မေန်တ” ဥူလှဝေန်ခိုင်၊ မာန်နေဂျာ ဥူမေန်ယေဝ်ထောန်၊ မန်နေဂျာ ဆေၚ်ကၠေၚ်စက် မေန်တ (၁) ဥူဇြဝ်မေန်အံၚ် တံ ဒးဒုၚ်ရပ်လဝ်ရ။
တုဲပၠန် တၠဆေၚ်ကၠေၚ်စက် “မေတ္တာမိမ” ဥူမျေအ်ဇြဝ်ဥူ၊ မာန်နေဂျာဆေၚ် ကိုကိုလာတ်၊ တၠဆေၚ်ကၠေၚ်စက် “စောန်မျာန်မာ” ဥူသိၚ်တေန်၊ ညးတာလျိုၚ်ဂိုဒံၚ် ကိုဇေယျာမေန်တံလေဝ် ဒးဒုၚ်ရပ်ကီုရ။
ညးဒးဒုၚ်ရပ်လဝ်တံဂှ် ပ္ဍဲဗ္ဒိုပ်ဗၠာဲသၟိၚ် ဆေင်စပ်တံဂှ် နကဵုသၞောဝ် ဥပဒေကၠေၚ်ဍေန်ကေုာံ ကပေါတ်တိတ်နူကၠေၚ်ဍေၚ်နာနာ ၝောံပိုဒ် ၃၉ (က) ပံက်လဝ်အမှုတုဲ အတိုၚ်ၝောံပိုဒ်ဂှ် ယဝ်ရဒုဟ်ဒဏ်မံက်မ္ဂး အောန်အိုတ် ဒဏ်သြန် ၅ ကိုတ် စိုပ်ဒဵု ၅၀ ကိုတ် ဒှ်ဒှ်၊ ဒုဟ်ထံၚ် ဟွံဂွံပဵုနူ ၆ ဂိတု ဒှ်ဒှ်၊ သီုဒုဟ်ဒဏ်ၜါသာ်လေဝ် ဖျေံအာမာန်ရောၚ်။
ကဝ်မယှေန်ပၞာန်တံဝွံ ပ္ဍဲမာတ် ၂၂ မလောန်ကၠုၚ်ဏအ်လေဝ် ပ္ဍဲဍုၚ်မတ်မလီုဂှ် ဟိုတ်နူဟွံဒဂေတ်ဗက်သၞောဝ် ပိုၚ်ခြာခုတ်စၟတ်လဝ် ပရေၚ်ဒးဒဳကွဳစက်သၞောတ်စောံမတုဲ မၞိဟ်ကြပ် ၂၀ တၠတံ ဒးဒုၚ်ကေတ်လဝ်အရေဝ်ရောၚ် ဂွံတီကေတ် နူဂကောံဒပ်ဗၠာဲသၟိၚ် တွဵုရးမန်ရ။
ပရိုၚ် – သြၚ်လောန်တိုၚ်မ်
Photo – Social Media